¹ Dah nyint,aku ngenongant ompat malekat bediri di ompat penjuru bumi, gik nahant keompat angin bumi supayo com ado yo betiup di darat, di laut, ataupunt di pohont-pohont. ² Lalu, aku ngenongant malekat laint muncul derik tompat terbit'a matoari, kant mbeik segel derik Allah yo idup.Io bekato khant suaro yo nyarink ka keompat malekat yo dah diborik kuaso 'ntuk ngerusak bumi kant laut tadik, ³ "Nank'a ngerusak bumi, laut, ndakpunt pohon-pohon sebelom kamik selesai borik tando segel pado dahi hamba-hamba Allah kito." ⁴ Aku ngeningo jumlah sidok yo di segel se'bnyak 144.000 urank. Sidok semuo beasel derik setiop suku anak-anak Israel: ⁵ derik suku Yehuda 12.000 derik suku Ruben 12.000 derik suku Gad 12.000 ⁶ derik suku Asyer 12.000 derik suku Naftali 12.000 derik suku Manasye 12.000 ⁷ derik suku Simeon 12.000 derik suku Lewi 12.000 derik suku Isakhar 12.000 ⁸ derik suku Zebulon 12.000 derik suku Yusuf 12.000 derik suku Benyamin 12.000 yo dah dimateraikant. ⁹ Dah nyint aku ngenongant, sesungguh'a sejumloh besar ensio yo com d'pat diitunk jumlah'a,derik semuo negaro kant suku kant banksa kant bahaso, bediri di adop takhta kant di adopan Anak Domba, makai jubah putih kant dahant-dahant palem di jeri sidok; ¹⁰ kant sidok bekato khant suaro nyarink, "Keselamatant begi Allah kamik yo duduk di atas takhta, kant begi Anak Domba." ¹¹ Kant, semuo malekat yo bediri di sekelilink takhta nyint kant sekililink tuo-tuo, kant keompat makhluk nyint, sidok sujud diadopant takhta nyint kant nyombah Allah, ¹² khant bekato, "Amint!" Pujiant kant kemuliaant kant hikmat kant ucapant syukur kant kehormatant kant kuaso, kant keperkasaant begi Allah kito sampai selamo-lamo'a. Amint!" ¹³ Lalu, satu derik tuo-tuo bebicaro kant betanyok ka aku, "Sopekah sidok yo makai jubah putih tuk kan derik mone sidok d'tank?" ¹⁴ Mako, aku bekato ka io, "Duen, ikau ngetua'a."Lalu' io bekato ka aku, "Sidok adolah urank-urank yo dah keluar derik penganiayoant bosar kant dah nyuci jubah sidok kant mutihkan'a di delom derah Anak Domba. ¹⁵ Dongah nyint,sidok bediri di adopant takhta Allah kant ngelayanik Io siank kant malam di bait-A; kant Io yo duduk di atas takhta nyint 'kant tinggel di antaro sidok. ¹⁶ Sidok com 'kant lepar ndakpunt aus gik; ataupunt matoari com 'kant nyakit'ik sidok ndakpunt panas torik yo laint'a. ¹⁷ Sebab, Anak Domba yo di tongah-tongah takhta nyint 'kant nyedi Gembala sidok kant akant nuntunt sidok ke mato aik kehidupant; kant Allah akant ngapus segalo aik mato derik mato sidok.