¹ Fa anao kosa, mizaka izay mifagnaraky ame fampianaragny marina. ² E lelà efa nahazo taogny da tsy maintsy mahay mitondra tegna, maontigny, mahonon-tegna, matanjaky ame finoagny, ame fitiavagny, da ame faharetagny. ³ Akoizany avakoa e viavy efa nahazo taogny da tokony hagnaboaky fezay e tegnandreo ho tsara fitondran-tegna, fa tsy mpidiniroho olo. Tsy tokony ho andevozin'e divay be indreo. Tokony hampianatry izay tsara indreo ⁴ mba hampiofagny e viavy tanora ho tena tia e vady aman-janany manokagny. ⁵ Tokony hampianatry andreo hahonon-tegna, hadio, hikarakara tokantragno tsara, sady hagneky e vadindreo. Tokony hagnano izany raha aby izany indreo mba tsy voarabin'e Zakan'Andriamanitry. ⁶ Akoizany, ampaherezo e lelà mbola tanora mba hahonon-tegna. ⁷ Ame fomba agnaby da aboay e tegnanao ho modelin'e asa tsara; sady rehefa mampianatry anao, magnaboà fahitsiagny izy ame fahamendrehagny. ⁸ Mizakà hafatry salama sady tsy misy tsigny, mba ho megnatry izay manohitry ndre ia ndre ia, satria tsy managny ndre ino ndre ino rats hozakaigny momba antsika izy. ⁹ E mpanompo da tokony hagneky e tompony ame raha agnaby. Hagnano izay sitrapony fa tsy hifamaly amin'azy. ¹⁰ Tsy tokony hangalangalatry indreo. F'izy, tokony hagnaboaky e finoagny tsara aby indreo, mba hampahamendriky e fampianarantsika momba an'Andriamanitry mpamonjy antsika ame lafiny rehetra. ¹¹ Fa efa niboaky tame olo agnaby e fahasoavam'Andriamanitry. ¹² Mampianatry antsika handà e toetry tsy araky an'Andriamanitry izy ame filàn'izao tontolo izao izany. Mampianatry antsika hiaigny am-pihononagny, am-pahamarinangny, da arak'e lalan'Andriamanitry amin'izao vanim-potoagny izao izany ¹³ eo am-pandignasantsika fatratry izay handraisantsika e fagnantegnagny mahafinaritry, e fiboahan'e voninahitrin'Andriamanitrintsika lehibe da Mpamonjy Jesosy Kristy. ¹⁴ Jesosy da nanolotry e tegnany ho antsika mba hagnavotry antsika hiala ame tsy fagnarahan-dalagny agnaby sady hagnadiovagny, ho an'e tegnany, olo raiky manokagny izay tena mazoto hagnano asa tsara. ¹⁵ Ambaray da ento ampaherezigny io raha aby io. Magnomeza fagnitsiagny ame fahefagny agnaby. Ka avela hisy olo hagnano tsinontsino anao.