¹ Yisasi ma mai varu me ampiren Yudia' barafa ba' Yodeni' non akhempa' ba' ma orin maen banasi ano vanasi ano ve'i vainta' oren mino. Onobin bei avu'avasi'en evara'nen betin afove amen mino. ² Afova amiyan Farasisi khayo ano ve'i vainta' eriven be'in akhenoka uan onano van temi', Kana' be avafu ano ve ana' tiantanten nafino, sen be'i inaemi'. ³ Ina ikan be'i evera'nen betin tiamemi', Na'iesa' ten Mosesi akonara' tiretin tiamikhen nafino. ⁴ Ma'a sikan bati semi', A'esin na' banta ano yurafurin bompon uvaman be ana' amiren na' tiantano sikhen mino. ⁵ Tiretin au' akona oniyaken mai vami Mosesi mai man baya uvaman tiretin amikhan mino, sen Yisasi vetin tiamemi'. ⁶ Ma'a sikan mifo mino' dana' ma arai'en uvareinta'i Ayarafenu ano vanta va' anasi va' uvanten mino. ⁷ Mai vara' banta ano ve ano'e afo'en me ampiren na' be ana' ba' manafin damukhen bano. ⁸ Baken mi mikan mano maman mana vukhafai' intemi'. ⁹ Ma'an tukhantin Ayarafenu ano ma asotu' uranain ida va' banta ano auban durafurono. ¹⁰ Ma'a siren ma'naumpin ma vare' ikan eyo iyampon kayo ano maima siamein baya khayo van be'in evara'nen inaemi'. ¹¹ Ina ikan temi', Iye ano' be ana' me ifa' uren ena nanin baranten nafi mai ve'i mai nanin ma'i famuku avu'avasi'en mino. ¹² Mai nanin mano ma ve avafun me ifa' uren ena vanta varanten maen maima varanain banta va'i famuku avu'avasi'en mino. ¹³ Ma'a siran beti' akhafana a'nonta' ayan kainovan be'i vainta' aviren erin mifo eyo iyampon kayo ano vetin ase mino. ¹⁴ Asin mifo Yisasi oman afova' iyaken ida amusin iyan betin tiamemi', Ma'an keka' inan Tiyarafenui yafisin ban mifo a'esin erino. ¹⁵ Ma fura vayan tiretin tiame' uno, iye ano' arara' iyampon anden na' Tiyarafenui yafisin ida varanten nafi, mai fura uronten ida o'dinten mino. ¹⁶ Ma'a siren arara' iyampon kayo avi'an ayampin daumaren a'nonta' ayan kaudiyan avu uanten mino. ¹⁷ Avu uanta'den ma me ampiren bei yoranta' oriyan maen mana vanta ano savaen ben anafin mun aron durafuriyan inaem'. Kama Aru soe, Na'i avu'ava' ma varante sa' para oriyan ban aunan barante rafuno. ¹⁸ Ma'asen ina ikan Yisasi semi', Para' te'inan kamae se' tariya fono. Ida mana ano kama ukhein mifo Tiyarafenu veyaka' ana ino. ¹⁹ Man baya khayo fova' ukha ono, I'da va' ena aruan purono, ida va' pamukui' ono, ida va' umoyan barano, ida va' kampun baya varen nono, ida va' ena ina yanasinta aranano, ano'e afo'eni vaya va' ineno. ²⁰ Ma'a sikan mai vanta ano semi', Aru soe, Tesi fumarara' ma vake' mai yanasinta yakhake' uno. ²¹ Ma'a sikan Yisasi ma ve'in mo oniyaken be'in ava'ba' iyan tiamemi', e'i mana yanasan o afa' ukha ono. E'i ma yenan yanasinta sari' ure va' ona i van nanin banta amire mae inarufa' kama yanasinta yesin banten mino. Ma'an turante va' ere se'in dakha fono. ²² Ma'a sikan mifo mai vaya khayo iniyaken be'i khokhon ona yan ba'in pasen inin ariyan me ampiren oren mino. ²³ 25 Yisasi ma onen eukiyan bei eyo iyampon kayo siamemi', Kokhon ona ma yan bain keka' ano ma Tiyarafenui yafisimpin odin uman dakhen mino. ²⁴ Ma'a sikan eyo iyampon kayo ano veni vaya khayo van anoma' iniyakan mifo Yisasi vetin evara'nen tiamemi', Iyampon kayo oe, Tiyarafenui yafisimpin ma odin uman dakhen mino. ²⁵ Kameri ano ma ufi ankufin e yuvinin asamana ukhen mifo kokhon ona ma yantin ban nain keka' ano Tiyarafenui yafisimpin ma odin uman dakhen mino. ²⁶ Ma'a sikan mai iye ano' ayun para van aunan barante'ina' tino sen anoma' iniyaken beraran ten orera emi'. ²⁷ Ma'an tiyan Yisasi vetin oniyaken temi', Bantai ininta' uman dakhen mifo Tiyarafenui ana ida ino. Para vara seyo mino' dana' Tiyarafenui ininta' asamana ukhen mino. ²⁸ Ma'a sin maen Pita arai'en be'in ma' baya semi', Mino' dana' me ampire' e'in dakhafe' no' umpo sonano. ²⁹ Ma'a sikan Yisasi sami', E'in purase' tiame' uno, Ida mana ano sema' mono' baya varo sire e ama safi afa' ava'en nafi aunana fi ano'e afo'en nafi akhafana fi varafi, ³⁰ Inka' ida