¹ B'lo pengumpol pajak kant urank bedosa nyomak kepado Yesus ntuk ningokan-A. ² Lelu urank-urank Farisi kant ahli-ahli Taurat mulai menggerutu, "Urank tuk nerimok urank-urank bedosa kant bahkan makan besamo sidok." ³ Lelu Yesus ngatokan perumpamaan tuk kepado sidok, kato Yesus, ⁴ "Sopekah di antaro ikau yo mun ado 100 ikuk domba, kant losi sikuk, com akan ninggelkan 99 ikuk lain'a di padang belantara? Kan'ak io akan pogi ngogok yo tesosat nyin sampai io nomukan'a? ⁵ Kant tengkalo nomukan'a, io akan ngomak domba nyin di atas bo'u'a kant sangat bersukocito. ⁶ Setibo'a di umah, io ndak pogi nomu'ik kawan-kawan kant tetanggok-tetanggok'a sreto bekato kepado sidok, "Be'ayahrami'ak besamo aku dongah aku dah nomukan dombaku yo losi.' ⁷ Aku bekato kepado kau, piom'ak akan ado sukocito yo lobih bosar di surga atas 1 urank bedosa yo betobet d'rik pado atas 99 urank bujor yo com butuh petobetan. ⁸ Atau tinok mone yo ado sepuluh keping duit perak, mun io losi satu keping di antaro'a, com nyalokkan pelito kan nyapu rumah'a, lalu ngogok keping duit nyin ngan ati-ati sampai io nomukan'a? ⁹ Kant, opebilo io nomukan'a, io nyakau kawan-kawan kant tetanggok'a kant bekato kepado sidok, 'Be'ayahrami'ak besamo aku dongah aku dah nomu sekeping yo losi nyin.' ¹⁰ Aku bekato kepado kau, piom gam ado sukocito di antaro b'lo malaikat Allah dongah sutik urank bedosa yo betobet." ¹¹ Lelu Yesus bekato, "Ado seurank yo ado duok anak laki-laki. ¹² Anak yo bungsu bekato kepado apak'a, 'Apak, borikkan kepado aku bagian harto yo j'di wak aku.' Mako, apak'a pun mb'gi kekayoan'a kepado keduok anak'a. ¹³ Com lambet dah nyin, anak bungsu nyin ngumpol semuo wak io, lalu pogi ke negri yo jeuh kant di nun io ngabur-ngaburkan wak io ngan idup befoya-foya. ¹⁴ Tengkalo io dah ngabiskan semuo'a, tejedi'ak bencana kelaparan yo hebat di negri nyin, kant io pun mulai bekekurangan. ¹⁵ J'di pogi'akh io kant bekrejo pado seurank penduduk negri nyin, yo nyuruh'a ke lakau ntuk morik makan b'bi-b'bi'a. ¹⁶ Io ndak ngisik porut'a pakai buah karob yo dimakan b'bi-b'bi nyin, tapi com ado seurank pun yo morik kepado'a. ¹⁷ Tengkalo anak bungsu nyin s'dar, io bekato, 'Betapo b'nyak'a pekrejo-pekrejo apakku yo mpunya'ik makanan yo belimpah-limpah, tapi aku di tuk hampir mati kelaparan. ¹⁸ Aku akan bengkit kant pulank kepado apak ku. Aku akan bekato kepado'a: Apak, aku dah bedosa teadop surga kant di adopan ikau. ¹⁹ Aku com gik pantas disobut anak ikau, j'dikan'ak aku sebegei salah seurank pekrejo ikau.' ²⁰ Mako, bediri'ak io kant pogi kepado apak'a. Akan tetapi, tengkalo anak nyin gik jeuh, apak'a nongan io kant ponuh belas kasihan, apak'a nyin keragok lalu moluk kant ncium'a. ²¹ Lelu, anak nyin bekato kepado apak'a, 'Apak, aku dah bedosa teadop surga kant di adopan ikau. Aku com gik pantas di sobut anak ikau.' ²² Tapi, apak'a nyin bekato kepado pelayan-pelayan'a, 'Copat! Beik'ak jubah yo te'b'et lalu pakaikan'ak kepado'a. Pakaikan gam cincin di j'ri tangan'a kant sendal di kaki'a. ²³ Beik'ak anak sapi yo gomok kant sembolih'ak. Ayok kito makan kant begembiro, ²⁴ dongah anakku tuk dah mati, tapi tum idup gim! Io dah losi, tapi tum dah di tomukan!' Mako sidok pun mulai begembiro." ²⁵ Waktu nyin, si ankj sulung gik ado di lakau, kant tengkalo io dah be'ado di somak rumah'a, io ningo soro musik kant tari-tarian. ²⁶ J,di io nyakau salah sutik d'rik hamba-hamba nyin kant betanyok tentang ope yo gik te'j'di. ²⁷ Jawab pelayan nyin kepado'a, 'Adik ikau dah d'tang, kant apak ikau nyemboleh anak sapi yo gomok, dongah io pulank ngan selamat.' ²⁸ Tapi, anak sulung nyin godik kant bolek mansuk sehingga apak'a keluar kant mbujuk'a. ²⁹ Akan tetapi, io bekato kepado apak'a, 'Betaun-taun aku dah be'krejo melayan'ik ikau kant com kolok ngabaikan perintah ikau, tapi ikau bahkan com kolok mborik aku seikuk kambing mudok supayo aku d'pat bepesta ngan kawan-kawanku. ³⁰ Tapi, tengkalo anak ikau nyin pulang setelah ngabiskan harta ikau ngan pelacur-pelacur, apak nyemboleh sapi yo gomok ntuk'a.' ³¹ Mako, apak'a njawab kepado'a, 'Anakku, ikau selalu besamo aku, kant semuo kepunyaan aku te wak ikau. ³² Tapi. ari tuk kito cak bepesta kant besukocito sebab adik kau tuk dah mati, tetapi tum io idup gim; io dah losi, tetapi tum dah di tomukan."'