¹ Ya imabqbaban, Mat araq daq meqinta emid ne mataw God ago Bugaw Dimunta inaq luwayta na ahol waqad ne mat na wastitayiy.Ad negmo gihol asawan woltayiymo. Luweq mat na ago daq meqinta na ne gilum waqid ne inaqmo woq daqaymo. ² Ne nazaq an ulumsihad mat araq aholib afaqan gwahtiqsa ne bunmo agerab loqeq inaq garabmo afaqan na soriy. Daq nazaq ne emad teq ne maror Krais igta na tuwol net bug daqay. ³ Ne ezaqgo i bunmo ago zaway haiqta. Nazaq iyan mat nog anad emad bilaqaq,Ya asittaqmo haqaqta, Mat na inmo ahol kat ugaqta. ⁴ Nigo kabiy daq ni emaqta na bunmo ni ulum kemad dimun meqin na in ulum ahol waq kem. Ahol waq kemad ni ningo nagah a haiq. Ni ninmo ningo luw os anadin em. Ne bunmo nazaq emeq teq ne gihol abin iluw daqayta na alulin negmo aiholib usdaq. ⁵ Na ezaqgo on mataw amilik-amilikmo gigo kabiy in em daqayta naqmo in tuqme daqay. ⁶ Mat God ago gamuk asuleqin waqayta na ago nagah dimdimunta inaq na asor husereq suleq anamrren ugan. ⁷ Ne gihol hi kat ugiy. God in mat araq ago kamolmol a haiqta. Mat araq ago kabiyab naqmo naqmo anon tayim waqaqta. ⁸ Mat agem kwaziqta anad muzinad daq emsa teq in ago daq na ahol anon emsa mat na ahol meqniyeq tumoqdaq .Ari mat God ago Bugaw Dimunta muzinad daq emsa teq Bugaw Dimunta mat na emid in kayeqmo kuluwa-kuluwmo tuqosdaq. ⁹ Teq i kabiy dimunta emad gihol husisiqsa gituw hi hiqiyan .I kabiy dimunta emgo gidan sosil a hi iyid teq didaq waqgo akamnib i gigo kabiy dimunta na anon kabemmo tuwaqam. ¹⁰ Nazaq iyan kam bunmo i daq dimunta emgo adanteqin inaq iyadmo i on mataw bunmo gigo hib daq dimunta emuq. Ad i gimaqbaban helmo haqayta na ginadin emad gidimun tonuq. ¹¹ Mar aseseqta yaqmo ihol abenab ne gimen mar tonta ka ne ahol wawiy. Mataw nawa ne gihol abatan asan urotnan bilaqayta na in nagaqgo nazaq emay? ¹² In gihol abin ayahta waqgo haqad daq nazaq emayta. Ad in kazaq ginad emay. Luweq i Krais ayib dom wolan momta na adan diq muzinsa Juda mataw gisan urotayta na in afaqan ig daqay haqayta. ¹³ Mataw gisan urotayta na in God ago maror Moses bilamta na anonon a hi muzin bugayta. Ta teq in ne gisan uroteq ne giqumnibmo in gibin emid ayahmo iyad haqad in nazaq emayta. ¹⁴ Teq ya nagah in araq ago hib ihin dimunta waqnan ituw hikidik iyaq! I gigo Ayahta Yesus Krais ayib dom wolan momta naqmo ago hib ya ihin dimunta waqgo inaq bilaqaq. Ay nab og ka ago anad meqinta ya iholib usta na moqad in ya inad hureqgo azawayin na inaqmo tumommo. ¹⁵ Gihol abatan asan urotgo adan na in nagah diq a haiqta. Teq mat asan a hi urotaqta na nazaqmo in nagah diq a haiqtamo. God giqeman i mat muturta iyim osauqta naqmo in nagah heltaqmo. ¹⁶ Ya inad on mataw ginad ya inad nog usaqta na bunmo gigem kiskis iysa God in ginan anad meqniyan haqaiq. On mataw naqmo in God ago on mataw Isrel-mo diq iyim osayta. ¹⁷ Ya Yesus asen muzad ago kabiy emsa mataw ya inoliyta na abatlan ya isanib kawa usaqta. Nazaq iyan muran teq abeb mat araq in afaqan araq ta hi yagan. ¹⁸ Ya imaqbaban, I gigo Ayahta Yesus Krais agem dimunta negsa ne osiy. Hel diqtaqmo.