¹ Henaniky zao, ry malala, manoratsy any toy taratasy faharoa toy ho gnanareo zaho ho fampatsiahiva handesy hampirisiha gny sainareo malio, ² mba hatiarovanao gny teny nambarany mpaminany masy taloha tagny sy gny lily gny Tompo sy Mpamonjy antsika ze nomeny Apostolinareo reo ³ Fantaro aloha zao, fa gny mpagniratsira ro ho avy amy andro farany. Reo ro hagneso sady handeha araky gny filandreo manoka. ⁴ Reo hivola hoe: " Aia gny fampagnantena gny amy fimpoliany? Fa hatramizay noliany razam-be mandry, tsy niova gny raha iaby, na tamigny fanombohany zao tontolo zao aza." ⁵ Reo ro minia magnaligno fa gny lagnitsy voho gny tany ro nisy baka tamigny rano sady tamy gnalala gny rano, fotoa ela, ⁶ noho gny lilin-Dragnahary, sady tamy gnalalany raha reo ro nandrava gny tontolo taminy zay fotoa zay, taminy tsodra-drano. ⁷ Fa henany zao gny lagnitsy sy gny tany ro natoka ho any motso amy gnalalan' io lily io avao. Reo ro voatoka hoa amy gny androny fitsara sy gny fandringana gny olo raty fagnahy. ⁸ Aoky tsy ho halignonareo, ry malala, fa gny andro raiky amy Tompo, manahaky gny arivo tao, ka gny arivo tao manahaky gny andro raiky. ⁹ Gny Tompo ro tsy ela amy fagnatanteraha gny fampanatenany reo, araky ze nambarany sasany ho fahelany. Fe , I ro maharitsy aminareo. Tsy teany ho trobo nareo, fa mba ho avy amy fibebaha gnolo iaby. ¹⁰ Na zay aza, ho avy manahaky gny mpangalatsy gny andron'i Tompo: Gny lagnitsy ro hanjavo miaraky amy feo mare, Gny raha iaby ro ho main'ny motso, gny tany sy gny asa aminy ao ro hambara. (Fagnamariha: Dikan-teny sasany ro miavaky manahaky anizao: " Gny raha iaby ro ho mainy motso, gny tany sy asa aminy ao reo ro ho dora iaby.") ¹¹ Ka laha ho velo manahaky anizay raha iaby zao, tokony ho olo manao akory nareo? Tokony hiai amy fahamasina sy gny fiaigna araky an-Dragnahary nareo. ¹² Tokony hagnategna sady hampalaky gny fiaviany gnandron-Dragnahary nareo. Amy zay fotoa zay, gny lagnitsy ro ho levogny motso, gny raha iaby hiempo amy hafana be. ¹³ Araky gny fampagnatenany, miamby gny lagnitsy vaovao sy tany vaovao tsika, ze hipetrahany fahamarina. ¹⁴ Noho zay, ry malala, fotony magnategna anizay raha zay nareo, manaova gny soa mare baka aminareo mba tsy hisy tasy sy tsy hanan-tsiny agnatrehany, am-piadagna. ¹⁵ Eritrereto gny faharetan'ny Tompontsika amy famonjea, nanahaky gny nisoratan'i Paoly rahalahy malalantsika taminareo, araky gny fahendreha ze nomea azy. ¹⁶ Paoly ro mivola anizay raha zay aminy taratasiny iaby ao, ze misy raha sarotsy takary. Olo tsy misy fahalala sady tsy miory ro magnova anireo raha reo, nanahaky gny hanaovany Soratsy Masy hafa avao koa, ka mahavy fahavereza ho any gnainy ¹⁷ Noho zay, ry malala, fotony hainareo zay raha zay, tandremo gny gnainareo mba tsy ho voafandriky gny fitak'olo raty fagnahy ka ho trobo gny fahamarignanareo. ¹⁸ Fa mitomboa amy fahasoava sy fahalala gny Tompontsika voho Jesosy Kristy Mpamonjy antsika. Ho Gnazy lehy gny voninahitsy henany zao sady mandrakizay. Amena!