¹ Tarus ataknglah urakng-urakng Farisi ba Saduki mao'k nyobai'ak Yesus. Kabatne minta supaya Ia neeatn sote' tanda dari saruga ka kabatne. ² Tapi sahut Yesus: "Pas patakng ari barang angit merah, kao bakata: Ari maok ceraha'k. ³ ba aapm ari, barang angit merah ba soopm, kao bakata: Ari buruk. Rupa angit kao nauan bedaatn ia tapi tanda-tanda zaman ina'k. ⁴ Angkatan nang jahat ba ina setia nyian nuntut sote' tanda. Tapi ka kabatne ina akan dibareaatn tanda salain tanda Yunus." Lalu Yesus dari ningaatn kabatne. ⁵ Pas waktu murit-murit Yesus nyabarang danau, kabatne kaupaatn ngicakng roti. ⁶ Yesus bakata ka kabatne: "Bajaga-jagalah ba waspadalah ka na' ragi urakng Farisi ba Saduki." ⁷ Tarus kabatne bapikir-pikir ba seko' bakata ka nang laine: "Koa ia ngataatn barang diri' ina ngicakng roti." ⁸ Ba sawaktu Yesus nauan ahe nang kabatne ngomongan, Ia bakata: "Ngahe kao ngomongan soal ina ba roti? hei urakng-urakng nang kurang picaya! ⁹ Nape ugak kao ngarati? Ina' kao ingat agik ka lima roti untu lima ribu urakng koa ba sangahe baku roti kao ngomoan agik? ¹⁰ Gekpun ka tujuh roti untu ampat ribu urakng koa ba sangahe baku kao ngomoan agik? ¹¹ Ayamae mungkin kao ina' ngarati kade buke roti nang Ku maksutatn. Aku bakata ka kao: Waspadalah ka ragi urakng Farisi ba Saduki." ¹² Sawaktu koa baru'lah kabatne ngarati kade buke maksut-Te supaya kabatne waspada ka ragi roti, tapi ka ajaran urakng Farisi ba Saduki. ¹³ Apas Yesus sampe ka daerah Kaisarea Filipi, Ia batanya' ka murit-murit-Te: " Ja urakng, sae gek Anak Manusia koa?" ¹⁴ Sahut kabatne: "Ada nang ngataatn: Yohanes Pamaptis, ada ugak nang ngataatn: Elia ba ada ugak nang ngataatn: Yeremia gek salah seko' dari na nabi." ¹⁵ Tarus Yesus batanya ka kabatne: "Tapi ahe katanyu, sae gek Aku nyian?" ¹⁶ Lalu Simon Petrus nyahut: "Kao adalah Mesias, Anak Jubata nang idup!" ¹⁷ Ja Yesus ka ia: "Bahagialah kao Simon binYunus barang buke manusia nang nyataatn koa ka kao, tapi Apak-Ku nang ka saruga. ¹⁸ Aku pun bakata ka kao: Kao adalah Petrus ka atas batu karang nyian Aku mao' madiriatn jemaatKu ba alam maut ina akan nguasai'k iya. ¹⁹ Ka kao akan Ku bareatn kunci Karajaan Saruga. Ahe nang kao ngikat ka dunia nyian akan taikat ka saruga ba ahe nang kao ngalapasatn ka dunia nyian akan talapas ka saruga." ²⁰ Tarus Yesus maian murit-murit-Te supaya ame mare nauan ka sae pun kade Ia Mesias. ²¹ Dari waktu koa Yesus mulai matakatn ka murit-murit-Te kade Ia harus ampus ka Yerusalem ba nangong manyak penderitaan dari pihak tua-tua, imam-imam kapala ba ahli-ahli Taurat, lalu di bunuh ba dibangkitatn ari ka talu. ²² Tapi Petrus narik Yesus ka samping ba nagur Ia, jare: "Jubata, kirae Allah Jubata nyauhatn hal koa! Hal koa sakai-kai ina akan balaku ka Kao." ²³ Tarus Yesus malek lalu bakata ka Petrus: "Darilah Ibalis. Kao jaji batu sandungan bagi Ku, barang kao buke mikiratn ahe nang dimikiratn Jubata, malainkan ahe nang di mikiratn manusia." ²⁴ Lalu Yesus bakata ka murit-murit-Te: "Satiap urakng nang maok nunaan Aku, ia harus nyangkal dirie, mikut salipe ba nunaan Aku. ²⁵ Barang Sae pun nang maok nyalamatatn nyawae; ia akan kailangan nyawae; tapi saepun nang kailangan nyawae karna Aku, ia akan namuan iya. ²⁶ Ahe gunae seko' urakng namuan saluruh dunia tapi kailangan nyawae? Ba ahe gek nang bisa untu nganti nyawae? ²⁷ Barang Anak Manusia ana akan atakng daapm kamuliaan Apak-E di ngiringi di malaekat-malaekat-Te; pada waktu koa Ia akan maas satiap urakng manurut pabuatatnne. ²⁸ Aku bakata ka kao: Sasidie ka antara urakng nang hadir ka dian ada nang ina akan mati sanape kabatne nee Anak Manusia atakng jaji Raja daapm Karajaan-Ne."