¹ Jesosy nitare tam'reo mpianany hoe: "Azo antoka fa hisy ra afaka hanosika an-tsika hagnota, fa lozan'ze ôla hiaven'zany! ² Tsara ho an'zany ôla zany raha asena vatobe akao amin'ny vozogny ka atsipy aigny agnaty ranomasina, non'ny hatafitona ny raika am'reo madinika reo. ³ Mitandrema anareo. Raha magnota ny ralànareo, tineno mafy izy, ary raha mibebaka izy, mamelà an'azy. ⁴ Raha magnota aminao impito akao agnatin'ny indray andro izy, ka impito miverigna aminao izy, mitare hoe: "Mibebaka za," de tsy maintsy mamela an'azy anao!" ⁵ Reo Apostoly nitare tamin'ny Tompo hoe: "Ampitomboy ny finoanay." ⁶ Ny Tompo nitare hoe: "Raha managna finoana salan'ny vôtsinampy anareo, de afaka mitare amin'io vôroihazo io hoe: "Miongota, ary maniria aigny an-dranomasina," de hagneky an'nareo izy. ⁷ Fa iza aminareo, no managna mpanompo miasa tany na miambin'ondry, ka hitare amin'azy rafa tonga avy aigny an-tsaha izy hoe: "Ave malaky ka mipitrà mbô hihinana?" ⁸ Fa tsy hitare amin'azy ma izy hoe: "Hikarakarao ra hohaniko za, ka aseo fekibo magnodidigna ny ankajonao de manompoa anà mandrapahalanin'ny ahaniko sy fisotroako. De avekeo anao mihinana sy misotro?" ⁹ Tsy misaotra an'le mpanompo izy satria nagnano reo ze nibaikona an'azy izy, se misaotra ma izy? ¹⁰ Na de anareo kô aza, rafa navita an'reo ra daôly ze nandidena an'nareo anareo, de tokony hitare hoe: "Zahay de mpanompo tsy mendrika. Ze tokony nataonay fôgna no nataonay." ¹¹ Ary raha nande ho aigny Jerosalema Izy, de nande takeo amin'ny sisin-tany takeo agnelagnelan'i Samaria sy Galilia. ¹² Rafa niditra takao amin'ny tanàna raika izy, de nisy boka folo lahy nifanena tamin'Azy tao. Nitsangana lavitra an'Azy zareo ¹³ ary nanandratra agnambo ny feon-jareo, nitare hoe: "Jesosy, Tompo ô, mamindrà fo aminay." ¹⁴ Rafa natazagna an-jareo Izy, de nitare tamin-jareo hoe: "Mandiana de atoroy an'reo mpisorogna ny tegnanareo." Raha igny lasa igny zareo de nadio. ¹⁵ Rafa natazagna ny raika tamin-jareo da sitragna izy, de niverina, niaraka tamin'ny feo avo nankalaza an'Andriamanitra. ¹⁶ Nenkoka takeo an-tongotr'i Jesosy izy, nagnome fisaorana ho an'Azy. Izy de Samaritana. ¹⁷ Ary Jesosy nitare hoe: "Tsy efa vôdio ma izy folo? Fa aiza ny sivy? ¹⁸ Tsisy hafa niverigna hagnome voninatra an'Andriamanitra ma, afa-tsy ty vahiny ty?" ¹⁹ Ary ozy tamin'azy: "Mitsangàna, ka mandiana. Ny finoana no nahasitragna an'nao." ²⁰ Raha nagnontanen'reo Fariseo hoe ôvena ny fanjakan'Andriamanitra no ho tonga, de namaly an-jareo Jesosy ka nikoragna hoe: "Tsy taza-maso ny fiaven'ny fanjakan'Andriamanitra. ²¹ Tsy hitare kô zareo hoe: "Jerevo, ty le izy!" na hoe: "Iry le izy!" Fa indro, ny fanjakan'Andriamanitra de akao agnatinareo."" ²² Ozy tam'reo mpianatra: "Avy ny andro hagnirinareo ny hahita ny raika amin'ny andron'ny Zanak'Ôla, fa tsy hahita an'zany anareo. ²³ Ary zareo de hitare aminareo hoe: "Jerevo, ery! Jerevo, ety!" Fa aza mivôka na magnenjika an-jareo. ²⁴ Fa salan'ny tselatra mamiratra mazava rafa mitaratra avy aigny amin'ny ilany ny lagnitra ka hatraigny amin'ny ilany raika, de ôtran'zany ny Zanak'ôla amin'ny androny. ²⁵ Fa vôlôny de tsy maintsy hijaly am'ra maro Izy ary ho lavin'ty taranaka ty. ²⁶ Salan'ze nitranga tamin'ny andron'i Noa, no hibôgna kô amin'ny andron'ny Zanak'Ôla. ²⁷ Nihinana zareo, nisotro, nanambady, natolotra ho ampakarina, mandra-peven'ny andro ze nidiran'i Noa takao amin'ny sambofiara - ary tonga ny safo-dragno ka nandringana an'azy daôly. ²⁸ Salan'ze nitranga tamin'ny andron'i Lota - nihinana sady nisotro zareo, nividy sy nivarotra, namboly sy nagnano tragno. ²⁹ Fa tamin'ny andro ze nivoahan'i Lota avy tao Sodoma, de afo sy solifara no nilatsaka avy taigny an-dagnitra ka nandringana an'azy daôly. ³⁰ De ôtran'zany kô ny amin'ny andro hibôgnan'ny Zanak'Ôla. ³¹ Am'zany andro zany, aza avela hiditra hiaka reo entany ho aigny avelan'ny tragno ze aigny amin'ny tampon-tragno; ary aza avela hiverigna ze aigny an-tsaha. ³² Tadidio ny vadin'i Lota. ³³ N'iza n'iza mikaraka hamonjy ny aignany de hahavery an'azy, fa n'iza n'iza hahavery ny aignany de hamonjy an'azy. ³⁴ Milaza aminareo Za, fa am'zany alina zany de hisy ôla roey akeo ambonin'ny fandrena raika. Ny raika de horaisina, ary ny raika ho avela. ³⁵ Ary hisy roa vavy miara-mitoto vary. Ny raika ho raisina, ary ny raika ho avela." ³⁶ [Fagnamarihana: reo fandikan-teny talô tsara ndrindraka de magnala ny andininy faha 36 hoe: "Hisy roa lahy aigny an-tsaha; ny raika ho raisina, ary ny raika ho avela."] ³⁷ Nagnontany an'Azy zareo hoe: "Aiza, Tompo?" ary Izy nitare tamin-jareo hoe: "Ze hitôran'ny faty, de aigny kô no hisy vototo hiara-miangona."