¹ Ari Karis anad i samanmo luw osamta haqad in i giwaqan i Moses ago gunun i giqirquran osta na ahaqenib a ta hi osauqta. Nazaq iyan ne zaway diq iyeq turiy. Ad ne a ta giqirqurnan tonsa ne in giqez othasad giholibmo hiqiyiy. ² Yaqmo Pol kazaq diq gibilensa ne gidek emeq hurit kemiy. Mataw na gihol abatan asan urotgo gibilensa ne giqez hi muziniy.Haiqmo diq.Ne maror kwaziqta na anan helmo haqad gisan urotid teq krais ne gimen kabiy amta na a ta hi gilumsihdaq. ³ Ne mataw gisan urotgo ginad emayta na ya ne bunmo a ta gibilen tonaiq. Ne nazaq ginad emad ne God ago maror Moses bilamta na ahaqenib tilehnan tonay. Nazaq ne emad ne maror na ago gunun amikmikta na bunmo tumuzin daqaymo. ⁴ Ad ne ginad emay, I God ago maror Moses bilamta na ago gunun muzin bugeq teq i God ameb titnonta iyan haqayta na, ne bunmo gihol adanin qwayim Krais ago hib a ta hi soqotay. Ne God agem dimunta in samanmo negaqta na tuhulosiy. ⁵ Na ezaqgo i Bugaw Dimunta ago zawaymo amalib Krais anan helmo tihaqim i God ameb mataw titnonta tiqiy. Iyim God i gidimun tonnan bilamta nazaq diq in tiqemdaq haqad i baq tunim osad gihol husisiqaq. ⁶ Mat Karis Yesus inaq tisoqotta na anadib gisan urotayta na in nagah a haiq. Teq in anadib gisan a hi urotayta na in nagah a haiqmo. Mat na anadib mataw Krais anan helmo haqad teq in on mataw bunmo ginan ginad bilaqaqta naqmo in daq hel diqta. ⁷ Kwaziqmo ne Krais asen muzad ne dimun diqmo sib yaqayta. Ta teq nog ne gigo dan qwayan ne gamuk helta na a ta hi muzinay? ⁸ God ne gililewunta na in ne ginad biliyan ne maror kwaziqta na a hi muznan tonay. Haiqgam. ⁹ Ne gamuk araq mataw bilaqad luwayta ka anadin emiy. Yis asitmo naqmo bret araq ahol bunmo eman huhuw nemaqta. ¹⁰ Teq ya inad emaiq Iyahta ne ginad wamuzsa ya inad usaq nazaq ne ginad tuqusdaqmo haqaiq. Sa mat nog ne ginad eman agadan iyaqta na in ago daq na amenin naw meqin diqta tuwaqdaq haqaiq. ¹¹ Ya imaqbaban, kwaziqmo ya mataw gihol abatan urotgo gibilenyaiqta. Teq muran ya nazaq a ta hi bilaqsa iyan Juda mataw bab yagayta. Ari ya gisan urotgo bilaq tutsa teq Juda mataw muran ya a hi imeqin ton nagiy. Ad ya Yesus ayib dom wolan momta agamukan a hi gibilensa in ya inan gigem a hi meqniy nagiy. ¹² Mataw na ne gisan urotgo gibilenad in ne giritewunayta. Teq ya mataw na ginan inaq kazqq emai1. Mataw gisqn urotgo giwaz meqniyaytq na in gimo gihol abatan asan urotad in gihol abatan gikayogin inaqmo uroteq huneg nagiymo haqaiq! ¹³ Ya imaqbaban, God anad ne samanmo tiluw os daqay haqad in ne gililewunta. Teq luweq ne ginad em daqay, I gunun haiqmo osauq haqad ne giholmo anad tumuzin daqay. Haiqgam. Ne an anan ginad bilaqsa an ulumsihad osiy. ¹⁴ Ne ezaqgo God ago marib gamuk amulik kaqmo in God ago maror Moses bilamta na agamukan wol net bugaqta. Gamuk na bilam, Ni ninmo nihol anan ninad bilaqaqta nazaqmo in inyow anan ninad bilaqan ham. ¹⁵ Ari ne an mugad an meqin tonad osad teq ne gihol waziy. Ne bunmo araqibmo tihiqiy daqay. ¹⁶ Teq yaqmo kazaq diq ne gibilenaiq. God ago Bugaw Dimunta daq giqisihunsa ne lehiy haqaiq. Ne nazaq emad teq ginad meqinta bolsa ne a hi muzin daqay. ¹⁷ Na ezaqgo i ginad meqinta gwahtiqaqta na in God ago Bugaw Dimunta anad nog a haiqta. Sa God ago Bugaw Dimunta anad in ne gigem kwaziqta na anad nog a haiqmo. In gigermo an geg ugsa ne daq asor emnan ginad bilaqaqta na a hi emayta. ¹⁸ Ari Bugaw Dimunta dan giqisihuneq giqad lehid teq ne God ago maror Moses bilamta na ahaqenib a ta hi os daqay. ¹⁹ Gigem kwaziqta ago adan na ulalab usaqta.Ni an haresmo hureqim inaq usaqta na teq ni daq anumlan inaq emaqta na teq ni nimebbay haiqmo daq haresmo emaqta na. ²⁰ Teq ni God katiyta muzinaqta na teq ni liqiy tagum emaqta na teq ni mataw nenaq an mugaqta na teq mat araq ago os dimniysa ni ahol waqad nigem meqniyaqta na teq ni neqinta mataw negaqta na teq ni ninmo nihol anadin emaqta na teq ni mataw bunmo gigo gamuk geg ugaqta na teq ni mataw gihuseraqta na, ²¹ Teq ni mat araq ago nagah dimdimunta utetaqta na teq ni yuw atoranta uluwim nifaqin hulosaqta na teq ni giyogniz nenaq yuw uluwad daq hares emaqta na teq daq naqanta kabemmo i gigem kwaziqta na giqeman gwahtiqiyta. kwaziqmo ya ne gidek wazta nazaqmo ya ne gidek a ta wazim kazaq ne gibilenaiq. On mataw daq meqinta nagan emayta na bunmo in God ago maror aduganib le a hi gwahtiq daqay haqay. ²² Ari God ago Bugaw Dimunta in daq kazaq eman i giholib gwahtiqaqta. Ni on mataw ginan ninad diq bilaqaqta na teq ni ninad dimniysa osaqta na teq ni nigem kute nemsa osaqta na teq ni hidmo nigem a hi meqniyaqta na teq ni mataw gilowan tonaqta na teq ni daq dimunta emaqta na teq ni gamuk bilamta nazaqmo diq ni emaqta na, ²³ teq ni mataw nenaq kiskismo osaqta na teq ni ninad in nihol anononmo wamuzaqta na, daq nagan bunmo Bugaw Dimunta giqeman i giholib gwahtiqayta. Gunun araq diq daq nagan giwasihdaqta na haiqgam. ²⁴ Teq Krais Yesus ago on mataw bunmo in gigo gigem kwaziqta na ativ dom wolan in ago zaway alulin tihiqiy. Hiqiyan mataw na ginad meqinta bolsa in daq meqinta haresmo emnan ginad em yaqayta na tihiqiymo. ²⁵ God ago Bugaw Dimunta i giqeman i kayeqmo osauqta. Nazaq iyan Bugaw Dimunta dan giqisihunad giqad lehsa i muzineq inaq lehuq. ²⁶ Lehad i gihol abin hi iluwuq . Ad i an agem ulumad i ango nagah hi utetuq.