¹ Lafa niala tao an-kianjan'gny tempoly Jesosy, ro nivola tamy gny raiky tamindreo mpianatsy hoe:" Mpampianatsy e, enteo gny hasoa gny vato voho gny hasoa gny rafitsiny!" ² Hoy i taminy hoe:" Jerinao va rafitsy bevata reto? Tsy nengany hisy vato ndre raiky hifanongoa io ka tsy ho rava." ³ Lafa nipetraky t'antendrombohits'Oliva tandrify gny tempoly I, de nagnontany azy antsokosoko Petera, Jakoba, Jaona , Andrea hoe:" ⁴ Volagno aminay ,ombia moa ho avy zao raha iaby zao? Ino iaby moa gny famantara laha ho avy raha reo?" ⁵ Jesosy nanomboky nivola tamin-dreo hoe:" Mitandrema mba tsy hisy olo hagnabio lala anareo. ⁶ Fa ho maro moa gny ho avy amy gny agnarako sady hagnambara hoe:" Zaho ro I, sady maro gny ho voafitaky. ⁷ Lafa mahakasa aly voho resaky momba gny aly nareo, ka taitry avao; fa reo tsy maintsy hoavy , fa mbo tsy henaniky zao gny farany. ⁸ Fa hisy firenea hamango firenea, sady hisy fanjaka hamango fanjaka. Ka hisy horohoron-tany amy gny toera maro, sady hisy mosary. Manahaky an'izay gny fiandoha gny fahoria amy gny fiteraha. ⁹ Mitandrema nareo. Fa hatolotrin'dreo amin'gny Synedriona nareo, sady ho vangoindreo amy synagoga. Hijoro aloha gny mpanapaky voho gnazy mpanjaka reo nareo noho gny baka Amiko, ho vavolombelondreo. ¹⁰ Fa gny filazantsara ro tsy maintsy ho toria agny amy gny firenea iaby aloha. ¹¹ Lafa manambotry voho manolotry anareo reo, laha ka magnahy gny tokony hambaranareo nareo. Fa amy gny fotoa io, ro hagnomezanareo ze tokony ho volagninareo; tsy ho nareo mihintsy ro hivola, fa gny Fanahy Masia. ¹² Gny rahalahy hanolotry gny rahalahiny ho vonoa, de gny raiky hanolotry gny anakiny. Gny anakiny hirengy habe oro hanohitry gny babany amy neniny ka hamono andreo. ¹³ Habokahy gnolo iaby nareo noho gny agnarako. Fa ndre ia ia ro hiaritsy hatramy farany, ho voalomba olo io. ¹⁴ Lafa hitanareo mitsotaky eo amy gny tsy tokony hitsotahany gny fahavetaveta gny fandrava ( aoka hisay ze mamaky), engao ze baka Jodia iaby hamembaky antendrombohitsy egny, ¹⁵ ze antampon-tragno engao tsy hijotso an-tragno fa hiala handositsy na hamoaky gny raha bakaminy, ¹⁶ de ze baka an-katsaky agny tokony tsy himpoly hangala gny lambany koa. ¹⁷ Loza ro ho azo gny ampela mavesatsy voho mampinono amy gny gnandro io! ¹⁸ Mivavaha nareo mba tsy ho amy gny gnandro asotsy ro hiavia gny raha zay. ¹⁹ Fa hisy fahoria bevata, ze mbo tsy nisy bakamy voalohany, lafa nagnamboatsy zao tontolo zao Ndzagnahary, mandrak'androany, tsy hisy koa , sady tsy hisy an'izao koa gnagny laha mandrakizay. ²⁰ Sady laha tsy hoe nahenan'ny Tompo andro io, de tsy hisy nofo ho voalomba. Fa noho gny olo voafily, de nahenany manahaky an'izay koa gnandro zay. ²¹ Lafa misy olo mivola hoe:" Enteo moa, atoy Kristy zao! na koa hoe:" Enteo moa, eroy i! laha ka mino an'izao nareo. ²² Fa hisy Kristy sandoky voho mpaminany sandoky hiboaky mbetia mberoa sady hagnatoro gny famantara miharo fahagaga, andesiny hamitahany anao, ndre i ro olo voajobo, laha azo atao. ²³ Miambena! Fa nivolagniko taminareo taloha tagny raha iaby reo. ²⁴ Afara gny fahoria amy gny andro reo, de ho mahiky gny masoandro, gny vola hagnome hazava, ²⁵ gny vasia ihintsa baka an-dagnitsy, hery baka an-dagnitsy ho voahozohozo. ²⁶ Ka ho jerin'ny Anakolombelo baka amy gny rahona amy gny hery voho gny voninahitsy. ²⁷ Hagniraky gny anjeliny i ka hamory gnazy voafily baka amy gny vazan-tany efatry, baka amy gny farany gny tany laha potitsy amy farany gny lagnitsy. ²⁸ Mangala leso baka amy gny hazon'aviavy. Laha vo tomiry voho mamihy gny raviny , de fa hainareo fa mariniky gny lohatao. ²⁹ Manahaky an'izay koa, laha vo jerinareo mijoalajoala raha iaby reo, fa hainareo fa mariniky i, magnariniky gny vavahady. ³⁰ Volagniko aminareo, laha to vatany, fa taranaky toy tsy ho lany paraky hitsanga gny raha aby zao. ³¹ Ho rava gny lagnitsy voho gny tany, fa gny safako koa ho velo mandrakizay. ³² Gny mahakasiky gny andro na lera io, tsy hisy ahay, ndre anjely reo, ndre gny gnanaky, fa gny Ray avao. ³³ Mitandrema soa! Miambena, fotony tsy hay gny lera. ( Fagnamariha: Fahefa taloha reo hoe: Mitandrema soa! Miambena sady mivavaha, fotony ...) ³⁴ Zay ro manahaky gny johary raiky handeha lavitsy nagnenga gny tragnony, samby amy gny fijaleany, nandidy gny mpiamby i mba tsy hiroro. ³⁵ Miambena, fotony tsy hainareo hoe ombia ro hiavia gny tompon-tragno; mety ho andro haliky zay, na sasakaly, na magneno akoho, na maraindray. ³⁶ Fa laha avy tampoky i, ka enga ahita anareo miroro i. ³⁷ Ho volagniko aminareo de ho volagniko amy gny olo iaby hoe: Miambena!"