¹ Aku ngenongan tando lain di lengit, yo bosar kant ajaib, tujoh malakat yo mbeik tujoh bencano, yaknyin tujoh bencano yo te'akhir, dongah d'lom ketujoh bencano nyin'ak murka Allah diakhir'ik. ² Lalu, aku ngenongan sesuatu tokuh lautan kaco becampur api kant sidok yo dah ngalahkan binatang nyin, patung'a kant angko demo'a, bediri di tepi lautan kaco nyin ngan mijab kecapi Allah. ³ Sidok nyanyikan nyanyian Musa, hamba Allah, kant nyanyian Anak Domba: "Bosar kant ajaib semuo pekrejoan Duen, yo Doto, Allah Yo Mahakuaso. Adil kant benar semuo j'len Duen, yo Rajo segalo bangsa. ⁴ Sopekah yo com golak ka Duen , yo Doto kant com muliokan demo Duen? Dongah, engkah Duen'ak yo kudus. semuo bangsa akan d'tang kant nyombah di adopan Duen dongah keadilan Duen dah di nyatokan. ⁵ Abis semuo hal tuk, aku ngenongan Bait Allah, kemah kesaksian Allah di surgo , tebukok. ⁶ Tujoh malekat yo mbeik tujoh bencano nyin ke luar d'rik Bait Allah, bepakaian lenan yo putih kan bekilau, kant makai selempang omas di dada sidok. ⁷ Sutik d'rik keompat makhluk mborikkan ka ketujoh malekat nyin tujoh cawan omas, ponuh murka Allah, yo idup selomo-lamo'a. ⁸ Bait Allah diponuh'ik ngan ansap d'rik kemulioan Allah kant d'rik kuaso-A; kant com seurangpun d'pat mansuk Bait Allah sebolom tujoh bencano d'rik ketujoh malekat nyin be'akhir.