¹ Nitsangana ny ôla daôly tamin-jareo, ary nitondra an'i Jesosy takeo agnolôn'i Pilato. ² Nagnomboka nempanga an'Azy zareo, nitare hoe: "Hitanay ty leila ty nametaveta ny firenenay, nandrara ny hagnomezana ny hetra ho an'i Kaisara, ary nilaza fa Izy tegnany mitsy no Kristy, mpanjaka." ³ Pilato nagnotany an'Azy, nitare hoe: "Anao ma no mpanjakan'ny Jiosy?" Jesosy namaly an'azy ary nitare hoe: "Vôlazanao." ⁴ Pilato nitare tam'reo lôhan'ny mpisorona sy reo vahôka hoe: "Tsy mahita fadisona am'ty leila ty za." ⁵ Fa mbôla nagnizingizigna zareo, nitare hoe: "Magnakorontana ny vahôka io, mampianatra eragn'i Jodia manontolo, manomboka avy aigny Galilia na hatraty am'ty tôrana ty aza." ⁶ Ka rafa regnin'i Pilato zany, de nagnontany izy raha ôtra ka Galiliana le leila. ⁷ Rafa hitany fa takao ambany faefan'i Heroda Izy, de nalefany Jesosy nankaigny amin'i Heroda, ze taigny Jerosalema iany kô tam'zany andro zany. ⁸ Rafa tazagn'i Heroda Jesosy, de tegna ravoravo izy, satria efa te-hahita an'Azy hatramin'ny ela. Naregny ny momba an'Azy izy ary nagnantena ny hahita fagagana betsaka nataony. ⁹ Heroda nametra-pagnontanena an'i Jesosy tamin'ny teny maro, saingy Jesosy tsy namaly na ino na ino an'azy. ¹⁰ Reo lôhan'ny mpisorona sy reo mpanora-dalàna nitsangana, nempanga mafy an'Azy. ¹¹ Heroda sy reo miaramilany nanevateva an'i Jesosy sady nagnesoeso an'Azy. ¹² Avekeo de nampekanjo an'Azy lamba tsara tarehy zareo ary nalefan-jareo niverigna taigny amin'i Pilato Izy. Fa Heroda sy Pilato de lasa mpinamana tamin'ny androtr'io (Talôhan'zany de mpifavalo zareo). ¹³ Avekeo Pilato nagnantso an'reo lôhan'ny mpisorona sy reo mpanapaka ary reo vahôka betsaka niaraka, ¹⁴ ary nitare tamin-jareo hoe: "Nentinareo taketo aminà ty leila ty salan'ny leila ze mitarika ny ôla hagnano ratsy, ary jerevo, za, raha nametra-pagnontanena tamin'Azy takeo agnolônareo, de tsy mahita fadisôna am'ty leila ty makasika an'reo ra ze hiampanganareo an'Azy. ¹⁵ Tsia, na de Heroda aza, satria nalefany niverigna taty amintsika Izy, ary jerevo, tsisy na ino na ino ze mendrika fafatesana vitany. ¹⁶ Noho zany de ho faiziko Izy, ary havotsotro Izy." ¹⁷ [Fagnamarihana: Reo fandikana tsara ndrindra de tsy magnisy ny And17 hoe: Ary Pilato de vôtery namotsotra gadra raika ho an'reo Jiosy tamin'ny andro firavoravôna.] ¹⁸ Fa niara-nikikika mafy zareo, nagnano hoe: "Ento aigny io leila io, ary avotsory ho an'nay Barabasy!" ¹⁹ Barabasy de leila raika ze nampidirigna am-ponja nohon'ny fikomiana betsaka takao an-tanàna sy famonoana ôla. ²⁰ Ary nitare tamin-jareo ndre Pilato, nangniry ny hamotsotra an'i Jesosy. ²¹ Saingy nitabataba mafy zareo, nitare hoe: "Homboy Izy, homboy Izy." ²² Nitare tamin-jareo fanintelony izy hoe: "Magnino, fa ino no ratsy vitan'ty leila ty? Tsy nahita na ino na ino ze mendrika sazy famonoana takao amin'Azy za. Noho zany rafa avy magnafay an'Azy, de hamotsotra an'Azy za." ²³ Fa zareo nagnizingizigna tamin'ny feo avo, nangataka an'Azy mbô homboana. Ny feon-jareo de nandresy latra an'i Pilato. ²⁴ Ka de nanapa-kevitra ny haneky ny fangatahan-jareo Pilato. ²⁵ Navotsony le raika nangatahin-jareo ze nalefa taigny am-ponja nohon'ny fikomiana sy famonoana ôla. Fa natolony ho amin'ny Sitrapon-jareo Jesosy. ²⁶ Ary teo am-pitondrana an'Azy zareo, de nitàna an'i Simona avy aigny Syrenie, ze avy aigny ambanivotra, ary napetrak'zareo takeo amin'azy ny hazofijalena mbô ho entiny, nagnaraka an'i Jesosy. ²⁷ Betsaka tam'reo vahôka, sy reo vevavy ze nalaelo mafy sy nisaona an'Azy, no nagnaraka an'Azy. ²⁸ Fa rafa nitodika taigny amin-jareo, de nitare Jesosy hoe: "Ry zanakavavin'i Jerosalema, aza