¹ Angkit'n parihal pangomoan duit onto' urak'ng-urak'ng kudus, pinjawatlah sasuai ba patuah-patuah nang udah aku mare'at'nka jemaat Galatia. ² Satiap minggu, ari nang partama, tiap kita' arus nyisihat'n duit atau ge'nya barang lalu naruhi'nya sasuai ba pandapatan nang kita' namu supaya kade' aku atak'ng samua'e udah ada onto' dibareat'n. ³ Waktu aku atak'ng, aku mo' nyuruh kabat'ne, saepun nang kita' satujui', sirage ba surat manyurat kita' onto' ngicak'ng pamare' kita' ka Yerusalem. ⁴ Kade'nya saaruse aku ampus, kabat'ne mo' ampus uga' sirage ba aku. ⁵ Aku mao' atak'ng ka kita' aka' ngalewati' Makedonia barang ga' aku bamaksut onto' ngalewati' Makedonia. ⁶ Mungkin aku mao' badiap'm sirage ba kita' atau ge'nya ngabisat'n waktu salama musim dingin nyian supaya kita' bisa nuuk'ngi aku ka pajaananku, kamaepun aku ampus. ⁷ Aku bai' sidi kahe neea' kita' kahe sabantar hane. Aki baarap sidi aku bisa diap'm ka antara kita' sadikit labih lama, nang koapun kade' Jubata mare' ijin. ⁸ Tapi, aku mao' badiap'm ka Epesus sampe ari Pentakosta, ⁹ karna pintu nang ibar onto' ngarajaat'n pakarajaan nang labih panting udah tabuka' bagi aku, walaupun manyak nang balawanan. ¹⁰ Angkit'n, kade' Timotius atak'ng, usahakanlah supaya ia ina' marasa gai' waktunya sirage-rage ba kita', karna ia koa ngarajaat'n pakarajaan Jubata uga' aya nang aku ngarajaat'n uga'. ¹¹ Ame sidi ada urak'ng nee' ia kahe sabaah mata. Tuuk'ngi ia sidi-sidi daap'm pajalanane ka maraga supaya ia bisa puak'ng agi' ka aku. Kami ngantiat'n ia sirage ba samua page kamaru' nang ka dian. ¹² Angkit'n parihal kamaru' Apolos, aku sidi-sidi nyorong ia onto' nyarohi' kita sirage page kamaru' nang lain, tapi ia bai' sasidie atak'ng angkit'n. Ia mao' atak'ng kade' ada waktue ana. ¹³ Ati-atilah nongkak'ng, tatap badiri kuat daap'm iman picaya' kita ka Jubata. Jajilah sarupa urak'ng laki nang kuat. ¹⁴ Ahepun nang kita' karajaan aruslah dasar samua'e koa kasih. ¹⁵ Aku sidi ngijaki' kita' boh page kzmaru', (kita' nauan ayamae saluruh insi' rumah na' Stepanus koa buah partama sakai ka Akaya, kabat'ne udah ngabdiat'n diri'e onto' ngalayani' urak'ng-urak'ng nang kudus), ¹⁶ supaya kita' pun tunuk uga' ka urak'ng-urak'ng nang ayaian dan uga' ka samua urak'ng nang mao' bakaraja bakueh kekeh sirage-rage. ¹⁷ Atiku repo sidi waktu Stefanus atak'ng, Fortunatus ba Akaikus karna kabat'ne udah ngalangkapi' ahe nang ina' ada ka kita'. Kabat'ne koa banar-banar nyagarat'n rohku, uga' rohnyu. ¹⁸ Angke kuihanlah, kita' udah saaruse tunuk ka urak'ng-urak'ng nang ayakoa. ¹⁹ Jemaat-jemast ka Asia nyampeat'n salam onto' kita'. Akwila ba Priskila nyampeat'n salam ka kita uga' ka daap'm dama Jubata, sirage ba jemaat ka rumah kabat'ne. ²⁰ Samua page kamaru' ka dian ngirimi' kita' salam uga' onto' kita'. Batakat'n salam ka samua'e ba idungan nang sinunuh. ²¹ Aku, Paulus, nulis salam nyian ba kokotku babaro. ²² Kade' ada urak'ng nang ina' sayak'ng ka Jubata, labih baik nya mati. O, Jubata, atak'nglah ijaki! ²³ Barakat dari Jubata Yesus salalu ada ba kita'. ²⁴ Sayak'ngku salalu ada onto' kita' ka daap'm dama Jubata Yesus Kristus. Amin.