¹ Apas koa Yesus barangkat dari koa tarus sampe ka tampat asal-E, sedang mirit-murit-Te nunaan Ia. ² Sawaktu ari Sabat Ia mulai'k ngajar ka rumah sambayang lalu jemaat nang rami kaheranan sawaktu nangar Ia tarus dangan koa bakata: "Dari mae Ia namu samua koa? Pangatahuan ahe pula'k nang dimareatn ka Ia? ba mujisat-mujisat nang yakoa, ayamae bisa Ia minjawat ba kokot-Te? ³ Buke'k me nya Ia nyian tukang kayu, anak Maria, adi'k baradi'k Yakobus, Yoses, Yudas ba Simon? Ba buke'k me adi'k baradi'k-E nang bini ada ba diri'k dian? Tarus dangan koa kecewa ba nolak Ia. ⁴ Tarus Yesus bakata ka dangan koa: "Seko'k nabi dihormati'k dimae-mae kacuali katampat asal e babaro, ka antara kaum kaluargae, ba ka rumahhe." ⁵ Ia ina'k dapat ngadaatn sote'k mujisat pun dikoa, kacuali nyamuhan sangahe eko'k urakng sakit ba narohatn kokot-Te ka atas kabatnne. ⁶ Ia marasa heran ka atas ina'k picayaatn dangan koa. Tarus Yesus bajaatn bakuliling dari desa ka desa sambi ngajar. ⁷ Ia nyaru'k ka dua balas murit koa ba ngutus kabatnne badua-dua. Ia mare'k kuasa atas roh-roh jahat, ⁸ ba Ia bapasatn ka kabatnne supaya ame ngicakng ahe-ahe daapm pajaanan kabatnne, kacuali tungkat, roti pun ame, bahata pun ame, duit ka daapm ikat pinggang pun ame, ⁹ muih make alas paha, tapi ame make dua baju. ¹⁰ Tarus jakata-E ka kabatnne: "Kade'k ka sote'k tampat kao udah dinarima'k daapm sote'k rumah, diapmlah dikoa sampe kao barangkat dari tampat koa. ¹¹ Ba kade'k ada sete'k tampat nang bai'k narima'k kao ba kade'k dangan koa bai'k nangaratn kao, kaluarlah dari koa ba kibasatnlah dabu nang ka pahanyu untu' jaji paringatan ba dangan koa. ¹² Tarus ampuslah kabatnne maritaatn kade'k urakng harus batobat, ¹³ ba kabatnne manyak ngoser setan, ba noesi'k manya'k urakng sakit ba binyak ba nyamuhan kabatnne. ¹⁴ Raja Herodes uga'k nangar parihal Yesus, barang dama-E udah takanal ba urakng ngataatn: "Yohanes Pamaptis udah bangkit dari antara urakng mati ba koalah jajie kuasa-kuasa koa bakaraja ka daapm Ia" Nang lain ngataatn: "Ia koa Elia!" ¹⁵ Nang lain ngataatn: "Ia koa nabi sama aya tolen nabi-nabi nang doho'k dee." ¹⁶ Waktu Herodes nangar parihal koa, ia bakata: "Buke'k, ia koa Yohanes nang udah ku natak kapalae, ba nang udah bangkit agi'k." ¹⁷ Barang memang Herodeslah nang nyuruh urakng nangkap Yohanes ba ngarante ia ka pinjara parihal peristiwa Herodias, bini Filipus saudara e, barang Herodes udah naap ia jaji bini e. ¹⁸ Barang Yohanes suah nagor Herodes: "Ina'k sah kao naap bini saudaranyu!" ¹⁹ Barang koalah Herodias dandam ka Yohanes ba bamaksut untu' munuh ia, tapi ina'k bisa, ²⁰ barang Herodes tangu ka Yohanes barang ia nauan, kade'k Yohanes koa urakng nang banar ba suci, jaji ia ngalindungi'k ia. Tapi kade' ia nangaratn Yohanes, ati e sau taombang-ambing, tapi ia marasa senang ugak nangaratn ia. ²¹ Ahire sampe uga'k kasempatan nang baik untu' Herodias, sawaktu Herodes ka ari ulang tahun ne minjawat perjamuan untu' urakng-urakng aya'k, perwira-perwira e ba urakng-urakng terkemuka ka Galilea. ²² Waktu koa anak nang bini Herodias muok tarus nari, ia minjawat ati Herodes senang ba tamu-tamu e. Raja bakata ka nang dara koa: "Minta dari aku ahe maan nang kao mao'an, aku akan mareatn ka kao!", ²³ tarus ba sumpah ka ia: "Ahe maan nang kao minta' akan ku bareatn ka kao sakaipun satangah dari kerajaanku!" ²⁴ Kamuda'k koa ampus batanya'k ka uwe'k e: "Ahe nang harus ku minta'k?" Ja uwek'e: "Kapala Yohanes Pamaptis!" ²⁵ Tarus bijak-bijaklah ia ampus ka raja ba minta'k: "Aku mao'k, supaya angkitn ugak kao bareatn ka aku kapala Yohanes Pamaptis ka sabuah talam!" ²⁶ Lalu sedihlah sidi ati raja, tapi barang di sumpahhe ba barang tamu e ia bai'k nolak ia. ²⁷ Raja langsung bijak nyuruh seko'k pangawale marintahatn untu' naap kapala Yohanes ka pinjara. ²⁸ Ia ngicakng