¹ Paulus, hamba Yesus Kristus, yo dipanggel nj'di rasul kant dikhususkan b'gi Injil Allah; ² yo udah Allah jenjikan sebolom'a nglalu'ik nabi- nabi-A d'lom Kitab Suci ³ tontang Anak-A, yo nurut deging lahir d'rik keturunan Daud, ⁴ kant yo dinyatokan sebegei Anak Allah yo bekuaso nglalu'ik kebengkitan d'rik antaro urang mati nurut Roh Kekudusan, yonyint Kristus Yesus, Doto kito. ⁵ Nglalu'ik Io, kami nrimok anugrah kant j'batan kerasulan ntuk mbeik ketaatan iman diantaro sluruh bangsa kan'a Yahudi demi demo-A, ⁶ temansuk ikau yo dipanggel ntuk njedi wak Kristus Yesus. ⁷ Kepado ikau semuo yo ado di Roma, yo di kasih'ik Allah, kant yo dipanggel ntuk njedi urang-urang kudus: Anugrah kant damai sejahtera b'gi kau d'rik Allah, Bapa kito, kant d'rik Doto Yesus Kristus! ⁸ Petamo-tamo, aku besyukur kepado Allahku nglalu'ik Kristus Yesus atas ikau semuo dongah iman kau udah dinyatokan ke seluruh dunio. ⁹ Sebob, Allah, yo aku layan'ik ngan rohku d'lom Injil Anak-A, njedi saksiku dongah aku com bronti-ronti pei ngingat ikau semuo; ¹⁰ d'lom doaku, aku mogel memuhun supayo sekiro,a tum, tam kehendak Allah, akhir'a aku behasel ngunjung'ik ikau. ¹¹ Aku sangat ingin batomu ngan ikau supayo aku d'pat mbor'ik suatu karunia rohani ntuk nguatkan ikau, ¹² mako d'rik nyin supayo kito d'pat diteguhkan basamo- samo tam iman sorang-sorang, b'et iman kau ndakpun iman aku. ¹³ Saudero-saudero, aku ndak ikau tau bahwa aku dah berope kali berencano ntuk ngunjung'ik kau, tapi mansih tehalang sampai tum, supayo aku menuai hasil panen gak'am d'ri antaro ikau sebegeimone d'ri antaro bangsa-bangsa kan'a Yahudi lain,a. ¹⁴ Aku barutang ka urang Yunani kan ka urang barbar, ka yo behikmat ndakpun ka yo budu. ¹⁵ Dongah nyin'am, aku sungguh ndak mberitokan Injil kak ikau yo ado di Roma. ¹⁶ Aku com malu tontang Injil, sebob Injil nyin kuaso Allah ntuk keselamatan setiap urang yo pecayok; petamo-tamo ntuk urang Yahudi, lopas nyin ntuk urang Yunani gak'am. ¹⁷ Sebob did'lom'a keb'naran Allah dinyatokan d'ri iman ka iman, tokuh ado yo tatulis:" Urang b'nar pasti idup d'ri iman." ¹⁸ Sebob, murko Allah dinyatokan d'ri srugo teadop samuo kefasikan kant kejahatan ensio yo ngenokan keb'naran ngan kejahatan sidok. ¹⁹ Dongah nyin, opey yo d'pat diketau'ik tontang Allah dah j'las ntuk sidok dongah Allah dah nunjukan ka sidok. ²⁰ Memang, semejak dunio diciptakan, sifat-sifat Allah yo com d'pat ditongan, yonyin kuaso-A kekal kant sifat keilahian-A, dah katongan j'las ntuk paham'ik ngelalu'ik hal-hal diciptakan Io sampai sidok com d'pat bedalih. ²¹ Tatapi, sekalipun sidok ngenal Allah, sidok com ngehormat'ik Io sebegei Allah atau basukor ka Io; sebelik'a, pikeran sidok njedi com beguno kan ati sidok yo budu njedi golap. ²² Sidok nganggop dirik bjaksana, tatapi njedi budu, ²³ kant nukar kemulioan Allah yo com benoda ngan gemberan-gemberan ensio yo fana, burung-burung, binatang bakaki empat, atau binatang-binatang melata. ²⁴ Dongah nyin, Allah nyorahkan sidok ka kemaok ati sidok yo ndakkan kecomaran sampai sidok saling cemar'ik beden sidok diantaro sidok sorang. ²⁵ Sebab, sidok nukar keb'naran Allah ngan kebohongan, kant sujud sreto nyombah jolu ciptaan, kan'a Sang Pencipta yo tapuji selamo-lamo'a. Amin! ²⁶ Dongah nyin, Allah nyorahkan sidok ka nafsu-nafsu yo hina, sebob tinok-tinok sidok nukar hubungan yo pantas ngan hubungan yo com pantas. ²⁷ Piok gam ngan lelaki, sidok ninggelkan hubungan yo pantas ngan batinok, tapi menyelo-nyelo d'lom nafsu teadop sikuk samo lain; lelaki kan lelaki mulah pebuetan-pebuetan yo memalukan; kan di d'lom beden'a surang-surang, sidok nrimok ukuman atau dosa-dosa sidok. ²⁸ Kant, dongah sidok com maok ngaku'ik Allah d'lom pengetahuan sidok, mako Allah nyorahkan sidok ka pikeran-pikeran yo bobrok sampai sidok mulah hal-hal yo seharus,a com sidok krejokan. ²⁹ Sidok diponuh'ik ngan segelo macam ke comb'naran, kejahatan, keserakahan, kant keboncik'an; ponuh ngan iri, pembunuh'an, petengkaran, tipu muslihat, kant kedengkian; sidok nyin penggosip, ³⁰ pemitnah, pemboncik Allah, kasar, sombung, bamulut bosar, pemulah kejahatan, com taat ka urang tuo, ³¹ budu, com setia, com ado perasoan, kant kejam. ³² Kan, sekalipun sidok ngetau'ik peratoran Allah bekato bahwa urang yo ngerejokan hal-hal tokuh nyin dah seharus'a mati, sidok kan'a engkah totap ngelaku'a, tatapi ndukung urang-urang yo ngerejo jolu-jolu nyin gak'am.