mana ano ma varafin antareti yada' e santare miyan barano'. Inka' ida mana ano ma' ba' afa' ava'en ma' aun ana va' akhafana va' bara va' inka' uman baranona vasan tiyake i'naimpa' ma erinain barafin ida khipan aunan barante' uno sinono. ³¹ Ma'a sin nampo ese' ma va'in nain keka' ano i'naini' intin i'nain ma va'in nain keka' ano esesi' intin inten mino. ³² Beti ankan Yerusaremi' ma odin aasa' oriyakan Yisasi maen betin an uanten oriyaremi', Oriyakan eyo iyampon kayo ano sakha iyan maen maima vetin a'nain dakhafen oriya'ein keka' ano akhokhovan en mino. Maira' Yisasi tuerufu (12) eyo iyampon avi'an akhempa' mo khau'den maima ida ayaka' baken ma ven amanina' afoka' inain dansinta van arai'en betin tiamemi'. ³³ Onano, Yerusaremi' odiya' tiferuna Vanta Anin Avi'an mono' a'non kheka' ba' man baya ma afova' ukhein kayo va' ayampin aminten mino. Amirantin beti' ankan be'in furin uman amiren ena anan nanin banta ayampin aminten mino. ³⁴ Amirantin be'in maka' maaka' uren aufen akhare siyan dafiyo' anka'den be'in aruan purintemi'. Aruan pu'dantin maen kanu' manau' (3) damu' oyampake' be'i e mantanten mino. ³⁵ Yebedin anin kan Yemisi nu' Yoni nu' ano ve'i vainta' edaven temi', Aru soe, seti ma mai avu'avasa' barano ma senuna yanasa' barano. ³⁶ Ma'a sikan betin tiamemi', Na'i avu'avasa' tiretin nina mamantante rafuno. ³⁷ Ma'a sikan beti semi', Ei khakhan ma vare erinona yamu' ema' bano van muno. Mana ano ei ayan opa' kumanekun ena ano ayan kurompa' kumanintin inovan muno. ³⁸ Ma'a sikan mifo Yisasi evara'nen tiamemi', Tire' kanan ma ina iyaona yana' ida afova' ukha ono. Te'i ma nanuna non ma' mono' non ma feranuna va' kana' barante fono. ³⁹ Ma'asen ina ikan beti' ankan be'in tiamemi', Teti khasae' barante' uno, sikan Yisasi vetin tiamemi', Maima nanuna non niyake inka' maima feranuna mono' non tiretin ma'i feran nono'. ⁴⁰ Pera nompo iye ano' tiyan nopa' kumaninten nafi a'a siyan kurompa' kumaninten nafi mai ida sentina vanti' amente' uno. Ida amente' umpo inte'a kheka' ina uta iyanten nafi mai vetin nina ino. ⁴¹ Ma'a sikan tiyan mikan eyo iyampom kayo ano mai vaya iniyan Yemisin nu' Yoni nu san kakanta' aranan uanten mino. ⁴² Yisasi vetin o aran kauden temi', Tireti afova' enan ena anan nanin bantara' safiseno van kain baken a'nonta' ma vain keka' ano vetinta' dafise' iyan mino. ⁴³ Ma'ante iyan mifo siretin aubana' idava' mai avu'ava' bano. Iye ano' tiretin aubanake' a'nonta' bano van inten nafi mai ano sireti'i yoran banta va' bano. ⁴⁴ Inka' iya ano' tireti' aubanake' ese' an banto' uno siren ininten nafi mai ve'i sireti'i yoran banta va' bano. ⁴⁵ Mai fara vara seyo veni yorari' ono vara Vanta Anin mano erikhen naifo ve'i ano sireti'i yorari' iyan inka' bei aunampo kokhon nanin banta miyani' ono vami erikhen mino. ⁴⁶ Mai vaya khayo e siamen oriyan Yeriko' o unen mino. Yisasi ma vei eyo iyampon kayo va' kakan nanin banta va' mai varu me ampiyan maen Timaiusine sin Batamiusin anin mano au yufukukhan baken mana'a yanasan inan tiyain bare'in aa akhempa' kumantami'. ⁴⁷ Baaren inikan Nasareti' banta Yisasi ino ma sin iniyan ovararen temi', Devitin Anin Yisasi oe, arunan usintano. ⁴⁸ Ma'an ma sen oovaran maen bempake' bano van kokhona' ano au yufukukhein banta asemi'. Asin mifo ve'i moeken ba'diyan Devitin Anin oe, arunan usintano sen oovaren mino. ⁴⁹ Oovaran Yisasi maira' o mantaven mai vanta van arantin be vainta' erino van temi', Ma'a sikan beti' ankan au yufukukhein banta van temi, E'in mi ariyan mifo akona vare mantano. ⁵⁰ Ma'a sikan bei yante afuin me akhempa' karudiyan ainen e manten Yisasi vanta' eren mino. ⁵¹ Erikan Yisasi ve'in evara'nen tiamemi', Na'inasa' e'in mamantante rafuno. Ma'a sikan au yufukhein banta ano semi', Aru soe, Tu mabe' onano van muno. ⁵² Ma'a sikan Yisasi ve'in tiamemi', Ei mumunan mano e'in ayofen mifo orono. Ma'a ma siyain ma' anan kasaen oniyaken be'in dakhafen ayana oren mino.