¹ Dongah nyin, ikau com d'pat bedalih gik, hei ensio, sopei pun yo ngehakim'iik urang lain, sebob waktu ikau ngehakim'ik sidok, ikau ngakim dirik kau gam; sebob, ikau yo ngehakim'ik gak'am ngerejo jolu-jolu yo samo. ² Kito tau bahwa penghakiman Allah dijetukkan ngan adil atas samuo urang yo ngerejo jolu-jolu tokuh nyin. ³ Akan tetapi,, opekah ikau ngiro d'pat lopas d'ri penghakiman Allah, hei ensio, yonyin ikau yo ngehakim'ik sidok yo ngerejokan jolu-jolu tokuh nyin, tatapi ngerejo jolu yo samo? ⁴ Atau, opekah ikau nganggop remeh kekayoan kemurahan Io, kesabera Io, kant kelapangan ati Io ngan com ngetau'ik bahwa ke'b'et'an Allah batujuan ntuk mimpin ikau ka petobetan? ⁵ Akan tetapi, dongah sikap koras kepalok kau kant ati kau yo com ndak betobet, ikau tongah nyimpan murka atas dirik kau surang ntuk hari kemurkaan tengkalo penghakiman yo jujor d'ri Allah di nyatokan. ⁶ Io akan mbeles semuo urang sesuai ngan pebuetan sidok mansing-mansing: ⁷ Yonyin kaidupan kokal kepado sidok yo ngan ketekunan d'lom bebuet b'et ngogok kemuliaan kant kehormatan, ⁸ tatapi murko kant kegodik'an ka sidok yo mentingkan dirik'a surang kant com ntaat'ik kebenaran, tapi nuntut kecombenaran. ⁹ Pasti ado penderitoan kant keuyuhan atas samuo jiwa urang yo bebuet jahat, patamo-tamo ka urang Yahudi kant urang Yunani gam. ¹⁰ Tapi, kemuliaan, kahormatan, kant damai sejatra pasti ado b'gi samuo urang yo bebuet b'et, patamo-tamo urang Yahudi kan abis nyin ka urang Yunani. ¹¹ Sebob, Allah com mbedo-bedokan urang. ¹² Ntuk urang-urang yo bebuet dosa tanpa ngenal Ukum Taurat, sidok pasti binasa tanpa Ukum Taurat. Tapi, urang-urang yo bebuet dosa di beruh Ukum Taurat pasti diakim'ik bedasarkan Ukum Taurat. ¹³ Sebob, kan'a pendingo Ukum Taurat yo dibenarkan di adopan Allah, tapi urang yo ngerejokan,a yo pasti dinyatokan bujor. ¹⁴ Sebob, tengkalo urang kan'a Yahudi yo com punya'ik Ukum Taurat nj'lenkan secaro alami pei yo dituntut tam Ukum Taurat, mako sidok, yo com ado Ukum Taurat, adolah Ukum Taurat b'gi dirik sidok surang. ¹⁵ Hal tuk nunjukkan bahwo pebuetan Ukum Taurat nyin tatulis di d'lom ati sidok, nurani sidok mborik kesaksian, kan pikeran sidok akan rajin nuduh atau mb'lo sidok, ¹⁶ pado ari tengkalo Allah akan ngakim'ik pikeran-pikeran ensio yo batapuk ngelalu'ik Yesus Kristus sesuai ngan Injil. ¹⁷ Akan tatapi, mun ikau nyobut dirik kau urang Yahudi kan begentung pado Ukum Taurat, sreto bemegah d'lom Allah, ¹⁸ ngenal kahendak-A, nyetuju'ik pei yo b'et, dah diajer ngelalu'ik Ukum Taurat, ¹⁹ kan pecayo bahwa dirik kau te panuntun b'gi sidok yo butok, torang b'gi sidok yo beado d'lom kegolapan, ²⁰ pengajer b'gi urang-urang yo budu, guru b'gi urang- urang yo bolom dewaso, kan dongah mpunyaik pengetauan kant kebenaran di d'lom Ukum Taurat, ²¹ mako hei ikau yo ngajer urang lain, ngope ikau com ngajer dirik kau surang? Ikau yo ngajer sidok ntuk com ncuri, com'ak ikau surang ncuri? ²² Ikau yo ngelarang urang bezinah, com'ak ikau surang bezinah? Ikau yo comek teadop behala-behala, com'ak ikau surang ncuri umah behala? ²³ Ikau yo bangga teadop Ukum Taurat malah mamalukan Allah ngan ngelangger ukum-A ! ²⁴ Sebob, tokuh ado tatulis:" Demo Allah dihujat diantaro bangsa-bangsa lain dongah ikau." ²⁵ Sunat memang ado nilai'a mun ikau nurut'ik Ukum taurat, tapi mun ikau surang pelangger Ukum Taurat, mako sunat kau njedi com basunat. ²⁶ J'di, mun yo com basunat ngerejo perentah-perentah d'lom Ukum Taurat, kan'a yo com basunat nyin diitung sebegei basunat? ²⁷ Kant, kan'a urang yo com basunat secaro lahiriah, mun io ngerejokan Ukum Taurat, akan ngehakim'ik Ikau, urang yo meskipun ado Ukum Taurat kant basunat, tapi ngelangger Ukum gak am? ²⁸ Sebob, yo disobut Yahudi kan'a urang yo ketongan d'ri luar'a jak, kant sunat yo sesungguh'a kan'a sunat pado beden jak. ²⁹ Seurang Yahudi yo sejati te urang yo batin'a sungguh-sungguh Yahudi, kant sunat yo sesesungguh'a te sunat yo dikrejokan pado ati, yo dij'lenkan d'ri Roh, kan'a tam ukum tatulis. Pujian teadop urang tokuh tuk kan'a d'tang d'ri ensio, tapi d'ri Allah surang.