¹ E Pol, eia la Aposel---- kama la aposel ale loio la ba tela tahalo, a loio te Isus Kraist me e Deo tama, ale vimahuli rivu eia loio tela pileho---- ² Me egite tomi e tabarabara gu ale vikapopo le eau, soio tomi la lotu te Kraist ale oilo e Galatia. ³ La gilogo ge tamuto mela tia madila loio te Deo e tama gatou me la Uru e Isus Kraist, ⁴ Eia sugutaro la mahulila tetala somai tela iriru tegatou ila eia ge utululu etatou loio tela kama karakorala tela imala ale igoe. ale a loio tela masagale Deo tama gatou, ⁵ La marasala ge tetala mela tapasila ge ouka, Asele. ⁶ Eau karutu sele mae amuto poke taro hari sele la tahalo ale tola amuto loio tela gilogo te Kraist. me eau karutu tai mae eme vulo tavu ti la merera la lotu ale isa polo, ⁷ Kama via la merera la lotu isa polo lou oio, la vuhula la valua isahari oio viguvia muto la tikumula me egite masaga vulo la merera la lotu te Kraist. ⁸ Alamoli mae amite ouka egite la angelo la ilolalage ge valolo le amuto la merera la lotu ale isapolo loio teale amite valolo tile amutou, la tikumula ge tabuli oata tetala, ⁹ A mae moli ale amite veitia mamuga, igoe eau ge vei loua, "mae la tahalo isa ge valolo amuto la merera la lotu ale isapolo loio teale amuto abitia, la tikumula uru ge tabuli oata tetala." ¹⁰ La imala aleie eau oio mata tela masagala tela tahalo ouka e Deo? mave ale eau masaga ge igo sagege la tahalo? mae eau oio tovolalaia ge igo sagege la tahalo, ale eau katima la tahalo la igolula te Kraist. ¹¹ Eau masaga amuto ge rovia, tabarabara gu, la merera la lotu ale eau valolo la akama la merera tela tahalo bulahu moli isasa, ¹² Eau tai kama abi la merera ale oio tela tahalo isasa, ouka eau moli gabutalea. akama maele, ale la mari kovula te Isus Kraist eia abia gu. ¹³ Amuto lolo tamai ti bakisi la mahuligu ale pala oilo e Judea, la imala eau magiri robo la lotu te Deo eau igo bara selea polo la maki me eau tovolaia ge igo marapea. ¹⁴ Eau vituga tomia oilo e Judia polo taro tomia egiteu ale amite la kalaga isa moli, ale loio lou tegite la valua tegaku lou. la gilabulabu isa vagari sele oilo taku tavu la vulovulo mela mahuli gite tatama gu. ¹⁵ Alamoli la imala ale e Deo, ale hilovi eau loio ti la tia le tila, me eia tola eau oilo tela gilogo tetala, ¹⁶ eia masaga sele viage taupala e latula oilo taku. la vuhula eau ge valolo le eia kabili tegiteu e Gentael, eau kama igo hari moli abi la visuli loio tela vovo mela kasoso. ¹⁷ Eau kama goata e Jerusalem viage goio tegite ale guvi ti mae la Aposel mamuga taku, ouka eau goio muga e Arabia goio eau teterivu soio e Damascus. ¹⁸ Goio la leavala itolu polo eau tuga goata e Jerusalem viage rovi e Kepas eau goio pou tomi leia la logo savulusa gete lima. ¹⁹ Alamoli eau kama hilo isa egite la Aposel e Jems moli eau hiloa, e tabara la Uru. ²⁰ Oilo tela rova eau kekesia tia mu, eau vei selea mu tela mata le Deo mae eau kama vasigologolo. ²¹ Goio eau tuga goio la galegale la mautu tomi e Siria me Silisia. ²² Egite la lotu te Kraist ale oio e Juda souka matagaga sele eau. ²³ Egite lolo tia bakisi via mae, "la tahalo moli ale pala magiri roborobo etato igoe vagogala taiti la tautaulailo ale pala eia tovolaia ge igo barea." ²⁴ Tio egite abia la Uru la marasala la vuhula tegaku moli.