¹ Ka sote' ari sarombongan urakng Farisi ba sangahe urakng ahli Taurat dari Yerusalem atakng namui'k Yesus. ² Kabatnne nee'k, kade'k sangahe eko'k murit-Te makatn ba kokot nang kotor, yakoa ba kokot nang ina'k disasah. ³ Barang urakng-urakng Farisi aya urakng-urakng Yahudi lainne ina'k makatn kade'k ina'k nyasah kokot doho'k, barang kabatnne bapegang ka adat istiadat ene'k moyangnge; ⁴ ba kade' puakng dari pasar kabatnne uga'k ina'k akan makatn kade' ina'k marasehatn diri'k e doho'k. Manyak warisan lain agi'k nang kabatnne megang, umpamae hal nyasah cawan, tapayatn ba pakakas-pakakas timaga. ⁵ Barang koa urakng-urakng Farisi ba ahli-ahli Taurat koa batanya' ka-Ia: "Ngahe murit-murit-Nyu ina'k idup nuruti'k adat-istiadat ene'k moyang diri'k, tapi makatn ba kokot nang kotor?" ⁶ Ja Yesus ka kabatnne: "Banarlah nubuat Yesaya parihal kao, hei urakng-urakng munafik! Barang ada tatulis: Bangsa nyian muliaatn Aku ba bebere, padahal atie jauh dari Aku. ⁷ Paracuma kabatnne koa baibadah ka Aku, sedangkan ajaratn nang kabatnne ngajaratn koa parintah manusia. ⁸ Parintah Jubata kao ngabaiatn untu' bapegang ka adat istiadat manusia." ⁹ Yesus bakata uga'k' ka kabatnne: "Sidi pane kao ngasampingan parentah Jubata, biar kao bisa mihara adat-istiadatnyu babaro. ¹⁰ Barang Musa udah bakata: Hormati'klah apa'k nyu ba uwe'knyu! ba: Sae nang ngutuk apa'k e ge'k uwe'k e harus mati. ¹¹ Tapi kao bakata: Kade'k seko'k urakng bakata ka apa'k e ge'k ka uwe'k e: Ahe nang ada ka aku, nang bisa digunaatn untu' mihara kao, udah digunaan untu' korban - yakoa pasambahan ka Jubata-, ¹² tarus kao ina'k agik babuat sesuatu pun untu' apa'k e ge'k uwe'k e. ¹³ Aya koalah pakataatn Jubata kao minjawat ina'k balaku demi adat istiadat nang kao nuruti'k koa. Ba manya'k hal lain aya nang koa nang dah udah kao minjawat. ¹⁴ Tarus Yesus nyaru'k agi'k urakng manya'k lalu bakata ka kabatnne: "Kita'k samua, dangaratnlah Aku, ba ingatlah. ¹⁵ Ahe pun nang dari uar, nang taama'k ka daapm, ina'k bisa najisatn urakng, tapi ahe nang kaluar dari urakng koa, koalah nang najisatn." ¹⁶ [Saepun nang batarenyekng untu' nangar haruslah ia nangar!] ¹⁷ Apas Ia taama'k ka sabuah rumah untu' nyingkir dari urakng manya'k, murit-murit-Te batanya'k ka Ia parihal parumpamaan koa. ¹⁸ Lalu Ia nyahuti'k: "Ahe ge'k kao ina'k ugak bisa paham? Ina'k nauan me kao kade'k sagala sasuatu dari luar nang taama'k ka daapm urakng ina'k bisa najisatn ia, ¹⁹ barang buke' taama'k ka daapm ati tapi ka daapm parutte, tarus dibuakng ka jamban?" ba ayakoalah Ia matakatn samua pamakanan halal. ²⁰ Jakata-E agi'k: "Ahe nang kaluar dari urakng, koalah nang najisatn ia, ²¹ barang dari daapm, dari ati urakng, timu sagala pikiran jahat, pacabulan, pancurian, pambunuhan, ²² pajinahan, kasarakahatn, kajahatan, kalicikatn, hawa napsu, dangki, hujat, kasombongan, kababalatn. ²³ Samua hal-hal jahat nyian timu dari daapm ba najisatn urakng." ²⁴ Tarus Yesus barangkat dari koa lalu ampus ka daerah Tirus. Ia taama'k ka sabuah rumah ba Ia bai' kade' ada urakng nang nahui'k Ia atakng, tapi kaatangan-Ne ina'k dapat dirahasiaatn. ²⁵ Malah seko'k nang bini, nang anakke nang bini karasukan roh jahat, langsung nangar Ia, tarus atakng tasungkur kaadapatn paha-E. ²⁶ Nang bini koa urakng Yunani dari bangsa Siro-Fenisia. Ia mohon ka Yesus untu' ngoser setan koa dari anakke. ²⁷ Tarus Yesus bakata ka ia: "Biarlah kamuda'-kamuda' kanyang doho'k, barang ina'k patut naap roti nang dinyiapatn untu' kamuda'-kamuda' ba nabakatn ia ka asu'k." ²⁸ Tapi nang bini koa nyahut: "Batol, Tuhan. Tapi asu'k nang ka babah meja uga'k makatn remah-remah nang dinyantuatn dikamuda'-kamuda'." ²⁹ Lalu Yesus bakata ka nang bini koa: "Barang kata-katanyu koa, puaknglah angkitn barang setan koa udah kaluar dari anaknyu." ³⁰ Nang bini koa puakng ka rumahhe, tarus ia napati'k anakke koa gurikng ka tampat tidur, sedang setan koa udah kaluar. ³¹ Apas koa Yesus ningaatn daerah Tirus uga'k tarus ngalalui'k Sidon ampus ka danau Galilea katangah-tangah daerah Dekapolis. ³² Dikoa urakng ngicakng ka Ia seko' urakng nang banga ba gagap tarus mohon ka Ia, biar Ia narohatn kokot-Te ka atas urakng koa. ³³ Apas Yesus misahatn ia dari urakng manyak, Yesus ba ia kahe, Ia namaan jari-E ka tarenyekng urakng koa, tarus Ia ngaujah ba nyangkam jiah urakng koa. ³⁴ Apas koa sambi Ia ningkadah ka angit Yesus narik sengat-E lalu bakata ka ia: "Efata!", ratie: Tabuka'klah! ³⁵ Lalu tabuka'klah tarenyekng urakng koa ba pas koa ugak talapaslah pangikat jiahhe, tarus ia bakata-kata jalas. ³⁶ Yesus bapasatn ka urakng-urakng nang ada dikoa biar ame nyuritaatn ka sae-saepun ugak. Tapi makin Ia baiatn dangan koa, makin luas dangan koa bacurita. ³⁷ Dangan takjup ba tacangang lalu bakata: "Ia nyajiatn sagala-galae baik, nang banga Ia minjawat jaji nangar, nang awa'k Ia minjawat jaji bisa bakata-kata.