¹ Oleh gana hio, kuki, ulun sa depenjara gana Tuhan, nyuju kayo de welum sapadan nihi pangaherau sa haot kayo tarima. ² Nihi sagala kamurahan aheng dan kalembutan, nihi kasabaran, saling nanggung beban huang kasih, ³ ba usaha sa kuat tanaga de malihara kasatuan Roh huang hurukan damai sejahtera. ⁴ Ekat naan isa tenga dan isa Roh, sama hal e katika kayo de herau nihi isa harapan neke herauwan ko, ⁵ isa Tuhan , isa iman, dan isa baptisan, ⁶ isa Allah dan Ambah neke kaluhan, sa ta entu kaluhan e, nangkah kaluhan e, dan nihi kaluhan e. ⁷ Gana hio, nihi taka masing-masing de ami anugerah sasuai nihi ukuran karunia Kristus. ⁸ Hio lah gana e, de pander, "Katika Aye mambai gi uneng sa entu, Aye nyaput ulun-ulun sa de tahan, dan ngami e karunia gi marasia ." Mazmur 68:19 ⁹ Katika de pander, "Aye mambai," bakoi kah hio baarti Aye lei haot minau ge bagian leba bumi? ¹⁰ Aye, sa minau, Aye lei sa mambai lebih entu neke kaluhan langit supaya Aye memenuhi sagala sesuatu. ¹¹ Aye yo sa ngami, maeh rasul-rasul, nabi-nabi, pahampe-pahampe Injil, gembala-gembala, maupun pengajar-pengajar, ¹² da ngalengkap ulun-ulun kudus huang gawian pelayanan de ngabangun tenga Kristus, ¹³ hampe taka kaluhan mencapai ka isa iman dan pangarasa nihi Anak Allah, aye yo marasia bewasa, manurut ukuran tingkat panumbu sa sesuai nihi kepenuhan Kristus. ¹⁴ Dengan demikian, taka bakoi lagi nakia-nakia sa deombang-ambing awi galumbang dan de tunda giti garo oleh ba macam riwut pangajaran, gana tipu daya marasia, gana kacerdik nihi panipu sa ka licik. ¹⁵ Sabalik e, mamander kabujur huang kasih, taka tau tumbu huang kaluhan hal gi Aye, sa ayelah ulu, aye hio Kristus. ¹⁶ Neke aye-E kaluhan tenga ta susun dan de huruk basama-sama jari isa nangkah ganjalan satiap uku. Jaka masing-masing ngagawi bagian e, tenga tau bahante sahinga pasele tenga e kakarep huang kasih. ( Cara Welim sa Bujur huang Kristus ) ¹⁷ Gana hio, kuki bapander dan tegaskan huang Tuhan, ada lagi kayo welum kalah ulun -ulun sa bakoi percaya, sa welum nihi pikiran sa sia-sia. ¹⁸ pengertian ire jari mieng dan tapisah neke pamelum Allah gana ka bingung sa naan huang tenga ire sa de ulah gunen kakaras aheng. ¹⁹ Prasaan ire haot batur dan ire nyarah tenga nihi hawa nafsu de ngulah sagala macam kecemaran nihi kasarakah e. ²⁰ Akan tatapi, lain nihi cara kayo balajar tentang Kristus. ²¹ Saumpama kayo memang haot ngarengey tentang Aye dan de ajar huang Aye, sa kalah awe kabujuran sa naan huang Yesus, ²² umpelah marasia lawah ko sa kayo halu neke cara welum ko sa lawah, sa rahat de rusak gana hawa nafsu sa manipu. ²³ Panabio roh pikiran ko. ²⁴ Pakailah marasia sa bio, sa kana cipta huang rupa Allah huang kaadilan dan ka kudusan sa sejati. ²⁵ Oleh gana hio, nihi ngumpe kapalsuan, ayu satiap taka bapander nihi kabujuran gi sasama ko gana taka sama-sama anggota neke isa tenga. ²⁶ Sangit bo dan ada ngulah dosa. ada ngulah mate andrau leteng huang kanyangit ko. ²⁷ Ada ngami kasempatan gi setan. ²⁸ Ulun sa haot ngalat, ada ngalat lagi. Labih maeh amun kayo bagawi dan ngulah ngawiyan sa maeh nihi tangan e kakarep de aye ngampun e sesuatu de payak gi ulun sa mamerlu e. ²⁹ Ada ngulah panderan sa raat balua neke wawa ko, tatpi ekat panderan maeh sa ngele ulun sa mamerlu e sahingga panderan ko hio ngami berkat bagi ire sa ngarengey e. ³⁰ Ada ngaharung Roh Kudus Allah, sebab gana Aye kayo de materaikan de andrau penebusan. ³¹ Umpe sagala macam kapaitan, kagaragiten, kasangit, pertikaian, dan panderan fitnah, nihi kaluhan kajahat, panalawit hio neke kayo. ³² Basikap bo maeh isa nihi sa lain, kanaampun aheng sa maeh, dan saling bakakampun, sa kalawe Allah huang Kristus ley ngampuni kuki.