¹ Tarus ataknglah sangahe urakng Farisi ba ahli Taurat dari Yerusalem ka Yesus lalu bakata: ² "Ngahe murit-murit-Nyu ngalanggar adat-istiadat enek moyang diri'k? Kabatne koa ina nyasah kokot dohok sanape makatn." ³ Tapi ja Yesus nyahuti' urakng-urakng koa: "Ngahe kao pun ngalanggar parentah Jubata demi adat-istiadat enek moyang nyu? ⁴ Barang Jubata ba firman: Hormati'klah apaknyu ba uweknyu; ugak: Sae nang nyumpahi' apak e ba uwek e pasti di ukum mati. ⁵ Tapi kao bakata: Barang sae bakata ka apak e gek ba kata ka uwek e: Ahe nang ada ka aku nang bisa dipagunaan untu mihara kita'k, udah di magunaan untu persembahan ka Jubata, ⁶ urakng koa ina wajip agik ngormati'k apak e gek pun uwek e. Kade aya koa firman Jubata kao nyataatn ina balaku demi adat istiadat nyu babaro. ⁷ Hoi urakng-urakng munafik! Banarlah nubuat Yesaya parihal kao: ⁸ Bangsa nyian muliatn Aku ba bebere, padahal atie jauh dari Aku, ⁹ Paracuma kabatne baribadah ka Aku, sedangkan ajaran nang kabatne ngajaratn koa parentah manusia." ¹⁰ Lalu Yesus nyaruk urakng manyak tarus bakata ka dangan koa: ¹¹ "Dangar ba ingatlah: buke nang taama' ka daapm moot nang najisatn urakng, malainkan nang muok dari moot, koalah nang najisatn urakng." ¹² Tarus ataknglah murit-murit-Te lalu batanya ka Ia: "Kao nauan kade pakataatn-Nyu koa udah jaji batu sandungan bagi urakng-urakng Farisi"? ¹³ Sahut Yesus: "Satiap tanaman nang ina ditanam di Apak-Ku nang ka saruga akan dibabut ka akar-akare. ¹⁴ Biaratnlah kabatne koa. Kabatne urakng buta ngejengan urakng buta. Kade urakng buta ngejengan urakng buta pasti kadua-duae jantu'k ka daapm ubakng. ¹⁵ Tarus Petrus bakata ka Ia: "Jelasatnlah paumpamaan koa ka kami." ¹⁶ Sahut Yesus: "Kao pun masih ina bisa ngarati? ¹⁷ Ina nauan gek kao kade sagalaa sasuatu nang taama' ka daapm moot turutn ka daapm parut lalu di muang ka jamban? ¹⁸ Tapi ahe nang muok dari moot barasal dari ati koalah nang najisatn urakng. ¹⁹ Barang dari ati timu sagala pikiran jahat, pancurian, sumpah palsu ba hujat. ²⁰ Koalah nang najisatn urakng. Tapi makatn ba kokot nang ina di sasah ina najisatn urakng." ²¹ Lalu Yesus ampus dari koa ba ngasisi ka daerah Tirus ba Sidon. ²² Tarus ataknglah seko nang bini Kanaan umpat dari daerah koa lalu ngampak: "Kasihatni'klah aku, o Jubata, Anak Daud, barang anakku nang bini karasukan setan ia menderita sidi." ²³ Tapi Yesus sidi ina nyahuti'k ia. Lalu murit-murit-Te atakng ba minta ka Ia: "Suruhlah ia dari, ia ngampak-ngampak nunaan diri'k." ²⁴ Sahut Yesus: "Aku di utus kahe ka domba-domba nang ilang dari umat Israel." ²⁵ Tapi nang bini koa nyamaki' ba nyambah Ia sambi bakata: "Jubata, tolonglah aku." ²⁶ Tapi ja Yesus nyahuti ia: " Ina' patut naap roti nang di nyiapatn untu kamuda'k ba nabakatn ia ka asu'k." ²⁷ Ja nang bini koa: "Banar Jubata, tapi asuk koa makatn kurepekng-kurepekng nang jantu' dari meja tuanne." ²⁸ Lalu Yesus bakata ka ia: "Hei uwek, ayak imannyu maka jajilah ka kao aya nang kao maok." Ba sawaktu koa ugak anake samuh. ²⁹ Apas ningaatn daerah koa, Yesus nutuatni' pantai danau Galilea ba naik ka atas bukit lalu duduk di koa. ³⁰ Tarus urakng manyak rami-rami atakng ka Ia ngicakng urakng lumpuh, urakng timpakng, urakng buta, urakng awak ba manyak agik nang lain, lalu narohatn kabatne koa ka paha Yesus ba Ia nomoan kabatne samua. ³¹ Lalu batakajupatnlah urakng manyak koa nee urakng awak bakata-kata, urakng timpakng samuh, urakng lumpuh bajaatn, urakng buta' nee, ba kabatne samua muliaatn Jubata Israel. ³² Lalu Yesus nyaruk murit-murit-Te lalu bakata: "Ati-Ku tagarak di belas kasihatn ka urakng manyak koa. Udah tiga ari kabatnne nunaan Aku ba kabatne ina ada bapamakanan. Aku bai nyuruh kabatnne puakng kaparatn, ana kabatnne pingsan ka maraga." ³³ Ja murit-murit-Te ka Ia: "Aya mae ka tampat sunyi nyian dirik bisa namu roti untu nganyangan na' urakng manyak nang sidi manyak jumbalah?" ³⁴ Ja Yesus ka kabatnne: "Sangahe roti nang ada ka kao?" "Tujuh," sahut na' kabatnne " ba ada agik sangahe ekok ikatn enek." ³⁵ Lalu Yesus nyuruh urakng manyak koa duduk ka tanah. ³⁶ Apas koa ia naap katujuh roti ba ikatn-ikatn koa, ngucap sukur, macah-macahtan iya ba mareatn iya ka murit-murit-Te, lalu murit-murit-Te mareatn pula' ka urakng manyak. ³⁷ Ba kabatnne samua makatn sampe kanyang. Tarus urakng ngomoan sisa tatakatn-tatakatn roti nang sisa, tujuh baku bainsi'. ³⁸ Nang bamakanan koa ampat ribu nang laki-laki, ina tamasok nang bini ba kamudak-kamudak. ³⁹ Tarus Yesus nyuruh urakng manyak koa puakng. Ia naik parahu ba tolak ka daerah Magadan.