¹ Petamo-tamo, aku nasihat ikau ntuk ngenaitkant pemuhunan, doa, doa syafaat, kant ngucap syukur begi semuo urank, ² begi rajo-rajo, kant semuo urank yo duduk di pemerintah supayo kito d'pat ngejelent'ik idop yo tenank kant damai d'lom segelo kesalehant kant kehormatant. ³ Hal tuk b'et kant bekenant di adopant Allah, Juru Selamat kito, ⁴ yo megendaki semuo urank diselamatkant kant sampai kepado pengetuaant kant keb'narant. ⁵ Dongah, engkah ado satu Allah kant satu perantaro antaro Allah kant ensio, yonyin ensio Yesus Kristus, ⁶ Yo dah morikant dirik-A surank sebegei tobusant begi semuo urank. Kesaksiant tuk dinyatokant pado waktu yo ditetapkant-A. ⁷ Ntuk nyint'ak, aku ditetapkant sebegei penghotbah kant rasul- aku bekato b'nar, aku com ngelakar pei- kant sebegei guru dlom imant kant keb'narant begi bangso-bangso leint. ⁸ Dongah nyint, aku ndak leleki di segelo tempat bedoa sambel ngangkat jeri'a yo kudus tanpa godik kant petengkarant. ⁹ Piok gak, aku ndak tinok nyint bepakaiant senunuh, ponuh kesopanant kant pengendaliant dirik. Pehiasant'a nank'ak rambut yo di kepank-kepank, omas, mutiara, atau pekaiant mahal, ¹⁰ tapi'a pebuetant b'et tokuh tinok yo saleh. ¹¹ Seurank tinok, arus'a belejer ntuk tenank kant d'lom segelo ketaatan. ¹² Tapi'a aku com ngijinkan batinok ngajer atau mrentah lalaki. Tapi'a, batinok arus t'tap tenank ¹³ dongah Adam diciptokan petamo, abis tum beruk Hawa, ¹⁴ kant kan'ak Adam yo ditipu tapi, tinok yo ditipu kant jetuk dlom pelangger'an. ¹⁵ Tapi'a batinok akan diselamatkan ngelaluik kalahiran anak munt sidok terus idop dlom iman, kasih, kant kekudusan ngan pegandalian dirik.