¹ Sawaktu ari mulai siakng, samua imam kapala ba tua-tua bangsa Yahudi bakomo'k ba naap kaputusan untuk munuh Yesus. ² Kabatnne ngikat Ia, tarus ngicakng-Ia ba nyarahatn Ia ka Pilatus, wali nagari koa. ³ Sawaktu Yudas, nang nyarahatn Ia, nee, kade Yesus udah dijantui'k ukuman mati, nyasallah ia. Lalu ia muongan duit nang talu puluh kapikng perak koa ka imam-imam kapala ba tua-tua, ⁴ tarus bakata: "Aku udah badosa barang nyarahatn darah urakng nang ina basalah." Tapi sahut kabatnne: "Ahe urusanne ba kami koa? Koa urusannyu babaro!" ⁵ Tarus ia pun nabakatn duit perak koa ka daapm Bait Suci, lalu ampus dari tampat koa ba ngantongan diri'e. ⁶ Imam-imam kapala naap duit perak koa tarus bakata: "Ina dimuihan namaan duit nyian ka pati persembahan, barang nyian duit darah. ⁷ Apas barunding kabatnne mali ba duit koa tanah nang disabut Tanah Tukang Periuk untu dijajiatn tampat pasuburatn urakng asing. ⁸ Koalah jukute tanah koa sampe ka ari nyian disabut Tanah Darah. ⁹ Barang koa ganaplah firman nang dinyampeatn di nabi Yeremia: "Kabatnne narima talu puluh duit perak, yakoa raga nang dinatapatn untu seko' urakng menurut panilaian nang balaku ka antara urakng Israel, ¹⁰ ba kabatnne mareatn duit koa untu tanah tukang periuk, aya saparati nang dimasanan Jubata ka aku." ¹¹ Tarus Yesus dingadapatn ka wali nagari. Tarus wali nagari batanya ka-Ia: "Kao gek raja urakng Yahudi?" Ja Yesus: "Kao babaro ngataatn ia." ¹² Tapi atas tuduhan nang dingajuatn imam-imam kapala ba tua-tua ka Ia, Ia ina mare' jawapan ahe pun. ¹³ Lalu ja Pilatus ka Ia: Ina me Kao nangar sidi manyak tuduhann saksi-saksi nyian ka Kao? ¹⁴ Tapi Ia ina nyawap sete' katapun, sampe wali nagari koa pun heran sidi. ¹⁵ Dah jaji kabiasaan di wali nagari untu mebasatn seko' urakng ukuman ka tiap-tiap ari raya koa atas pilihan urakng manyak. ¹⁶ Ba sawaktu koa ada daapm pinjara seko urakng nang takanal kajahatatnne nang badama Yesus Barabas. ¹⁷ Barang kabatnne udah bakomo'k dikoa, Pilatus bakata ka kabatnne: "Sae gek nang kao maoan ku bebasatn untu kao, Yesus Barabas gek Yesus, nang disabut Karistus?" ¹⁸ Ia memang nauan, kade kabatnne nyarahatn Yesus barang dangki ka Yesus. ¹⁹ Sawaktu Pilatus agik duduk ka karusi pangadilan, binie ngirim pasatn ka ia: "Ame kao campuri pakara urakng banar koa, barang Dihe aku sidi menderita ka daapm mimpi tumaam." ²⁰ Tapi barang dingasut di imam-imam kapala ba tua-tua, urakng manyak batekat untu minta supaya Barabas dibebasatn ba Yesus diukum mati. ²¹ Wali nagari nyahut bakata ka kabatnne: "Sae gek ka antara badua urakng koa nang kao maoan ku bebasatn untu' kao?" Ja kabatnne: "Barabas." ²² Ja Pilatus ka kabatnne: "Kade yakoa, ahe gek nang