¹ Apas Yesus turutn dari bukit, urakng manyak batusak-tusak nunaan Ia. ² Tarus ataknglah urakng nang sakit laeko ka Ia, tarus sujut nyambah Ia lalu bakata: "Tuan, kade Tuan maok, Tuan bisa nomoan aku." ³ Lalu Yesus nyooatn kokot-Te, nyape urakng koa tarus bakata: "Aku maok, jajilah kao tomo." Samaris koa ugak tomolah urakng koa dari panyakite. ⁴ Tarus Yesus bakata ka ia: "Ingatlah, ame kao mare nauan hal nyian ka sae pun, tapi ampuslah, teeatnlah diri'k nyu ka imam ba sarahatnlah persembahan nang di marentahatn di Musa, untu bukti ka kabatne. ⁵ Sawaktu Yesus taama' ka Kapernaum, ataknglah seko urakng perwira namui'k Ia ba minta ka Ia: ⁶ "Tuan, ambaku ta gurikng ka rumah barang sakit lumpuh ia sidi manderita." ⁷ Yesus bakata ka ia: "Aku akan atakng nyamuhatn na'k ia." ⁸ Tapi sahut perwira koa ka Ia: "Tuan, aku ina pantas narima Tuan ka daapm rumahku, kataatn maan sapatah kata, maka amba ku koa akan samuh. ⁹ Barang aku nyian urakng bawahan, ba ka babah aku ada ugak prajurit. Kade aku bakata ka seko urakng parajurit koa; Ampus!, ia pun ampus, ba ka parajurit nang lain: Atakng!, maka ia pun atakng, gek ka amba ku: Karajaanlah nyian!, ia pun ngarajaan iya." ¹⁰ Apas Yesus nangar hal koa, heranlah Ia lalu bakata ka dangan nang nunaan Ia: "Aku bakata ka kita'k sasidie iman nang saayak nyian ina suah Aku tamuik ka seko'k urakng pun ka antara urakng Israel. ¹¹ Aku bakata ka kao: Manyak urakng ana atakng dari Timor ba Barat ba duduk makatn barage-rage ba Abraham, Isak, ba Yakub ka daapm Karajaan Saruga, ¹² sedangkan anak-anak Karajaan koa ana di tabakatn ka daapm kagalapan nang paling galap, dikoalah ana ditamui'k kuciak ba gigi bagarotak." ¹³ Tarus Yesus bakata ka perwira koa; "Puaknglah ba jajilah ka kao aya saparati nang kao picayak." Lalu kapada koa ugak tomolah amba e koa. ¹⁴ Pas sampe ka rumah Petrus, Yesus pun nee datuk Petrus nang bini tagurikng barang sakit demam. ¹⁵ Tarus Ia nyingiik kokot nang bini koa, lalu ilang lah demame koa. Ia pun umpat lah tarus nyiapatn pamakanan untu Yesus. ¹⁶ Sawaktu dah maok maam dingicaknglah ka Yesus manyak urakng nang karasukan setan ba sapatah kata Yesus ngajang roh-roh koa ba nomoan urakng-urakng nang menderita sakit. ¹⁷ Parihal koa jaji biar ganaplah firman nang dinyampeatn di nabi Yesaya: "Ia lah nang mikut kalamahan diri'k ba nanggong panyakit diri'k." ¹⁸ Sawaktu Yesus nee urakng manyak ngulilingik Ia, Ia nyuruh batolak ka sabarang. ¹⁹ Tarus ataknglah seko'k ahli Taurat lalu bakata ka Ia: "Guru, aku maok nunaan Kao, kamae pun Kao ampus." ²⁰ Yesus bakata ka ia: "Sarigala ada ba ubakng burukng ada ba sarakng, tapi Anak Manusia ina ba tampat untu nguringanak kapala-E." ²¹ Ada nang lain, yakoa seko'k dari murit-Te, bakata ka Ia : "Jubata, porongan aku dohok maok ampus nyubura'k apak ku." ²² Tapi Yesus bakata ka ia: "Tunaanlah Aku ba biarlah kabatne urakng-urakng mati nguburatn urakng-urakng mati koa." ²³ Tarus Yesus naik ka daapm parahu ba murit-murit-Te pu nunaan Ia. ²⁴ Samaris koa ugak mamuranilah angin ribut ka dano koa, lalu parahu koa di nimbus galombang, tapi Yesus tidur. ²⁵ Lalu ataknglah murit-murit-Te ngumpatatn Ia, jakata e: "Jubata, tolonglah, dirik binasa." ²⁶ Ia bakata ka kabatne; "Ngahe gek kao gai', kao nang kurang picaya'?" Tarus umpatlah Yesus ngampaki angin ba dano koa, lalu dano koa jaji taduh sidi. ²⁷ Heranlah urakng-urakng koa jare: Urakng ahe gek Ia nyian, angin ba dano ba ngampu' ka Ia?" ²⁸ Sasampe e ka sabarang, yakoa ka daerah urakng Gadara, ataknglah dari kuburan dua urakng nang karasukan setan namui'k Yesus. Kabatne koa babahaya sidi, sampe ina seko'k pun urakng nang barani ngalalui'k maraga koa. ²⁹ Ba kabatne koa pun ngampak, jare: "Ahe urusan-Nyu ba kami, hoi Anak Jubata? Ada gek Kao ka kadian untu nyeksa kami sanape waktue?" ³⁰ Ina jauh dari kabatne koa sajumbalah ayak babotn agik ngagok makatn. ³¹ Tarus setan-setan koa minta ka Ia, jakatae: "Kade Kao ngoser kami, suruhlah kami pindah ka daapm karayungan babotn koa." ³² Yesus bakata ka kabatne: "Ampuslah! lalu bamuokatnik lah kabatne koa tarus taama'k ka daapm babotn-babotn koa. Lalu tarajutnlah samua karayungan babotn koa ka sisi jurang ka daapm dano lalu mati ka daapm ai'k. ³³ Tarus darilah panyaga-panyaga babotn koa sa sampe e ka kota', curitalah kabatne koa sagala e, ugak parihal urakng nang karasukan setan koa. ³⁴ Lalu kauwarlah samua urakng kota' namui'k Yesus, kabatne pun nusak biar Ia ningaatn daerah kabatne koa.