kapala koa ka sabuah talam ba mareatn ia ka nangdara koa lalu nangdara koa mareatn ka uwe'k e. ²⁹ Sawaktu murit-murit Yohanes nangar parihal koa kabatnne atakng ba naap bangke e, tarus nguringan ia ka k daapm kuburan. ³⁰ Apas rasul-rasul koa muakng bakomo'k ba Yesus ba mare'k nauan samua nang kabatnne ngarajaan ba ngajaratn. ³¹ Lalu Ia bakata ka kabatnne: "Ije'klah ka tampat nang sunyi'k, biar diri'k maan, ba istirahatlah sabantar!" Barang memang manyak sidi urakng nang atakng ba nang dari, sampe makatn pun kabatnne ina'k sampat. ³² Tarus barangkatlah kabatnne untu' ngasingkan diri'k ba parahu ka tampat nang sunyi'k. ³³ Tapi sawaktu kabatnne barangkat, manyak urakng nee'k kabatnne ba nauan tujuan ne. Naap maraga darat bijaklah baatangan urakng dari samua kota'k ka tampat koa sampe noho'ik kabatnne. ³⁴ Sawaktu Yesus mandarat, Ia nee'k urakng daapm jumbalah nang manyak, tarus tagaraklah ati-E kasihatn ka dangan koa, barang kabatnne koa aya tolen domba nang ina'k ba gembala. Tarus mulai'lah Ia ngajaratn manyak hal ka kabatnne. ³⁵ Sawaktu ari udah mulai' maam, ataknglah murit-murit-Te ka Ia tarus bakata: "Tampat nyian sunyi'k ba ari udah mulai' maam. ³⁶ Suruhlah kabatnne dari, biar kabatnne bisa mali pamakanan ka desa-desa ba ka kampokng-kampokng sakitar nyia." ³⁷ Tapi sahut-Te: "Kao harus mare'k kabatnne koa makatn!" ja kabatnne ka Ia: "Jadi harus me kami mali roti nang saraga dua ratus dinar untu' mare kabatnne makatn?" ³⁸ Tapi Ia bakata ka kabatnne: "Sangahe manyak roti nang ada ka kao? Cobalah pariksa!" Apas udah mariksa ia kabatnne bakata: "Lima roti ba dua ikatn." ³⁹ Tarus Ia nyuruh urakng-urakng koa, biar samua duduk bakalompok-kalompok ka atas rumput ijo. ⁴⁰ Tarus duduklah kabatnne koa bakalompok-kalompok ada nang saratus, ada nang lima puluh urakng. ⁴¹ Ba apas Ia naap lima roti ba dua ikatn koa, Ia ningkadah ka angit ba ngucapatn barakat, tarus macah-macahatn roti koa ba mareatn ka murit-murit-Te, biar dibagi-bagiatn ka urakng-urakng koa; yakoa ugak kadua ikatn koa Ia magi-magiatn ka dangan samua. ⁴² Dangan koa samua makatn sampe kanyang. ⁴³ Apas urakng ngomoan potongan-potongan roti dua balas baku bainsi'k, salain dari pada sisa'-sisa' ikatn. ⁴⁴ Nang makatn roti koa ada lima ribu urakng. ⁴⁵ Apas koa Yesus langsung marintahatn murit-murit-Te naik ka parahu lalu barangkat labih doho'k ka sabarang, ka Betsaida, samintara koa Ia nyuruh urakng rami koa puakng. ⁴⁶ Apas Ia bapisah ba kabatnne, Ia ampus ka bukit untu' badoa. ⁴⁷ Sawaktu ari udah maam parahu koa udah ada katangah danau, sedang Yesus babaro ka darat. ⁴⁸ Sawaktu Ia nee'k sidi payahhe kabatnne koa ngayuh dayung barang diangin sakal, lalu kira-kira jam tiga maam Ia atakng ka kabatnne bajaatn ka atas ai'k ba Ia mao'k ngalewati'k kabatnne koa. ⁴⁹ Sawaktu kabatnne nee'k Ia bajaatn ka atas ai'k, kabatnne ngira kade Ia koa antu, tarus kabatnne koa bangampakatn, ⁵⁰ barang kabatnne koa samua nee'k Ia ba kabatnne koa samua pun takajut. Tapi bijak Ia bakata ka kabatnne: "Tananglah! Aku nyian, ame gai'k!" ⁵¹ Tarus Ia naik ka parahu namui'k kabatnne, lalu angin pun tanang. Kabatnne sidi tacangang ba kabingungan, ⁵² barang apas paristiwa roti koa, kabatnne nape' ngarati, ba ati kabatnne koa tatap degel. ⁵³ Sa sampe e ka sabarang Yesus ba murit-murit-Te mandarat ka Genesaret ba kabatnne balabuh dikoa. ⁵⁴ Sawaktu kabatnne kauar dari parahu, urakng langsung nganali'k Yesus. ⁵⁵ Tarus badariatnlah kabatnne ka saluruh daerah koa ba mulai mikuti'k urakng-urakng sakit ka atas tilam noto'k Yesus, dimae maan kabare Ia barada. ⁵⁶ Kamaepun Ia ampus, ka desa-desa, ka kota'k-kota'k, gek ka kampokng-kampokng, urakng narohatn urakng-urakng sakit ka pasar ba mohon ka Ia, biar kabatnne dimuihan kahe nyangkam ujukng jubah-He maan. Tarus samua urakng nang nyangkam-Ia jaji tomo.