¹ Ina' ge' aku nyian urak'ng nang bebas? Buke' me aku nyian rasul? Buke' me aku nyian dah aka' ne'e Yesus, Jubata diri'? Ina' ge' kita' koa asil pakarajaat'nku ka daap'm Jubata? ² Kade' bagi urak'ng lain aku nyian buke' rasul, tapi paling ina' aku nyian rasul nang ngajari' kita'. Kita' samua koa jaji panguat karasulanku ka daap'm Jubata. ³ Nyian aku mela diri'ku dari kabat'ne nang mariksa aku. ⁴ Memange kami nyian ina' muih makat'n ba nyocok? ⁵ Memange kami nyian ina' muih ngicak'ng sabikat'n nang sete' pamahaman iman, aya rasul-rasul nang lain, kamaru' nang sete' iman dan uga' ba Kefas? ⁶ Atau ge' si Barnabas ba aku ina' muih bakaraja? ⁷ Sae me nang suah bakaraja jaji tantara make duite babaro? Sae me nang nanami' kabon buah anggur lalu ia ina' nyacapi' asile? Atau ge' sae me nang mihara piharaat'ne lalu ia ina' nyocok ai' susu'e? ⁸ Banar ge' ina kade' aku nyian matakat'n parihal nyian nurut pakata taino? Ina' ge' Hukum Taurat pun matakat'n parihal nang sabaya? ⁹ Hukum Taurat suah nulis, "Ame sidi kita' ... karabo nang gi' ngirik gandum!" Memange karabo nang Jubata maratiat'n? ¹⁰ Memange Jubata matakat'n koa karena diri'? Memang banar, karana diri' ihanlah parihal nyian dinulis, barang ga' sae nang bakaraja ka papuk arus bakaraja ka daap'm pangarapat'n, nang ngirik aruse ngirik uga daap'm pangarapat'n onto' namu bagiat'ne. ¹¹ Kade' kami nabur banih rohani nang gagas ka antara kita', memange balabihat'n kade' kami namu parihal nang baik dari kita'? ¹² Kade' urak'ng lain ada hake ka kita', aduh agi' kami. Kami mareat'n dah samua'e supaya kami ina' jaji alangan pambaritaat'n Injil Kristus. ¹³ Ina' nauan me kita' kade' samua urak'ng nang ngarajaat'n pakarajaana nang baraseh kudus koa, makat'n pamakanan dari Radak'ng Jubata uga. Kabat'ne nang bakaraja ngalayani ka altar namu bahagiat'n uga' dari korban persembahan nang udah dinyangahat'n koa. ¹⁴ Aya kuihan uga'lah Jubata marentahat'n diri' onto' maritaat'n barita baik dari Jubata nang diri' bisa baca ka Injil onto' diri'e idup dari barita Injil kuihan. ¹⁵ Tapi aku ina' suah make sete'pun dari samua hak koa. Aku ina' nulisat'n parihal nyian supaya dipinjawat uga' ayakuihan ka aku. Labih baik ku mati daripada ada urak'ng nang ngilangan kabanggaat'ku. ¹⁶ Kade' sampe aku ina' maritaat'n kabar baik Jubata ka daap'm Injil, aku ina' alasan onto' nyombonganna' diri'. Cilaka sidi idupku kade'nya aku ina' maritaat'n sae koa Jubata Yesus. ¹⁷ Aku maritaat'n kabar parihal Jubata Yesus kàrna kamaoat'nku babaro, koa dah ada hane upahe. Kade'nya nyian buke' kamaot'nku babaro, nyian dah jaji pakarajaat'nku. ¹⁸ Kade' ayakoa, ahe unang upahku? Upahku, kade'aku maritaat'n parihal Jubata Yesus ina' ba upah ba ina' nyalahgunaat'n hak ku. ¹⁹ Walaupun suka'ati aku mao' ngahea' maan atas samua urak'ng, aku nyadiat'n diri'ku jaji amba onto' samua urak'ng supaya labih manyak urak'ng nang batobat. ²⁰ Ka daap'm pakomoan urak'ng Yahudi aku bisa minjawat diri'ku jaji urak'ng Yahudi, supaya aku bisa minjawat urak'ng Yahudi picaya ka Jubata Yesus. Bagi urak'ng nang idup ka babah Hukum Taurat, aku minjawat diri'ku ayakuihan uga' (tapi aku ina' idup ka babah Hukum Taurat) supaya aku bisa ngicak'ng kabat'ne batobat uga'. ²¹ Bagi kabat'ne nang idup ina' ka babah Hukum Taurat (buke'nya ina' ba hukum Jubata, tapi ka babah hukum Jubata Kristus) supaya aku bisa manangan kabat'ne tanpa Hukum Taurat. ²² Bagi urak'ng nang lamah, aku pun minjawat diri' lamah uga' supaya aku bisa manangan kabat'ne nang lamah tubuhe. Aku bisa taama' ka sigala situasi dangan supaya ba cara kuihanlah aku bisa maba urak'ng untuk batobat. ²³ Aku minjawat samua'e koa demi kabar nang gagas dari Injil supaya aku pun namu bagian kasalamatat'n uga ka Subayat'n. ²⁴ Nauan ge' ina' kita' bahwa kabat'ne nang batalama' ka daap'm sabuah patandingan samua'e siang batalama' tapi kahe seko' urak'ng nang manang? Kade'nya ayakoa, batalama'lah kita' sidi-sidi supaya kita' manang. ²⁵ Tiap urak'ng nang batanding, ia arus balatih sasidie onto' nguasai' diri'e. Kabat'ne minjawat ayakoa onto' nalama' mahkota nang kahe samintara, tapi kade' diri' ngago' mahkota nang kakal salamae. ²⁶ Angke kuihanlah, aku ina' batalama' kahe asal batalama'. Aku ina' ninju dangan aya urak'ng ninju angin. ²⁷ Aku bakueh kekeh ngalatih diri'ku supaya aka' aku maritaat'n parihal Jubata Yesus ame aku babaro ina' jaji salamat.