¹ Ari Krais ago suleq kiskista ne danmeb huritiyta nab i roreq hi usuq. I ginad buliyeq gunun samanta a hi gilumishaqta nagan gileh uggo agamukan teq teq i God anan helmo haqgo agamukan ² teq i yuw huzgo asuleqin teq i mataw giholib giben emeq giwazgo agamukan teq mataw moqiyta na bunmo eraq daqayta na agmukan teq mataw teq mataw hazizirib tureq gigo daq meqinta amenin waqad kuluwa-kuluwmo os daqayta na agamukan nagan bunmo i ta hi bilaquq. I bit ago tituq tileyeq teq i tituq na titeqeq a ta leyamta na in dimun a haiq. Nazaq iyan i gamuk asamelan haiqta na hulosad i suleq awaz meqinta mataw ginad tizilimta huritayta naqmo i bilaq tuteq a lehuq. ³ Ari God i gibiysa i mataw nazaqta iyid teq i suleq awaz meqinta nab tileham. ⁴ Ne ginad emiy. God i mataw asor ginad eman hastitayan in naw dimunta Heven-ib usim hitimta na waqim tiloyiniy. Sa God ago Bugaw Dimunta in giholib tuqoy soqotmo. ⁵ Mataw in God ago gamuk loyinan in dimunmo diq iyta. Teq in God ago kam muturta azawayin inaq abeb teq gwahtiqdaqta na tiloyiniymo. ⁶ Ari i nagah dimdimunta na loyineq teq abeb in God gileh ugeq ari in ginad ta buliyeq gigo daq meqinta na gileh uggo akaman haiq tiqiydaq. Na ezaqgo in gigo daq naqmo amalib in bilaqne God atatin ayib dom a ta wolan in ulalab tursa mataw ahol waqad bilawunayta nazaq nog in tiqem daqay. ⁷ Urom sirisirimo ogib woqsa og na yuw dimunta waqad didaq eman anon dimunmo emsa og na in dimunta. Og naqantab on mataw didaq akabiyan emim in giholyon didaq dimdimunta waqad dimunmo osayta. Nazaq iyan God in og naqanta anan anad dimniyaqta. ⁸ Ari og nab sirsirimo urom woqsa teq in am ta amo amo asasuqin inaqta namqo emid gwalsa og na in dimun a haiqta. In God ameb timeqniyim ussa abeb faq tuqoywordaqta. ⁹ I giyogniz dimuunta muran i gamuk atoran diqmo ne gibilenauq. Ta teq i ne ginan ginad kazaq emauq, God ne giwaqan ne inmo ago on mataw tiqiyim osayta haqauq. Ossa afaqan nawa i anan bilawta nazaq ne gigo hib a hi gwahtiqdaq haquq. ¹⁰ God in meqin a haiqta. Nazaq iyan ne kabiy dimunta emayta na ago in adek a hi zizaldaq. SA ne in anadin emad ago on mataw tawonta na ginan anad bilaqsa gilumsih yaqayta na ago in adek a hi zizaldaqmo. Ne daq naqanta muran tiqem tutayta. ¹¹ Teq i ginad ayahmmi ne gigo hib usaqta na in kazaq. Ne amulik-amulikmo nazaqmo God ago kabiy atoranmo emad os tutiy haqauq. Ne nazaq emad teq ne ginadnad emad ''God teq i gilumsheq giwaqdaq o haiq?'' haqad teq ne ginad kabemmo nazaq hi usdaq. Ad ne ginad amulikmo God amomo ago hib ussa le in ne giyon kam anan bilamta nabmo in ne tigidimu tondaq. ¹² Ne gituw hi hiqiyan. Mataw God amen emim osad gituw a hi hiqiy yaqayta naqmo ne gisen ne muzinad luwiy. Mataw na in God anan helmo haqad gituw a hi hiqiysa osim muran in nagah God negnan heldiqmo gibilanta na tuwaq bugim osayta. ¹³ Kwaziqmo God in Abraham nagah araq ugnan haqad hel diqmo bulonta. Bulonad in mat araq ahol abinib helmo ulilib bilaqdaqta na haiqgam iyan inmo ahol ananib in helmo diq ulilib ham. ¹⁴ In bilam, Ya helmo diq npbilaqaiq ham. Ya ni ayahmo diq nidimun tonad nibar tonid teq abeb ni nisesan kabemmo diq tugwahtiq daqay ham. ¹⁵ God nazaq bilaqan Abraham in nagah na amen emad in hidmo atuw a hi hiqiy. An abeb nagah bunmo God ugnan haqad hel diqmo bulonta na in tuwaq bug. ¹⁶ Mataw og kabta in gamuk helmo diq ulilib tihaqnan haqad in mat araq abin in gibin uriyamta naqmo biyad in helmo haqayta. Teq in nagah araq anan an mugsa in gigo araq eraqeq helmo diq ulilib haqid mataw na bunmo giqez hiqiyaqta. ¹⁷ Ar God in ago on mataw gidimun tonnan hel diqmo bilamta. Ad in anad a hi buliydaqta na ago in on mataw na giqisihunnan haqad in ago gamuk na zaway ugad in helmo diq ulilib ham. ¹⁸ Teq nagah giger na God ago gamuk teq in helmo ulilib hamta na in a hi buliydaqta. Sa God in nagah giger na amalib i a hi kat igdaqta. Hikidik. Nazaq iyan in teq i gidimun tondaqta na agamukan i gigo hib bolan i gamuk na waz naqmo hiqiyauqta. I gamuk na waz naqmo hiqiyad i tukim lehim in ago hib ulilemim osad i a hi rabad giwaz meqniyim osauqta. ¹⁹ Nagah giger na in i giholib bilaqne anka afaqan meqinta i gihol waz nog iyim usaqta. Teq anka na in Tempel aduganibmo diq tubusan ayahta othenan usaqta na aglihenib gwhti lehim usaqta. ²⁰ Sa Yesus in tamaz mat danmebta Melsikedek ago dauhibta tiqiyim in i gimen dan emad in danmeb Tempel aduganib tubusan na agilehun ban le tugwahtimta. Gwahtiqim in i gimen tamaz akabiyan kuluwa-kuluwmo emad osaqta.