¹ I gubuak arunanai, Sisa Ogastus gikab lo mangan gisu garam sagat mpai ragurun i Roman gavman yakab bingan kurinai gan. ² Nanai gubuak marasamub i yaku garam sagat guzun sib, karunanai gikas i gubuak Kwarinias mpai gavana provins Siria gan. ³ Gisunanai ka basnta-sinta yaha i parat kintamp kurinai gan i yakab bingan. ⁴ Josep anai kuri gan King Devit kuri gan anai, gisunai ka i girit i taun Nasaret i Galili ka giha Judia i Devit taun gan, bingan gan Betlihem. ⁵ Wat Maria gihan i yakab bingan. Maria gawangkun, sagat arunanai kuri gikab i yahuarr ayang. ⁶ Gubuak kurinai gikas Betlihem, Mria gubuak gan i yaku gariak gikas. ⁷ Tagurr garam bagigiangk yah gihuangk sib ka rum miya gisunanai ka kurinai giha gigiangk tagurr bulmakau gan, ka i gkiu gariak marub marasamub gan, i gi hangka sib i buru ka i gikab i giha wasak i bokis nam bulmakau gan. ⁸ I mikuan arunanai, garam kab maran i sipsip rugigab maran i sipsip i taun Betlihem parat gan. ⁹ Hangira mangan gikas i kurinai, na pisit Anutu glori gan gihangka kurinai, ka kurinai giguan nizun. ¹⁰ Ka hangira gini wat kurinai, "Agam wangkit i guan ayang, zii giku hup mimungk giba agam in ka hup arunanai yakab sampan nu ayang nizun wat garam sagat santan." ¹¹ Karunani i gubuak arunanai i devit taun gan, sagat mangan giku gariak. Gariak arunanai yaku garam sagat santan zua. Nanai garam Raham Kirisi! ¹² Agam maran yararab nizun yasunani. Gariak mangan kuri giharu wat buru in gigiangk i humm gayah ¹³ Bisab tak garam-ragiab santan gan-hungkun gan giba in gimpai wat hangira arunanai ka gisapi Anutu bingan gan giha wagaungk in ginia, ¹⁴ "Gisapi Anutu bingan gan wagungk nizun, ka kintamp garam sagat yampai sampan nuayang, Anutu sampan mimungk i kurinai." ¹⁵ Gubuak hangira gingkit i kurinai ka giha ganhunkun, kuri kaping sipsip ginya, "Nahan agi naha Beylihem ka agi naha nararab aus naya gikas, i Garam Raham gini wat agi igin." ¹⁶ Kurinai gihan gahigun i yararab Maria wat Yusip, ka kurinai gararab gariak narun gigiangk hum ganang kiruak gan gah yah. ¹⁷ Gubuak kurinai rurarab ayang arunai, kurinai gini harab i wah suaus hangira gini wat kurinai i gariak arunanai. ¹⁸ Ka garamsagat gayangua hup suaus garam kaping sipsip niya gayang, kuriinai wayant marikum. ¹⁹ Ina Maria gikab hup anai sib i sampan gan ingka maran rugihuarr. ²⁰ Kuri kaping sipsip giha zua, ka kurinai gisapi Anutu bingan gan i wah suaus kurinai rarab ayang ka yangua gayang. Wah manga-mangan gikas gisu hangira niya wat kurinai. ²¹ I gubuak 8-pela kiurikian gan i rinangk kua gayang, kurinai gagumam i rinin, ka gini i bingan gan Yisu. Bingan arunanai hangira gikab wat i gubuak rinan gan mami ku sampan. ²² Gubuak yasu hak i Anutu maran gan rugizama, gisu Moses niya gayang. Ka Maria wat Yusip giku gariak giha tagurr sunta i Jerusalem i yakab wat Garam Raham. ²³ Kurinai giragi hup guzu-gayang gisu Garam Raham niya wat kurinai, "Gariak marasamub sib rinan kua gayang kurinai nakab i naha Garam Raham." ²⁴ Kurinai gikab pumu ka giragi gisu hup-guzu-gayang Garam Raham gan niya gayang, "Gikab buirr hirukangkkua gisu pumu." ²⁵ I gubuak arunanai garam mangan gimpai Jerusalem, bingan gan Simion, ka garam arunanai gigab kandaham mimungk ka gihis mint i Anutu. Nanai giharrwi garam Anutu gikab ayang i yakab sampan mimungk i kuri Israel. Ka marapayam gimpai wat kurinai. ²⁶ Hangira rugini wat gisunanai, i ma yamamp ayang yah higun ayang amuk. Miya, i yararab Garam Raham Kirisi gin. ²⁷ Hangira gitak i Simion ka i giha wasak i tagurr sunta. Ramangk