harus ku pinjawat ka Yesus, nang disabut Karistus?" Kabatnne samua ngampak: "Ia harus disalipatn!" ²³ Jakatae: "Tapi kajahatan ahe me nang udah Ia minjawat?" Tapi kabatnne koa makin karas ngampak: "Ia harus disalipatn!" ²⁴ Sawaktu Pilatus nee kade sagala usaha akan sia-sia, malah udah mulai' nimuan kakacauan, ia naap aik ba nyasah kokote: "Aku ina basalah terhadap darah urakng nyian; koa urusan nyu babaro!" ²⁵ Ba saluruh rakyat koa nyahut: "Biarlah darah-He ditanggongan atas kami ba atas anak-anak kami!" ²⁶ Tarus ia mebasatn Barabas untu' kabatnne, tapi Yesus ia nampirikng lalu ia nyarahatatn untu disalipatn. ^{28 27} rus apas koa saridadu-saridadu wali nagari ngicakng Yesus ka gedung pangadilan, lalu nyaruk samua pasukan bakomo' ka sakuliling Yesus. ²⁸ Kabatnne ngalapasatn pakean-Ne ba makeatn jubah ungu ka Ia. ²⁹ Kabatnne nganyam sete' mahkota duri ba narohatn ia ka atas kapala-E, tarus marei'k Ia sabatakng buuh ka kokot kanan-Ne. Lalu kabatnne balutut kaadapatn-Ne ba ngolo'-ngolo'an Ia, jare: "Salam, hei Raja urakng Yahudi!" ³⁰ Kabatnne ngaujahi' muha-E, ba naap buuh koa tarus mangkongan ia ka kapala-E. Apas ngolo'-ngoloan Ia kabatnne ngalapasatn jubah koa dari Ia ba makeatn ugak pakean-Ne ka Ia. ³¹ Apas koa kabatnne ngicakng Ia ka uar untu disalipatn. ³² Sawaktu kabatnne bajaatn ka uar kota', kabatnne batamu ba seko' urakng dari Kirene nang badama Simon. Urakng koa kabatnne maksa untu mikut salip Yesus. ³³ Tarus sampelah kabatnne ka sete' tampat nang badama Golgota, artie: Tampat Tangkorak. ³⁴ Lalu kabatnne mare' Ia nyocok ampadu'. Apas Ia nyacapi', Ia bai' nyocok ia. ³⁵ Apas udah nyalipatn Ia kabatnne magi-magi pakean-Ne sacara diundi. ³⁶ Tarus kabatnne duduk dikoa nyaga Ia. ³⁷ Ba ka atas kapala-E tapasang tulisan nang nyabut alasan ngahe Ia dingukum; "Nyianlah Yesus Raja Urakng Yahudi." ³⁸ Barage ba Ia dinyalipatn dua urakng panyamun, seko' ka sabalah kanan-Ne ba seko' agik ka sabalah keba'-E. ³⁹ Urakng-urakng nang lewat dikoa menghujat Ia ba sambi manggelengan kapala, ⁴⁰ kabatnne bakata: Hei Kao nang mao' ngarobohatnna' Bait Suci ba mao' minjawat ia agik daapm talu ari, salamatatnlah diri'-Nyu kade' Kao Anak Jubata, turutnlah dari salip koa!" ⁴¹ Yakoa ugak imam-imam kapala ba ahli-ahli Taurat ba tua-tua ugak ngolo'-ngoloan Ia kabatnne bakata: ⁴² "Urakng lain Ia salamatatn, tapi diri'-E babaro ina bisa Ia salamatatn! Ia Raja Israel? Baiklah Ia turutn dari salip koa, ba kami ana akan picaya ka Ia. ⁴³ Ia narohatn pangarapatn-Ne ka Jubata: baiklah Jubata nyalamatan Ia, kade' Jubata berkenan ka Ia! Barang Ia udah bakata: Aku adalah Anak Jubata." ⁴⁴ Bahkan panyamun-panyamun nang dinyalipatn barage-rage ba