¹ Apas ari Sabat lewat, dah samak mataari maok maancar ka ari pertama minggu koa, ampuslah Maria Magdalena ba Maria nang lain, nee' kuburan koa. ² Tarus jajilah gempa bumi nang kuat barang seko' malaekat Jubata turutn dari angit ba atakng ka batu koa ba ngulingan ia lalu duduk ka atase. ³ Muhae aya tolen kilat ba pakeanne putih aya tolen salju. ⁴ Ba panyaga-panyaga koa gai' kagaiaanan ba jaji aya urakng-urakng mati. . ⁵ Tapi malaekat koa bakata ka nang bini-bini koa: "Amelah kao gai', barang aku nauan kao ngagui'k Yesus nang udah dinyalipatn koa. ⁶ Ia ina' ada kadian, barang Ia udah bangkit, sama aya nang dah Ia ngataatn. Jek, tee'lah tampat Ia gurikng. ⁷ Ba bijaki'lah ampus ba kataatnlah ka murit-murit-Te kade Ia udah bangkit dari antara urakng mati. Ia nohoi'k kao ka Galilea; dinaun kao ana nee Ia. Sasidie aku udah ngataatn ia ka kao." ⁸ Kabatnne langsung bijak badariatn dari kuburan koa, ba bacampur rasa gai ba rasa repo sidi tarus dari bijak-bijak untu mare' nauan koa ka murit-murit Yesus. ⁹ Tiba-tiba Yesus batamu ba kabatnne tarus bakata: "Salam untunyu." Kabatnne nyamaki' Ia ba ngoho' paha-E ba nyambah-Ia. ¹⁰ Tarus ja Yesus ka kabatnne: "Ame gai'. Ampus ba kataatnlah ka kamaruk-kamaruk-Ku, biar kabatnne ampus ka Galilea, ba dikoalah kabatnne ana nee' Aku." ¹¹ Sawaktu Kabatnne ka tangah maraga, ataknglah sangahe urakng dari panjaga koa ka kota ba mare nauan sagala nang tajaji koa ka imam-imam kapala. ¹² Ba apas barunding ba tua-tua, kabatnne naap kaputusan lalu mareatn sajumbalah duit manyak ka saridadu-saridadu koa, ¹³ tarus bakata: "Kao harus bakata, kade murit-murit-Te atakng maam-maam ba mancuri Ia sawaktu kao gik tidur. ¹⁴ Ba kade' hal nyian kadangaratn di wali nagari, kami ana bakata ba ia, biar kao ina namu kasulitan ahe-ahe." ¹⁵ Kabatnne narima duit koa ba babuat aya nang dimasanan ka kabatnne. Ba curita nyian tasiar ka antara urakng Yahudi sampe angkitn nyian. ¹⁶ Ba kasabalas murit koa barangkat ka Galilea, ka bukit nang dah dinojokatn Yesus ka kabatnne. ¹⁷ Sawaktu nee Ia kabatnne nyambah-Ia, tapi sangahe urakng ragu-ragu. ¹⁸ Yesus nyamaki' kabatnne lalu bakata: "Ka Aku udah dimareatn sagala kuasa ka saruga ba ka bumi. ¹⁹ Barang koa ampuslah, jajiatnlah samua bangsa murit-Ku ba baptislah kabatnne daapm dama Apak, ba Anak ba Roh Kudus, ²⁰ ba ajarlah kabatnne minjawat sagala sasuatu nang udah Ku marentahatn ka kao. Ba tauatnlah, Aku nyaratai kao sampe ka ahir zaman."