¹ Lalu, sutik d'ri tujoh malekat yo mijab tujoh cawan nyin nyomak kant bebicaro ka aku, kato'a, "Kituk'am, aku akan nunjokkan ka ikau hukuman ntuk pelacur boser nyin, yo duduk di atas b'nyak aik, ² yo ngan'a rajo-rajo di bumi bezinah kant sidok yo diom di bumi dah mabuk tam anggur pezinahan'a." ³ Malekat nyin mbeik aku d;lom Roh ke padang belantaro, kant aku nongan seurang tinok duduk di atas seikuk binatang bewarno mirah yo ponuh ngan demo-demo hujat, yo mpunya'ik tujoh kepalok kant sepuloh tanduk. ⁴ Tinok nyin makai pakaian bewarno ungu kant mirah yo behiaskan omas, b'tu-b-tu permato, kant mutiaro. Io mijab sebuah cawan omas yo ponuh ngan kekejian kant kenajisan perzinahan. ⁵ Pado kening'a, tetulis suatu demo, suatu rahasio: BABEL YO BOSER, UMAK B'LO PELACUR KANT SEGELO KEKEJIAN DI BUMI." ⁶ Aku nongan tinok nyin mabuk tam d'rah urang-urang kudus kant tam d'rah saksi-saksi Yesus. Waktu aku nongan'a, aku aso heran. ⁷ Lalu, malekat bekato ka aku, "Ngope ikau heran? Aku akan ngatokan ka ikau rahasio tinok nyin kant rahasio binatang yo dinait'ik'a, yo bekepalok tujoh kant betanduk sepuloh nyin. ⁸ Binatang yo ikau tongan nyin dah ado,tapi com ado, kant akan segera keluar d'rik jurang maut nuju kebinasoan. Kant, sidok yo tinggel di bumi, yo demo'a com tecatatd'lom kitab kehidupan sejak dunio diciptokan, akan heran tengkalo nongan binatang nyin, yo dah ado, tapi com ado, kant akan muncol gik. ⁹ Hal tuk diprelukan akal kant hikmat. Tujoh kepalok nyin te tujoh gunong yo di atas'a tinok nyin dudok. ¹⁰ Tujoh kepalok nyin te tujoh rajo gam, limok diantaro'a dah j'tuk, sutik rajo mansih ado, kant laen gik bolom d'tang, tapi tengkalo io d'tang, io cak tinggel sesaat yak. ¹¹ Binatang yo dulik kolok ado, tapi tum com ado nyin, te rajo kedelapan tapi io temansuk d'lom tujoh rajo tadik, kant io nuju kebinasoan. ¹² Kesepuloh tanduk yo ikau nongan te kesepuloh rajo yo bolom nerimok pemerintahan, tapi sidok nerimok kuaso sebe'gei rajo selamo 1 jam besamo binatang nyin. ¹³ Sidok mpunya'ik tujuan yo samo, kant sidok mborikan kuaso kan wewenang sidok kepado binatang nyin. ¹⁴ Sidok akan beperang ngelawan Anak Domba, tapi Anak Domba akan ngalahkan sidok dongah Io te Doto atas segelo doto kant Rajo atas segelo rajo kant sidok yo besamo-A te yo disakau, dipileh, kant yo setia." ¹⁵ Lalu, malekat nyin bekato ka aku, "Aik yo ikau tongan, yo atas'a pelacur nyin dudok, te bangso-bangso, banyak rakyat, kaum, kant bahaso. ¹⁶ Kesepuloh tanduk nyin yo ikau tongan kant binatang nyin akan mboncik si pelacur. Sidok akan mulah'a telantar kant kelanjang, sreto melahap d'gin'a kant mbeker io ngan api. ¹⁷ Dongah, Allah dah naruh hal nyin di d'lom ati sidok ntuk ncapai tujuan-A ngan setuju ntuk mborikkan kekuasoaan sidok kepado binatang nyin hinggo firman Allah digonap'ik. ¹⁸ Tinok yo ikau tongan nyin te ota boser yo merintah atas rajo-rajo di bumi."