Ia, nyaci Ia ugak. ⁴⁵ Mulai' dari jam dua balas kagalapatn nonoik' saluruh daerah koa sampe jam tiga. ⁴⁶ Kira-kira jam tiga ngampaklah Yesus basuara nyarekng: "Eli, Eli, lama sabakhtani?" Artie: Jubata-Ku, Jubata-Ku, ngahe Kao ningaatn Aku? ⁴⁷ Nangar koa, sangahe urakng nang badiri dikoa bakata: "Ia nyarui'k Elia." ⁴⁸ Tarus bijaklah seko' atakng dari kabatnne koa; ia naap bunga karang, nyalupatn ia ka daapm anggor asapm, tarus nyucukatn ia ka sabatakng buuh ba marei'k Yesus nyocok. ⁴⁹ Tapi urakng-urakng lain bakata: "Ame, baiklah diri'k nee, ahe gek Elia atakng untu nyalamatatna' Ia." ⁵⁰ Yesus ngampak agik ba suara nyarekng tarus nyarahatn nyawa-E. ⁵¹ Ba tee' lah, tirai panutup Bait Suci tabalah jaji dua dari atas sampe kababah ba tajajilah gempa bumi, ba bukit-bukit batu tabalah, ⁵² ba kuburan-kuburan tabuka' ba manyak urakng kudus nang dah mati bangkit. ⁵³ Ba apas kabangkitatn Yesus, kabatnne koa pun kaluar dari kuburan, lalu taama' ka kota' nang kudus ba neeatn diri'k ka urakng manyak. ⁵⁴ Kapala Pasukan ba parajurit-parajurit nang nyaga Yesus jaji gai' sidi sawaktu kabatnne nee' gempa bumi ba ahe nang dah tajaji, lalu bakata: "Sidi, Ia nyian Anak Jubata." ⁵⁵ Ba dikoa ada manyak nang bini nang nee' dari jauh, yakoa nang bini-bini nang nunaan Yesus dari Galilea untu' ngalayani' Ia. ⁵⁶ Kaantara kabatnne koa ada Maria Magdalena, Maria uwe'k Yakobus, ba Yusuf, ba uwe'k anak-anak Zebedeus. ⁵⁷ Dah mao'k maam ataknglah seko' urakng kaya, urakng Arimatea, nang badama Yusuf nang udah jaji murit Yesus ugak. ⁵⁸ Ia ampus ngadap Pilatus ba minta mayat Yesus. Pilatus marentahatn untu' nyarahatn ka ia. ⁵⁹ Yusuf pun naap mayat koa, ngapani ia ba kaikng lenan nang putih baraseh, ⁶⁰ tarus nguringan ia ka daapm kuburan nang barahu, nang dinamukng ka daapm bukit batu, ba apas ngulingan sege' batu aya'k ka pintu kuburan koa, tarus darilah ia. ⁶¹ Tapi Maria magdalena ba Maria nang lain diapm dikoa duduk ka depan kuburan koa. ⁶² Kaampagi arie, apas ari persiapan, ataknglah imam-imam kapala ba urakng-urakng Farisi barage-rage ngadap Pilatus, ⁶³ tarus kabatnne bakata: "Tuan, kami ingat, kade' si penyesat koa sawaktu idup-Pe bakata: Apas talu ari Aku akan bangkit. ⁶⁴ Barang koa parentahatnlah untu nyaga kuburan koa sampe ari nang ka talu; kade ina', murit-murit-Te ana atakng mancuri Ia, lalu bakata ka rakyat: Ia udah bangkit dari antara urakng mati, tarus panyesatan nang dah dudi ana akan labih buruk agik akibate dari nang pertama." ⁶⁵ Ja Pilatus ka kabatnne: "Nyian panjaga-panjaga untu nyu, ampus jagalah kuburan koa sabaik-baike." ⁶⁶ Tarus ampuslah kabatnne ba bantoan panjaga-panjaga koa kabatnne memeteraiatn kuburan koa ba nyaga ia.