¹ Saudero-sauderoku, nang ado b'nyak di antaro kau nj'di guru dongah ikau tau bahwa kito yo ngajer akan dihakim'ik ngan ukuran yo lobih borat. ² Kito semuo besalah d'lom b'nyak hal. Mun ado urank yo com kolok besalah d'lom pekatoan'a, io te urank yo sempurna, yo mampu gam ngendalikan seluruh tubuh. ³ Kito masang kekang pado mulut kuda agar io naat'ik kito, kant kito pun ngendalikan seluruh tubuh kuda. ⁴ Tongan gam kapal-kapal, meskipun sidok sangat bosar kant digorakkan tam angin yo kuat, kapal nyin dikendalikan tam kemudi yo sangat kocik, kan akan pogi ke mone pun juru mudi nghendak'ik. ⁵ Piok gam, lidah te bagian yo kocik d'rik tubuh, tetapi lidah d'pat nyombungkan hal-hal bosar. Tongan'ak betapa luas'a utan yo tebakar tam api yo kocik. ⁶ Lidah nyin tokuh api, sebuah dunio kejahatan, yo ditempatkan di antaro bagian-bagian tubuh kant yo d'pat menajiskan seluruh tubuh. Io mbakar seluruh arah idup kito sementaro io surank dibakar tam api neraka. ⁷ Sebab, semuo jenis binatang liar kant burung, reptil kant binatang yo idup di laut nyin jinak kant dah dijinakkan tam ensio, ⁸ tetapi com seurank pun d'pat njinakkan lidah. Lidah te yo jahat yo com d'pat tenang, ponuh ngan racun yo mematikan. ⁹ Ngan lidah kito mberkat'ik Doto kan Apak kito, tapi ngan nyin pun kito ngutuk urank, yo diciptakan serupo ngan Allah. ¹⁰ D'ri mulut yo samo keluar pujian kant kutukan. Saudero-sauderoku, seharus'a com'ak tokuh nyin. ¹¹ Opekah sutik mato aik d'pat ngeluarkan aik manis kant aik pait pado waktu yo besamoan? ¹² Saudero-sauderoku, d'patkah b'tang ara ngaselkan buah zaitun; atau b'tang anggur ngasilkan buah ara? Piok gam, mato aik asin com d'pat ngaselkan aik yo segar. ¹³ Sopekah diantaro ikau yo behikmah kant bepengertian? Ronak pom ngan sikap'a yo b'et, io nunjukkan pebuatan-pebuatan'a d'lom kelembutan kant hikmat. ¹⁴ Tapi, mun ikau ado iri ati yo ponuh kepahitan kant ambisi yo egois di d'lom ati kau, nang'ak bangga kant nang bedusta ngelawan kebenaran. ¹⁵ Hikmat tokuh nyin com turun d'rik atas, tetapi d'rik dunio, com rohani, kant jahat. ¹⁶ Mun ado iri ati kant ambisi yo egois, dinun ado kekacauan kant segalo macam prbuatan jahat. ¹⁷ Hikmat yo d'tang d'rik atas, petamo-tamo te murni, lalu suko damai, lomah lembut, tebukok, ponuh belas kasihan kant buah-buah yo b'et, com mbedo-bedokan, kant com munafik. ¹⁸ Buah kebenaran ditaburkan d'lom damai tam b'lo pendamai.