¹ Ba sawaktu Anak Domba koa muka' materai nang ka tujuh, lalu sunyi'klah ka saruga, kira-kira satangah jam lamae. ² Tarus aku nee'k tujuh malaekat nang badiri kaadapatn Jubata, lalu tujuh sangkakala dimareatn ka kabatnne koa. ³ Tarus ataknglah seko' malaekat lain, ia badiri samak mesbah ba nyingi'ik sabuah padupaan amas. Ka ia dimareatn manyak kamayan untu' ia sembahatn ba doa samua urakng kudus ka atas mesbah amas ka adapatn tahta koa. ⁴ Lalu naiklah asap kamayan ba doa urakng-urakng kudus dari kokot malaekat koa ka adapatn Jubata. ⁵ Tarus malaekat koa naap padupaan koa, nginsi'ik ia ba api dari mesbah, ba nabakatn ia ka bumi. Lalu maatoklah bunyi guntur, ba elak ba gempa bumi. ⁶ Ba tujuh malaekat nang nyingii'k tujuh sangkakala koa basiap-siap mao'k nyiup sangkakala. ⁷ Tarus malaekat nang doho'k nyiup sangkakala lalu jajilah ujatn es, ba api, bacampur darah; samuae koa dinabakatn ka bumi; lalu tabakarlah sapartalu dari bumi ba sapartalu dari puhutn-puhutn kayu lalu anguslah samua na' rumput-rumput ijo. ⁸ Tarus malaekat nang kadua nyiup sangkakalae lalu aya ada tolen bukit nang ayak, nang nyala di api, dinabakatn ka laot. Ba sapartalu dari laot koa jaji darah, ⁹ lalu matilah sapartalu dari sagala laok nang banyawa ka daapm laot, tarus binasalah sapartalu dari samua kapal. ¹⁰ Tarus malaekat nang katalu nyiup sangkalae lalu jantu'klah dari angit sege'k bintakng aya'k, barapi aya obor, lalu napo'k sapartalu dari sungai-sungai ba mata ai'k. ¹¹ Dama bintakng koa Apsintus, Ba sapartalu dari samua ai'k jaji apsintus, ba manyak urakng mati di ai'k koa, barang jaji pahit. ¹² Tarus malaekat nang kaampat nyiup sangkakalae ba tapangkonglah sapartalu dari mataari ba sapartalu dari buatn ba sapartalu dari bintakng-bintakng, sampe sapartalu dari ia koa jaji galap ba sapartalu dari siakng ari ina'k tarakng ba aya koa ugak maam ari. ¹³ Tarus aku nee'k ba nangar seko'k burukng bangke tarabakng ka tangah angit tarus bakata nyarekng: "Cilaka, cilaka, cilakalah dangan nang diapm ka atas bumi barang di bunyi sangkakala batalu malaekat lain, nang masih mao'k nyiup sangkakalae.