¹ Simona Petera, mpanompo sy Apostolin'i Jesosy Kristy, ho an'ireo ze nahazo gny finoa sarobidy manahaky zay nirambesinay, finoa ao amy gny fahamarinan-Dragnahary tsika sy Jesosy Kristy Mpamonjy. ² Hampitomboy anie gny fahasoava voho gny fiadagna noho gny fahalala an-Dragnahary sy Jesosy Tompotsika. ³ Reo raha iaby mahakasiky gny herin-Dragnahary ho an'ny fiaina voho gny toe-pagnahy nameany antsika tamy gny fahalala an-Dragnahary, ze nikaiky antsika tamy gny alalan'ny voninahiny sy gny fahatsarany manoka. ⁴ Tamy gny alalan'ireo, nameany teny fikasa soa sady bevata tsika, mba ho lasa mpizara amy gny fomban-Dragnahary nareo, laha miala gny fahalotoa an-tany eto noho ireo filan-draty. ⁵ Noho zay, manaova gny soa avao mba hanampia fahatsara amy alala gny finoanareo, amy alala gny fahatsaranareo, gny fahalala. ⁶ Amy alala gny fahalalanareo , manampia fahononam-po, ka amy alala gny fahononam-ponareo manampia fihareta, amy alala gny fiharetanareo, manampia toe-pagnahy. ⁷ Amy alala gny toe-pagnahy nareo, manampia fitiava lehireo, ka amy alala gny fitiava lehireo, manampia fitiava. ⁸ Laha aminareo ao reo ka mitombo ao aminareo, tsy hamoa na tsy hamokatsy amy gny fahalala an'i Jesosy Kristy Tompotsika nareo. ⁹ Fa ndra ia ndra ia tsy ampy reo raha reo, tsy mahita afa tsy ze mariniky; goa i. Nihalignony gny fagnadiova azy tamy reo fahotany taloha. ¹⁰ Noho zay, lehireo, ataovo gny raha iaby mba hahazoa antoky gny fikahia voho gny fifidiana anareo. Laha manao reo raha reo nareo, tsy ho voafinga. ¹¹ Amy zay malalaky ho anareo gny filira ao amy gny fanjaka mandrakizay ze an'ny Tompotsika sy Jesosy Kristy mpamonjy. ¹² Noho zay, vonona avao zaho hampatiaro anareo reo raha iaby reo, na fa hainareo aza reo, sady na matanjaky ao amy gny marina aza nareo henanaky zao. ¹³ Zaho mieritreritsy fa rariny amiko gny mamoha anareo amy gny fampahatsiahiva reo raha reo, laha mbo eto amy toy trano lay toy aho. ¹⁴ Satria haiko fa tsy ho ela, ho halaiko gny trano laiko, manahaky ze natoron'i Jesosy Kristy Tompontsika ahy. ¹⁵ Sady ho ataoko ze farany vitako mba hahatiarovanareo mandrakariva reo raha reo lafa roso aho. ¹⁶ Zahay tsy nagnaraky angano soa rafitsy ze niforony lafa niresaky taminareo gny momba gny hery sy gny nisehoan'i Jesosy Kristy Tompotsika. Fe kosa, zahay vavolombelo nahita gny fiandrianany. ¹⁷ Fa i, naharamby laza aman-boninahitsy baka amin-Dragnahary Baba lafa nisy feo niavy taminy teo tamy voninahitsy bevata hoe: "Ty ro gnanako malalako, ze sitrako loatry" ¹⁸ Nahare zay feo zay baka an-danitsy agny zahay, lafa niaraky taminy tan-tendrombohitsy masina. ¹⁹ Tsika mana ty teny faminania ze fa natao mafy ory ty. Tokony hitandry agny zay soa nareo. Zay manahaky gny jiro mazava anaty gny haiziky mandra-piavia gny maraindray sy gny kintan'ny maraindray miposaky am-ponareo ao. ²⁰ Ataovo hay tseky zao, tsy misy faminania baka amy gny fanaboahan-kevitsy gny olo. ²¹ Tsy misy faminania baka amy gny sitrapo gny olo. Fe koa, notarihy gny Fagnahy Masina reo regny mba hivola zay nambaran-Draganahary