wat rinangk gariak Yisu gan giku Yisu gihan gisu hup-guzu gayang gisu Moses niya gayang. ²⁸ Ka Simion gikua in gigab i bangkian gan ka gisapi Anutu bingan gan, Ka gini gisunani, ²⁹ "Garam Raham karuni agu yakab garam gab agu gum gam yaha wat sampan nuayang, gisu agu hup gam niya gayang. ³⁰ Karuni zii maran gangk girarab wah agu gini gab ayang i yaku agai zua, ³¹ Agu rugimarigin i garam sagat maran gan. ³² Pisit mangan giba gini hup gwap ayang harab wat garam-sagat, ka i yakab bingan raham i Israel, nanai garaam-sagat agu gam. ³³ Ramangk rinangk gariak anai gan wayant marikum i hup suaus kurinai yangua gayang. ³⁴ Simion gikab hup bumurr mimungk wat ka gini wat Maria rinan gan ka gariak gan, "Wayangua,gariak arunanai Anutu nungk gikab i garam sagat santan Israel yapuruk ayang ka santan yatak hirun zua. Nanai yakas yasu nangkias mangan garam sagat ma gikab nuguan igin amuk. Ka wayant gwap ayang garam sagat santan yakas pisi-payat. ³⁵ Ka agu yaku barabin mangan raham nizun, gisu bungak maran pua gayang in gigumam i ganun gan. ³⁶ Sagat profet mangan bingan gan Ana gawa rugimpai. Nanai gari-kinam Panuel gan i kuri Asa. Nanai mugui nizun. Nanai nungk gisu gabuan ka gimpai 7-pela krisimas wat gabuan gan. ³⁷ Ka i gimpai gisu sagat gabuan rumamp ayang ka gimpai 84-krisimas giha yah. Ana ma gingkit i tagurr sunta gamuk, i gini-ni miya i ganangkiruak ka giyu, i mikuan wat gubuak. ³⁸ I gubuak arunanai Ana giba simpingk i gariak ka gikab sampan nuh ayang(tenkiu) wat Anutu, ka i gini gariak arunanai hup harab wat garam sagat harrwi Anutu yaku garam sagat Jerusalem. ³⁹ Gubuak kurinai nang wah manga-mangan sib gisu hup haru gayang Garam Raham niya gayang, kurinai giha zua i Galili, i Nasaret anai kurinai taun gan. ⁴⁰ Ka gariak gisu raham ka giku bumurr. Ka giku wayant mimungk ingka sampan nu-ayang(marimari) Anutu gan gimi wat. ⁴¹ I krisimas mai-maik ramangk rinangk giku Yisu giha Jerusalem i yararab gubuak raham passova gan. ⁴² I gubuak Yisu gisu krisimas 12-pela, kurinai garagi hup haru gayang i huank ayang ka kurinai gitip giha Jerusalem zua. ⁴³ Gubuak raham mint gan sah ayang ka kurinai gitipm giha parat gan zua. Ina kuri samuak arunai gitip gimpai zua i Jerusalem, ka ramangk rinangk gan ma girarab gisu i mpai ayang amuk. ⁴⁴ Kurinai ginibi i banu wat kuri hiruk gan wat bagayang rugubuak mangan gihan. Gingan kurinai gisurigin gin wasak i kurinai gan. ⁴⁵ Ina kurinai ma girarab amuk. Ka kurinai gigarrwi gin giha Jerusalem zua. ⁴⁶ Tamurr i gubuak hirukangkua-basinta, kurinai gingan gararab wasak i tagurr sunta. I gimpai wasak wat kidungwaga haru-hup gan ingka gayangu kurinai hup gan ingka gakantui kurinai awa. ⁴⁷ Kuri gayangua, ka gikutamirun igin i wayant gan ka hup gan niya wat kurinai awa. ⁴⁸ Kurinai hirukangkua girarab in gakutamirun igin. Rinangk gan gini gisunani, "Gariak, gisu aus in agu gikab agai gagarrwi agua gah? Ka gini wat wayangua, idzii wat agu ramangk gam gigarrwi agu in agai sampangk gangk barabin i garrwi agua. " ⁴⁹ Ina Yisu gasuntai i ramangk rinangk gan hup, " Gisu aus in agam rugigarrwi zii? Agam wayant ma gararab amuk, gisu izii yampai ramangk gangk tagurr gan? " ⁵⁰ Ina kurinai hirukangkua ma giku hup ram-ayang anai hugun gan i wayant amuk i hup igan i suntai gin wat kurinai. ⁵¹ I giha wat kurinai i Nasaret zua, ka gayangua ka garagi kurinai hup gan. Rinangk gan gigab hup arunanai simpim i sampan gan. ⁵² Ka Yisu gisu raham wat wayant mimungk. Ka Anutu gikab nuguan nizun igin ka garam sagat awa gikab nuguan yah.