¹ Mako, kato Agripa kepado Paulus, " Ikau diizinkan bebicaro ntuk mela dirik." Lalu, Paulus merentangkan jeri'a kan ngenyatokan pembelaan'a. ² " Sehubungan ngan semuo hal yo di tuduhkan ka aku tam urank-urank Yahudi, aku nganggop dirik aku beruntug, Raja Agripa, dongah aku akan nyatokan pembelakanku di adop ikau ari tuk, ³ khusus'a dongah ikau tuk urank yo benar-benar tau semuo kebiasoan kan pesoalan di antaro urank-urank Yahudi. Dongah nyin, aku muhun ka ikau ntuk ningokan aku ngan saber. ⁴ Semuo urank Yahudi tau caro idupku semenjak maso mudokku, yo sejak awal ngabiskan idupku di tongah-tongah bangso ku surank kan di Yerusalem. ⁵ Dongah dah lambet sidok tau tentank aku, mun sidok endak, sidok depat besaksi bahwo aku idup sesuai khan ajaran kelompok yo paling koras derik agama kito, aku idup sesuai urank Farisi. ⁶ Kan saat tuk, aku bediri di tuk ntuk diadil'ik dongah pengaropan aku akan jenji yo di jenjikan Allah kepado inek moyang kito. ⁷ Jenji tuk'am yo diaropkan tam keduok belas suku bangso kito d'pat tecapai, sementaro sidok nyomah Allah ngan sunguh-sunguh siang kan malom. Kan, dongah pengaropan tuk'am aku dituduh tam urank-urank Yahudi, ya Rajo. ⁸ Ngopei kau anggap mustahil bahwo Allah mbengkitkan urank mati? ⁹ Dongah nyin'am, aku surank ngiro bahwo aku arus ngulah b'nyak hal yo nentang demo Yesus d'rik Nazaret. ¹⁰ Kan, nyim'am yo aku ulah di Yerusalem. Aku kan'a engkah mansukkan urank-urank kudus ke d'lom penyero, udah nerimok wewenang d'rik imam-imam kepalok, tapi tengkalo sidok di ukum mati gam, aku nyetujuik'a. ¹¹ Lalu, aku raget ngukum sidok di sinagoge-sinagoge kan beusaha sidok ntuk nghujat. Kan, ngan aso godik yo besar teadop sidok, aku nganiayo sidok, bahkan sampe ke kota-kota asing." ¹² "Ntuk maksud nyin gam, aku gik tongah pej'lenan ke Damsyik, ngan wewenang kan penugasan d'rik imam-imam kepalok. ¹³ Saat tongah ari, ya Rajo, di tongah pej'lenan aku, aku nongan sutik cahayo d'rik langit, lobih torang gik d'rik matoari, yo besiner di sekeliling aku kan urank-urank yo bej'len besamo aku. ¹⁴ Lalu, tengkalo kami semuo tekerobah di tanah, aku ningo ado suaro bekato ka aku d'lom bahasa Ibrani, 'Saulus, Saulus, ngopei ikau nganiayo Aku? Sulit b'gi kau ntuk nendang galah rangsang.' ¹⁵ Lalu aku betanyok, 'Sopeimo Duen, Doto?' Lalu Doto nyawob, 'Aku Yesus, yo tongah kau aniayo. ¹⁶ Tapi, bengkit kan bediri'am ngan kaki kau. Dongah, Aku dah nampakkan dirik ka ikau ntuk tujuan tuk, yonyin notapkan kau sebegi seurank pelayan kan saksi, com engkah ntuk hal-hal yo dah ikau tongan, tapi gam ntuk hal-hal yo akan Aku tunyukkan ka kau gam. ¹⁷ Aku akan nyelamatkan kau d'rik bangso kau tuk kan d'rik bangso-bangso lain, yo kepado sidok aku ngutus kau, ¹⁸ ntuk mukok mato sidok sehinggo sidok bebelik d'rik potank kepado torank kan d'rik kuaso Iblis kepado Allah supayo sidok nerimok pengampunan atas dosa-dosa sereto nerimok b'gian di antaro urank-urank yo dah dikuduskan tam iman di d'lom Aku.'" ¹⁹ "Mako, Rajo Agripa, aku com kalok com taat teadop penampakan surgawi nyin, ²⁰ tapi, petamo-tamo, aku mberitokan'a ka sidok yo ado di Damsyik, lalu di Yerusalem kan di seluruh wilayah Yudea, ka bangso-bangso lain gam, bahwo sidok arus betobet ka Allah, ngan ngelakukan pempulah-pempulahan yo sesuai ngan petobetan sidok. ²¹ Nyin'am sebab'a, urank-urank Yahudi nangkop aku di Bait Allah kan beusaho munuh aku. ²² Sampe ari tuk, aku dah nerimok penulungan d'rik Allah sehinggo aku bediri di tuk ntuk besaksi, b'et kepado urank-urank kocit ndakpun ka urank-urank besar ngan com ngatokan hal-hal lain, kecuali pei yo di katokan tam b'lo nabi kan Musa tentang yo akan tejedi, ²³ bahwo Kristus arus menderito kan bahwo, ngan alasan njedi yo petamo bengkit d'rik antaro urank mati, Io akan memberitokan torang, b'et ka urank-urank Yahudi ndakpun ke bangso-bangso lain." ²⁴ Sementaro Paulus gik nyampaikan hal-hal d'lom pembelaan'a, Festus bekato kan suaro nyarink, '' Paulus, ikau dah gilo! Pengetahuan kau yo sangat b'nyak nyin ngulah kau com waras." ²⁵ Tapi, Paulus nyawob, " Yo Mulio Festus, aku com gilo pei, tapi aku nyampaikan kebenaran kan kato-kato yo mansuk akal. ²⁶ Dongah, Rajo ngetahuik hal-hal tuk kan ka io gam aku bekato ngan bereni. Dongah, aku yakin bahwo com mado sutik pun d'rik hal-hal tuk yo lolos d'rik peratian'a dongah tuk com tej'di di tompat yo tepencil. ²⁷ Rajo Agripa, peikah ikau pecayok ka b'lo nabi? Aku tau ikau pecayok." ²⁸ Rajo Agripa bekato ka Paulus, " D'lom waktu yo singkat, ikau dah ngeyakinkan aku ntuk nyedi urank Kristen." ²⁹ Lalu, jawob Paulus, " Aku muhun ke Allah supayo copat atau lambet, com engkah ikau, tapi semuo urank gam yo ningokan aku ari tuk, d'pat nyedi tokuh aku, kecuali rante-rante tuk." ³⁰ Lalu, rajo bediri. Piok gam gubernur, Bernike, kan semuo urank yo duduk besamo sidok. ³¹ Lalu, sementaro sidok ninggelkan ruangan nyin, sidok becakap sutik samo lain'a, " Urank tuk com ngulah pei pun yo pantas dibendingkan ngan ukuman mati atau penyero." ³² Mako, Agripa becakap ke Festus, " Urank tuk dah d'pat dibebaskan mun io com nait banding ka Kaisar."