¹ Lalu, aku ngeperatikant tengkalo Anak Domba mbukok satu derik tuju segel nyint, kant aku ngendingo sikuk derik ompat makhluk nyint bekato khant suaro yo tokuh guntur, "Ayok!" ² Mako, aku ngenongant seikuk kuda putih kant io yo duduk di atas'a ngemijab sebuah panah; kant sebuah mahkota diberikant ka io, kant io maju 'ntuk ngalalahkant kant ngemonangkant ³ Kant, tengkalo Anak Domba nyint mbukok segel yo keduok, aku ngendingo makhluk yo keduok bekato, "Ayok!" ⁴ Mako, maju'a seikuk kuda lain bewarno mirah tokuh nyalok api, kant io yo duduk di atas'a diborik kuaso 'ntuk ngambik kedamaint derik bumi sehinggo ensio 'kant salink embu'nuh, kant sebuah pedank yo besar diborikant ka io. ⁵ Kant, tengkalo Anak Domba nyint mbukok segel yo ketigo, aku ngendingo makhluk yo ketigo bekato, "Ayok!" Mako, aku ngenongant seikuk kuda itam kant io yo duduk di atas 'a ngemijab sebuah timbangant ditangant'. ⁶ Lalu, aku ngendingo tokuh ado suaro derik tongah-tongah makhluk nyint bekato, "Satu cupak gandum sedinar, kant tigo cupak jelai sedinar, tapi'a nank ngerusakkant minyak kant anggur'a!" ⁷ Kant, tengkalo Anak Domba nyint mbukok segel yo keompat, aku ngendingo suaro makhluk yo keompat bekato, "Ayok!" ⁸ Mako, aku ngenongant seikuk kuda bewarno ijau pucat kant io yo duduk di atas'a bedemo Maut kant Hades ngikuti'a. Kant kuaso diborikant ka sidok atas seperompat bumi, 'ntuk munuh khant pedank, kelaparant, ponyakit, kant binatank-binatank buas di bumi. ⁹ Tengkalo Anak Domba mbukok segel yo kelimo, aku ngenongant di beruh altar jiwo-jiwo sidok yo dah dimunuh dongah firman Allah kant dongah kesaksiaan yo dah sidok petahankant. ¹⁰ Sidok bekato kant suaro nyarink, "Berope lambet agik ya Doto yo kudus kant benar, Ikau 'kant ngenahant dirik derik ngehakim'ik kant ngembaleskant derah kamik ka sidok yo diom di bumi?" ¹¹ Kant, ka mansink-mansink jiwo nyint diborikant sebuah jubah putih kant sidok diberiktaukant bahwo sidok arus beistirahat sebontek gik, hinggo jumlah b'tor-b'tor pelayant kant saudaro-saudaro sidok yo 'kant dimunuh tokuh sidok nyedi gonap. ¹² 12 Kant, aku ngenongant tengkol Anak Domba nyint mbukok segel yo keonam, tejedilah gempa bumi yo dahsyat; matoari nyedi itam tokuh kaint karunk yo temulah derik rambut kant seluruh bulent nyedi tokuh derah. ¹³ Kant, bintank-bintank di lengit bejetuhant ke bumi tokuh pohon ara enggugurkant buah-buah'a yo mongkal saat diguncangkant oleh angint yo sangat koncank. ¹⁴ Kant, tebolah'a lengit tokuh kitab yo digulunk, kant setiop gununk kant pulau dipindahkant derik tompat'a. ¹⁵ Mako, rajo-rajo di bumi, kant pembosar, kant perwiro-perwiro, kant urank-urank kayo kant bekuaso, kant semuo budak, kant urank bebas betapuk di gua-gua kant di antaro b'tu-b'tu di pegununk'an. ¹⁶ Sidok bekato ka gununk-gununk kant b'tu-b'tu karank nyint, "Runtuh'a nimpok kami kant sembunyikant kamik derik adopant Io yo duduk di atas takhta, kant derik murka Anak Domba. ¹⁷ Sebab, ari bosar begi murka sidok dah d'tank kant sopekah yo d'pat betahan?"