¹ Ari mat araq in tamaz mat danmebta iydaqta na adan kazaq. God inmo mataw gilikmanib mat araq atowun eman in gwahtiqim ban na waqaqta. Waqim in ago on mataw bunmo gigo ban waqim God anognib turad in gibinib naw amo amo God ugad teq in daq meqinta walemgo atamazin emaqta. ² Teq tamaz mat danmebta na inmo in ago zaway haiqta iyim in ago walmataw ginad a hi em hasad God ago dan titnonta hulosayta na nenaq kiskismo lehaqta. ³ In mat diq iyim iyan in on mataw gigo daq meqinta walemgo atamazin emad teq inmo ago daq meqinta walemgo atamazin in emaqmo. ⁴ Tamaz mataw danmebta na abin ayah diqta. Mat araq in kabiy na anadibmo ahol a hi ugdaqta. God-mo mat lilewunan in kabiy na waqaqta. Kwaziqmo in Aron lilewunta nazaqmo. ⁵ Ad nazaqmo Yesus in tamaz mat anadibmo ahol a hi ugmo. Haiqgmo. God-mo Yesus atowun emim bulon, Ni ya itatin ham. Muran ya ni tiniqulal tonaiq haqad in bilam ham. ⁶ Teq God ago mar asor ban in kazaq bilammo, Ni tamaz mat Melkisedek ago dauhibta iyeq ni tamaz akabiyan kuluwa-kuluwmo emad tuqosdaq ham. ⁷ Kwaziqmo Yesus og kab osad in anad emyaq, God ya ilumsiheq iwaqid ya a hi moq hasdaiq haqyaq susumun ugad in atoranmo ek tonad ago gaq inaq ame kabemmo bulonyaq . Bulonad in ahol wazan woqsa in God wazinad ahaqenib iyim osyaq. Nazaq iyan God in aqez tuhurit. ⁸ Yesus in God atatin. Ta teq in santity ayahmo sorad in ahol suleq ugad God aqez muzingo in hurit kamta. ⁹ Hurit kemim teq in tamaz akabiyan emdaata na ago amatin dimun diqta tiqiyim in os kayeqmo kuluwa-kuluwamo osayta na alulin iyim osaqta. Ossa on mataw inmo aqez huritad muzinsa in os dimunta na negaqta. ¹⁰ Nazaq iyan God in atatin na atowun emim bulon, Ni Melkisedek nogmo iyeq tamaz mat danmebta tuqosdaq ham. ¹¹ Ya inadib Melkisedek agamukan kabemmo bilaqdaiqta usaq. Na ya gibilen nagta teq ne gimaqbel soqotim usad ginad a hi hastitayaq. Nazaq iyan ya gamuk na alulin giqisihunnan haqad teq ya ne gibibiyowunaiq. ¹² Kam sisaqmo ne God ago gamuk huritad osiyta. Osim muran negmo gamuk na asuleqin mataw tigibilen nagiyta. Teq haiq. Ne gimabel siqim diq iyim ussa ne God ago suleq kiskista danmeb huritiyta naqmo ne a ta huritnan os nog iyay. Ne didaq atoranta neqgo ahun haiqta daqag. Ne susmo neqgo ginad usaqta. ¹³ Teq onmin amikmikta naqmo in sus negayta. Ad in daq dimunta emgo adan a hikidik hurit kemayta. ¹⁴ Ari on mataw aseseq tiqiy bugiyta naqmo didaq atoranta negayta. On mataw naqanta in titimmo gihol suleq ugad ginad emunad in daq ulum kemad dimun miqin haqgo in tuhurit kemiyta.