¹ Wate Yeisu iye'ale be iyeita Galili sewasewa mwamwanai. Kaleya gwauidi sitowa sakosakowasi yana to siye'ne'nene Yeisu waga deinai igeluna to siguna pwaisina to i towa soluna waga solanai. Kaleya gwauwidi awa lalai. ² Iye gwaisedina gwaina paula gwae wanawanagaeyega, deinanega Yeisu igu yedina. ³ "Aenene, tau kaikeda i tauyana to idauni ewanina. ⁴ Aidi ewani i yausidina to biwe si tauyamaina to si yaidina. ⁵ To aidi ewanidiyao, i yausidina baleu logulegulewana deinai, si bwala pwaesina to lamudi nigea si yabiabisolu. ⁶ Tó totutaina ala iyalana, si mwadoyaina to si yasinena. ⁷ Aidi ewani i yausidina baleu uweuwebubuina deinai to malamalawedi sibwalana to si saili uyosiana deinega nigeya si uwauwa. ⁸ Aidi ewani i yausidina baleu gitamuna deinai to si bwala pwaesina, to si koiyawena to watei si uwana aidi teti, aidi sikisiti, aidi analedi matupwadi." ⁹ Yeisu iguyedina, "eguma mateniyamiu deinega ada enene." ¹⁰ Mei tutaina deinai Yeisu taunamo, to taudi wate aidi to towa selabe maeyanao, aido watei ana toeganumeyao, si enaidena Yeisu deinai gwae wanawanagai sabina. ¹¹ Yeisu i gwaena deinadiyai, "yomige deinamiyai Yatodi na ebe loine aonaonapui, to taudi atamanai gwaewanawagai deinadiyai. ¹² To deinega si itaiyana, o, si duneyenana to nigeyana si'taita, deinega eguma si nonoiyana, o sinono to nigea sionaonapui o eguma si nuwaebuni Yatodi i nuwa samuidi." ¹³ Yeisu i gwae, "yomige nigea aonaonapui gwae wanawanagai? Sidoi gibwa gwae wanawanagai gwauwina a'onapuisei. ¹⁴ Tobaguli i yausiana Yatodi na noyao. ¹⁵ Nai taudi si beuna aiwalo selabenai, gwaenina si bwalana lesina si nonoiyana lomaniniyega to seitani i tauyamaina noyaidiyao si yausiana gwauina i 'ewayauledina. ¹⁶ Taudi ewanaidiyao si yausidina lodabwadabwana baleu deinai, to eguma gwaenina lomaniniyega si ewaiyana deinadiyai gibwai aliyaya si lobai. ¹⁷ Taudi si yewaiyana to nigeya idoidolodimo deinega di towa nigeya dudulana. Deinanega eguma ebeto'owao si pwaesi deinadiyai gwaenidiyao sabidi iyabe si lomaniniyega si loegoyoka. ¹⁸ To aidi si yausidina malamalawedi debanai. Taudi gwae si nonoiyana, ¹⁹ To di pesiyao baleu na paulao adi nuwanuwa be adi esaesao be mali paulao sabidi deinega gwaenidiyao si etobodedina deinega nigeya sawesawenai be iuwa aia'li. ²⁰ Taudi si sausidina baleu gitamuna deinai namei gwae si nonoiyana aido si lobaiana si uwa aiailina-idi teti, aidi sikisiti, aidi analedi." ²¹ Yeisu i gwaena deinadiyai, "isai mayale u luiyenana lobe solanai aido geyaka kayanai, o kaitawau solanai u sauniyana? U latuwe naebetowa deinai usauni. ²² Nigeisai yage ikwai o nigesawenai be u mwalatoni o nuwana tuwesi tuwa si kwaikwai gibwa si latuyusi maimaideyai. ²³ Teitaidi ma teniyadi be si enene, tuwa sienene." ²⁴ I gwaena deinadiai, "a'waguli aido aenene, sidoi gwae u sauisenana eyayo deinai iyabe nidoisana wate i'lama deinamwai, to mabweine i loeposeyanei. ²⁵ Lesinaina teitai i 'ewaiyana, mabweina gwauwina iewai, teitai nigeyana, tauna deinai mabweina i 'ewailai taunina ana ebwaya." ²⁶ Yeisu wate i gwae, "Yatodi na ebeloine ana ita neisana soibwata kaideda ewani i yausiyana baleuwai. ²⁷ I 'abui aido itolo goluwana be mwedudu, abwa ewanina i tupwalatuna to i bwalana. Leyawamo isai na anapumo. ²⁸ Baleu taunamo uwaina i sausauni: nugeta i tupwa latu, to teniyanai bebaina i sauni, adio bebainina i kwausi. ²⁹ Taunamo bebainina i kwausi to taniwagana lomaniniega i sau 'elatu naebe upwa lesinaina mamasalai i telatu. ³⁰ I gwae limanina, "tuwesi ana lobwene be i 'eleleya Yatodi na ebeloine deinai, aido wate to gwae wanawanagai iabe taepaisewei be deinega ta abi emaimaide? ³¹ tewa pouna, tutaina i dauniana to ewani soladiega tauna giyokutauna baleuwai. ³² Maetamo tutaina si dauni, i bwala latuma to iye kaiwe koiyawe tauna begulina maiboana deinai to lakanao adi ita gitamudi si pwaesi. To deinega biwe galewega sawesawenai be dineu si guinuwai kaiweina yauyaukwanai." ³³ Gwae wanawagai gwauwidi nai neisana deinega i guyedina, be deinega nuwadi ida sabwalena, ³⁴ to nigeisai gwae gwaewanawanageiyega i guyeguyed. To di atuwauwai, i yabi'emaideiyana na tomoliyao deinadiyai. ³⁵ Mei mweduduina deinai be i goluwana, i gwaena deinadiyai, "Tabala malisenai". ³⁶ Giliyewa si yebesinadina, to na tomoliyao Yeisu si yauliyana meiyadi si tauyana kaibwaiyai, tuwa neisana, aidi kaibwai maeyadiyao watei. ³⁷ Medeinai lisu be yagila koyawena, yagila i lasalasa kaibwai solanai, todega kaibwainia giyokunamo be waupa iloeima. ³⁸ To Yeisu taunamo waga guinai, i teyabui mate naebe yabuiyai. Si luwanoiyana, si gwae, "toegwaise, nuwana nigeya uda nuwanuwana edeto iyabenamo be ta mwausi?" ³⁹ I'to'lona, to yagila i gosoiyana, I gwaena wola deinai, "siwaloi! Be daumwali! Me deinai yagila i losauna, to daumwali i beuna." ⁴⁰ I gwaena deinadiyai, "tuwesi sabina a enuenuwanaluwa? Sidoi to nigea mi yemidimo?" ⁴¹ To subuli koiyawena i loemaidina to deinega taudimo si guye ile'ledina, "teitai nai, to deinega yagila belisu si omayabenana?"