¹ Aku bai' sidi boh page kamaru', kita' ina' nauan parihal carita enek oyang diri' are', ayamae waktu kabat'ne siak'ng ari batono' rahu' lalu ngaintasi' laut aya'. ² Kabat'ne dimaptis di Musa ka daap'm rahu' ba ka daap'm laut. ³ Kabat'ne samua makat'n pamakanan rohani nang sabaya. ⁴ Samua'e siang nyocok cocokat'n nang sabaya. Sabape, kabat'ne koa nyocok dari Batu rohani nang sirage-rage ba kabat'ne, Batu koa diri' nyabut ia koa Kristus. ⁵ Biarpun ayamae, Jubata ina' saati ampir saparoe ba kabat'ne. Angke kuihanlah manyak kabat'ne nang dimunuhi' ka padak'ng. ⁶ Angkit'n parihal kuihanlah nang dinyadian pangalaman bagi diri' supaya diri' ina jaji urak'ng nang sau mao jahata' ihane. ⁷ Ame sidi kita' nyambaha' sigala na' pantak atau ahe pun nang buke' Jubata, aya nang sau kabat'ne pinjawat, soale ada tatulis are' jare "Bangsa na'un duduk basila' sambi makat'n ba nyocok, aka' koa umpat onto' kahe layo toa'-toa'. ⁸ Ame sidi kita' idup kampak'ng ba dangan, sarupa ba kabat'ne nang biasa ayakoa sampe ada nang mati toa'-toa' 23 ribu urak'ng manyake daap'm saari. ⁹ Diri'pun ina' muih nyobai' Jubata karna ada kabat'ne nang ayakoa ahire sampe mati di uar ngigit. ¹⁰ Ame sidi kita' bera-bera ina' tantu rudu karna ada kabat'ne nang ayakoa pun mati uga' dimangkarapot di malaikat. ¹¹ Parihal nyian bisa ditee' dari kabat'ne onto' dijajiat'n palajaran baraga, ditulisat'n onto' ngingatat'n diri' nang idup ka ahir jaman nyian. ¹² Angke kuihanlah, ame sidi ada urak'ng nang nyangka' diri'e dah kuat sidi, supaya ia ina' jantu'. ¹³ Ina' ada cobaan nang kita' cacapi' kacuali cobaan koa dah biasa onto' taino. Jubata diri' koa sidi setia, Ia ina' mungkin miarat'n kita' ngadapi' masalah labih dari kamampuat'n kita'. Ka daap'm masalah kuihanlah Jubata mare' kita' maraga muok supaya kita' cancik'ng ngadapi masalah koa. ¹⁴ Angke kuihanlah sigala na' page kamaru' ku, ame sidi kita' nyambaha' sigala na' pantak ato batu ato batak'ng kayu nang aya'-aya'. ¹⁵ Aku bakata sarupa ka urak'ng-urak'ng nang caradik ba tarigas, pikirat'n sigala ahepun nang aku matakat'n nyian. ¹⁶ Ina ge' cung barakat nang sau diri' syukuri' koa patamuan ba pacampurat'n diri' ba darah Kristus? Ina' ge' koeh nang dimacah koa panyatuat'n diri' ka daap'm tubuh Kristus? Kahe ada sege koeh, angke kuihanlah diri' nang manyak nyian kahe jaji sete'; ¹⁷ barang ga' diri' dah jaji bahagiat'n dari sete koeh koa. ¹⁸ Coa' tee' ayamae urakn-urakng Israel, ina' ge' kabat'ne koa makat'n asil panyangahat'n ka daap'm altar? ¹⁹ Jaji, ahelah maksudku ka dian? Banar ge' ina' sigala pamakanan nang udah dimareat'n ka Ibalis koa bisa mare' barakat? Atau ge' sigala na' pantak kakoa bisa mare' barakat? ²⁰ Ina'. Aku matakat'n ka kita' kade' sigala nang urak'ng-urakng bareat'n jaji panyangahat'n, kabat'ne koa mare' makat'n sigala roh jahat, buke' onto' Jubata. Aku bai' sidi' kade' kita' nyarahat'n idup kita' ka Ibalis. ²¹ Kita' ina' muih sidi nyampur ai' ka cung panyocokat'n kita' dari Ibalis ka Jubata. Kita' ina' bisa macampurat'n pamakanan nang dari Jubata ba Ibalis. ²² Ina' ge' jukut ayakoa ana minjawat Jubata jaji nimuru bera? ²³ "Sigala macam jukut memang dimuihan," tapi ina' samuae baguna. Sigala macam jukut memang dimuihan, tapi ina' samuae bisa batumuh baik. ²⁴ Ame ada seko' urak'ng pun nang ngago' sigala nang baik onto' nya babaro, tapi arus babagiba nang laine. ²⁵ Makat'nilah sigala nang dinyuai' ka pasar sigah angat, ina' arus dipariksai' doho', demi ati nurani. ²⁶ Tanah nang diri' ninyaki nyian ba sigala insi'e koa ampu'e Jubata. ²⁷ Kade' ada urak'ng nang maba kita' basaroh ka rumahe lalu kita ampus, makat'nilah sigala pamakanan nang kabat'ne bareat'n, tanpa arus dipariksai' doho', demi ati nurani. ²⁸ Tapi, kade' ada urak'ng nang bakata ka kita', Pamakanan nyian udah dimareat'n ka Ibalis," ame dimakat'n, demi urak'ng nang mare' nauan koa ba demi ati nurani. ²⁹ Maksudku koa buke'nya kahe demi ati nuraninyu tapi ati nurani urak'ng lain uga'. Ngahe me kabebasat'nku ditantuat'n di ati nurani dangan? ³⁰ Kade' aku naap bagiat'nku ba rasa syukur, ngahe me' aku jaji dinyalahat'n karna pamakanan nang aku narima' ba barucap tarima'kasih? ³¹ Antah ge' kita' makat'n atau ge' nyocok, atau ahe maan nang kita' pamuat, pinjawatlah samua'e koa kahe onto' Jubata. ³² Ame jaji batu nang gia minjawat dangan rabah tasongkop, antah ge' koa urak'ng Yahudi, urak'ng Yunani, atau ge' urak'ng nang udah picaya' ka Jubata, ³³ aya aku uga' barusaha tarus nyanangan ati manyak urak'ng, tanpa ngago' kauntungan babaro, tapi bapikir ayamae urak'ng lain diuntungan supaya kabat'ne koa salamat.