mitomany Anà, fa mitomane ho an'ny tegnanareo sy ho an'reo zanakareo. ²⁹ Fa indro, ho avy ny andro ze hitinenan-jareo hoe: 'Sambatra reo momba sy reo kibo ze tsy niteraka, ary ny nono ze tsy nampinono zaza.' ³⁰ Ary de hagnomboka hitare am'reo tendrombotra zareo hoe: 'Menjerà aminay,' ary amin'ny tanety hoe: 'Magnarôna an'nay.' ³¹ Fa raha magnano an'zany ra zany zareo raha mbôla maitso ny kakazo, ino no hitranga rafa maigna zany?" ³² Nisy leila hafa, olon-dratsy anakiroa, nentina niaraka tamin'Azy mbô ho vonoina. ³³ Rafa tonga takeo amin'ny tôrana raika ze antsovina hoe: "Ikarandoha" zareo, de takeo no nagnomboan-jareo an'Azy, sy reo ôlon-dratsy - ny raika takeo amin'ny ankavanany ary ny raika takeo amin'ny ankaveny. ³⁴ Jesosy nitare hoe: "Ray ô, mamelà an-jareo, fa tsy fanatr'zareo ze ataony." Avekeo de niloka zareo, naizarazara reo fitafeny. ³⁵ De nitsangana nijery takeo reo ôla raha mbôla nagnanihany an'Azy kô reo mpanapaka, nitare hoe: "Namonjy an'reo hafa Izy. Avelao Izy hamonjy ny tegnany, raha Izy no Kristin'Andriamanitra, le raika vôfidy." ³⁶ Reo miaramila iany kô de nagnala baraka an'Azy, nagatona an'Azy, nagnome an'Azy vinaikitra, ³⁷ ary nitare hoe: "Raha Anao no mpanjakan'ny Jiosy, vonjeo ny tegnanao." ³⁸ Nisy famantarana iany kô takeo agnambony hoe: "Ty no mpanjakan'ny Jiosy." ³⁹ Ny raika tam'reo ôlon-dratsy ze nisangatona takeo no namingavinga an'Azy tamin'ny nitinenany hoe: "Tsy anao ma no Kristy? Vonjeo ny tegnanao sy zahay." ⁴⁰ Fa ny anakiray nitare mafy an'azy, nagnano hoe: "Tsy mbô matatra an'Andriamanitra ma anao, raha samy ambanin'ny fagnamelôna mitovy iany? ⁴¹ Tsika de aketo ara-drarigny tokoa, satria mandray ze mendrika ny asantsika tsikana. Fa ty leila ty tsy nagnano ra ratsy." ⁴² Avekeo izy nitare hoe: "Jesosy ô, tadidio za rafa tonga aigny amin'ny fanjakanao Anao." ⁴³ Jesosy nitare tamin'azy hoe: "Taraviko marina aminao, fa gniany anao de hiaraka aminà aigny am-paradisa." ⁴⁴ Ary ora faenina teo ho eo tam'zany, ary ny aizigna avy nandrakotra ny tany manontolo hatramin'ny ora fasivy ⁴⁵ raha ne maizigna ny hazavan'ny masoandro. Avekeo ny lamban'ny tempoly de nizara avy takeo ampovôny. ⁴⁶ Nikikika tamin'ny feo mafy, Jesosy nitare hoe: "Ray ô, akeo an-tagnanao no ametrahako ny fagnahiko." Rafa avy nitare an'zany, de maty Izy. ⁴⁷ Rafa tazagn'le kapitey ny ra nitranga, de nagnome voninatra an'Andriamanitra izy, nitare hoe: "Azo antoka tokoa fa ôlo-marina ty leila ty." ⁴⁸ Rafa tazagn'reo vahôka daôly ze niara-tonga ho vavolombelona nagnatri-maso reo ra nitranga reo, de niverigna niteha-tratra zareo. ⁴⁹ Fa reo daôly ze nafantatra an'Azy, sy reo vevavy ze nagnaraka an'Azy avy aigny Galilia, de nitsangana taigny alavidavitra, nijery an'zany ra zany. ⁵⁰ Ary indro, nisy leila raika antsôvina hoe Josefa, ze mpikambagna takao amin'ny Synedriona. Ôla tsara sady marina izy. ⁵¹ Io leila io de tsy nangeky ny fanapa-kevitry ny Synedriona sy ny asan-jareo. Avy aigny amin'ny tanànan'ny Jodiana taigny Armatia izy; ary izy de nikatsaka ny fanjakan'Andriamanitra. ⁵² Io leila io, raha nagnatona an'i Pilato, de nangataka ny vatan'i Jesosy. ⁵³ Nalainy nidigna zany, norakofany hariry madinika, ary napetrany takao agnaty fasagna raika ze novakiana tamin'ny vatolampy, ze tsy mbôla nisy ôla nalevigna mitsy. ⁵⁴ Andron'ny fiomanana tam'zany, ary mbôla nazava ratsy ny Sabata. ⁵⁵ Reo vevavy, ze niaraka tamin'i Jesosy niala tao Galilia, de nagnaraka avy akao afara ary natazagna fasagna sy ny fomba nametràna ny fatiny. ⁵⁶ Niverigna zareo, ary nagnomana ra magnitra sy menaka magnitra. Ary tamin'ny Sabata de nitsahatra zareo araka ny didy.