¹ Apas koa naiklah Yesus ka daapm parahu lalu nyabarang. Tarus sampelah Ia ka kota'k-E babaro. ² Lalu dingicakng uraknglah ka Ia urakng lumpuh nang tagurikng ka tampat tidure. Sawaktu Yesus nee iman kabatne, bakatalah Ia ka urakng lumpuh koa: "Picayalah, oi anak-Ku, dosanyu udah di ngamponi. ³ Tarus bakatalah sangahe urakng ahli Taurat daapm atie: "Ia maleceh Jubata". ⁴ Tapi Yesus nauan pikiran kabatne, lalu bakata: Ngahe kao mikiratn hal-hal nang jahat ka daapm atinyu? ⁵ Mae gek labih mudah, ngataatn: Dosa nyu udah di ngamponi, gek ngataatn: Umpatlah, bajaatnlah? ⁶ Tapi biar kao nauan, kade ka dunia nyian Anak Manusia bakuasa ngamponi dosa"- lalu bakatalah Ia ka urakng lumpuh koa-: "Umpatlah, angkatlah tampat tidur nyu ba puaknglah ka rumahnyu!" ⁷ Ba urakng koa pun umpat tarus puakng. ⁸ Tarus urakng manyak nang nee hal koa gai' lalu muliatn Jubata nang udah mare kuasa saayak koa ka manusia. ⁹ Apas Yesus ampus dari koa, Ia nee seko urakng nang badama Matius duduk ka rumah cukai, lalu Ia bakata ka ia; "Tunaanlah Aku." Tarus badirilah Matius lalu nunaan Ia. ¹⁰ Tarus sawaktu Yesus makatn ka rumah Matius, ataknglah manyak pamungut cukai ba urakng badosa lalu makatn barage ba Ia ba murit-murit-Te ugak. ¹¹ Sawaktu urakng Farisi nee parihal koa, bakatalah kabatne ka murit-murit Yesus: "Ngahe gurunyu makatn barage-rage ba pamungut cukai ba urakng badosa?" ¹² Yesus nangaratn lalu bakata: "Buke' urakng sehat nang mararuatn tabib, tapi urakng sakit. ¹³ Jadi ampuslah ba palajari'klah arti firman nyian: Nang Ku maoan ialah belas kasihatn ba buke persembahan, barang koa Aku atakng buke untu nyaru'k urakng banar, tapi urakng badosa." ¹⁴ Lalu ataknglah murit-murit Yohanes ka Yesus tarus bakata: "Ngahe kami ba urakng Farisi ba puasa, tapi murit-murit-Nyu ina'? ¹⁵ Sahut Yesus ka kabatne: "Bisa gek ayukng-ayukng panganten nang laki sedih salama panganten koa ada ba na kabatne? Tapi waktue ana atakng panganten koa di taap dari kabatne ka pada waktu koalah kabatne koa ana ba puasa. ¹⁶ Ina seko' urakng pun nambal sete' kaikng nang nape susut ka baju nang tuha, barang kade aya koa kaikng panambal koa ana narik baju koa, lalu mangkin aya'klah rojek ke ¹⁷ Yakoa ugak anggor nang barahu ina di insiatn ka daapm kantong kuit nang tuha, barang kade yakoa kantong koa ana rojek lalu anggor koa tabuakng ba kantong koa pun ancur. Tapi anggor nang barahu di urakng tarohi'k ka daapm kantong nang barahu ugak, ba kade yakoa tapiharalah kadua-dua e. ¹⁹ Samintara Yesus bakata yakoa ka kabatne, ataknglah seko urakng kapala rumah sambayang, tarus nyambah Ia lalu bakata: "Anakku nang bini baru aja' mati, tapi ataknglah ba gaaranan lah kokot-Nyu ka atase, ia akan idup. ¹⁹ Lalu Yesus pun umpatlah banunaan urakng koa sirage ba murit-murit-Te. ²⁰ Waktu koa seko nang bini nang udah dua balas tahutn lamae menderita pendarahan maju nyamaki' Yesus dari balakang nyangkam jumbai jubah Yesus. ²¹ Barang jare ka daapm atie: "Asal ku jangkam maan jubah-He, aku akan tomo." ²² Tapi Yesus malek ba neeatn ia sambi bakata; "Kuatatn maan ati nyu, o anak-Ku, imannyu udah nyalamatatn kao." Dari umpat dikoa samuhlah nang bini koa. ²³ Waktu Yesus sampe ka rumah kapala rumah sambayang koa ba nee panyiup-panyiup soleng ba urakng manyak bacurak, ²⁴ bakatalah Ia: "Ampuslah, barang kamudak nyian ina mati, tapi tidur." Tapi Ia dingaakatn di dangan koa. ²⁵ Apas urakng manyak koa di ngajang, Yesus taama'k ba nyingii'k kokot kamuda' koa. ²⁶ Lalu tasiarlah kabar parihal koa ka saluruh daerah koa. ²⁷ Sawaktu Yesus narusatn pajaanan-Ne umpat di koa, dua urakng buta' nunaan Ia sambi ngampak-ngampaki Yesus: "Kasihatni'k lah kami oi Anak Daud." ²⁸ Apas Yesus taama' ka daapm sabuah rumah, ataknglah badua urakng buta koa ka Ia, lalu Yesus bakata ka ia badua: "Picaya' gek kao, kade Aku bisa nomoan?" Kabatne badua koa nyahuti: "Auk Jubata, kami picaya." ²⁹ Lalu Yesus nyangkam mata kabatne badua koa sambi bakata: "Jajilah ka kao sasuai imannyu" ³⁰ Tarus tabuka'lah mata kabatne koa. Yesus pun tagas bapasatn ka kabatne: "Jagalah supaya ame seko' urakng pun nang nauan parihal nyian." ³¹ Tapi kabatne kauwar ba nyuritaan Ia ka samua daerah koa ³² Samintara badua urakng buta koa ka uwar, dingicaknglah ka Yesus seko urakng awa'k(bisu)nang karasukan setan. ³³ Ba apas setan koa di ngajang , bisalah urakng awak(bisu) koa bakata. Tarus heranlah urakng manyak, jare: "Nang aya nyian nape suah diurakng manyak tee ka Israel." ³⁴ Tapi urakng Farisi bakata: "Ia ngajang setan ba kuasa pangulu setan." ³⁵ Yakoalah Yesus bakuliling ka samua kota' ba kampokng; Ia ngajar ka daapm rumah-rumah sambayang ba mambaritaatn Injil Karajaan Saruga ba ngilangan sagala kalemahan ba panyakit-panyakit. ³⁶ Nee urakng manyak koa, tagaraklah ati Yesus oleh belas kasih ka kabatne koa, barang kabatne latih ba talantar aya domba nang ina ba gembala. ³⁷ Lalu jakata Yesus ka murit-murit-Te: " Anyian memang manyak, tapi pangarajae sadikit. ³⁸ Barang koa minta lah ka tuan nang ampu' anyian koa, biar Ia ngiriman pangaraja-pangaraja untu anyian kao."