¹ Ompat bolas tahun kamudian, awak balek lagi ka kota Yerusalem basamo dengan Barnabas dan Titus. ² Awak pogi lantaran suatu panyatoan dan untuk manjolaskan samo orang tu tontang Injil yang kubaritokan di antaro orang-orang bukan Yahudi. Namun, awak malakukannyo dalam panjumpoan pribadi, yaitu dengan orang tu bapangaruh untuk mamastikan bahwa apo yang awak karojokan tak sio-sio. ³ Bahkan Titus, yang basamo ku, tak musti disunat maskipun dio orang Yunani. ⁴ Hal ni tajadi lantaran ado sudaro-sudaro palsu yang diam-diam masuk dan manyusup ondak mamato-matoi kabebasan yang kito punyo di dalam Yesus Kristus supayo kito di bawak bhalek ka parbudakan. ⁵ Tapi, kami tak ondak tunduk samo orang tu sabontarpun supayo kabonaran Injil totap tinggal dalam kamu. ⁶ Namun, dari orang-orang yang bapangaruh tu, yang kadudukannyo taklah ponting samoku karono Allah tak mambeda-bedakan, orang tu tak manambokan apo-apo bagiku. ⁷ sabaleknyo, orang tu manengok bahwa samokulah tolah di pacayokan Injil untuk orang-orang tak basunat, samo saporti Petrus yang di pacayokan Injil untuk orang-orang yang basunat. ⁸ Dio jugo yang bakarojo malalui Petrus untuk manjadil rosul bagi orang-orang basunat, Dio jugo yang bakarojo malalui awak untuk manjadi rosul bagi orang-orang bukan Yahudi. ⁹ Sasudah Yakobus,Petrus, dan Yohanes, yang di pandang sabagai guru bosar bagi jamaat manyadari anuhgerah yang di borikan samoku, orang tu mambarikan tangan kanan parsakutuan pada si Barnabas dan samo ku supayo kami pogi kapado orang-orang bukan Yahiudi, sodangkan orang tu pogi kapado orang-orang basunat. ¹⁰ Orang tu hanyo pintak supayo kami ingat samo orang-orang miskin, satu hal yang awak sandiri sangat basamangat untuk malakukannyo. ¹¹ Tapi, waktu Kefas datang ka kota Antiokhia, awak torang-torangan awak malawannyo lantaran dio jolas kali basalah. ¹² Karono, sabolum datang orang-orang tartontu dari kalangan Yakobus, Kefas udah biaso makan basamo orang-orang bukan Yahudi, namun, waktu orang tu datang, dio muloi mundur dan pogi lantaran takut samo kalompok orang yang basunat. ¹³ Orang-orang Yahudi yang laen ikut-ikutan batingkah munafik, bahkan Barnabas pun tasosat oleh kamunafikan orang tu. ¹⁴ Waktu ku tengok bahwa orang tu tak sajalan dengan kabonaran Injil, mako bacakaplah awak kapado kefas di dopan samuo orang, "Kalau kamu orang Yahudi hiduplah macam orang bukan Yahudi, bagaimano mungkin kamu mamaksa orang bukan Yahudi hidup macam orang Yahudi?" ¹⁵ Kito adalah orang-orang yang lahir sabagai bangso Yahudi dan bukan orang-orang badoso dari bangso bukan Yahudi. ¹⁶ Namun, kito ytahu bahwa tak saorang pun dibonarkan karono malakukan Hukum Taurat malainkan malalui iman dalam Yesus Kristus. Bahkan, kito pacayo kapado Yesus Kristus supayo kito dibonarkan oleh iman dalam kristus, bukan karono malakukan Hukum Taurat. Sobab, tak saorang pun di bonarkan karono malakukan Hukum Taurat! ¹⁷ Tapi, samantaro kito barusaho dibonarkan dalam Kristus, kito mandapati diri kito jugo pandoso, apokah bararti Kristus palayan doso? Tontu sajo tidak! ¹⁸ Jiko awak bangun lagi apo yang udah awak robohkan, bararti awak adalah saorang palanggar hukum. ¹⁹ Sobab, malalui Hukum Taurat, awak tolah mati bagi Hukum Taurat supayo awak dapat hidup untuk Allah. ²⁰ Awak udah disalibkan dengan Kristus. Tak lagi awak yang hidup, malainkan Kristus hiduo dalam aku. ²¹ Awak tak mambatalkan anugorah Allah lantaran jiko kabonaran datang malalui Hukum Taurat, sio-siolah kamatian Kristus!