¹ Una dainai, baita gari una ia ena laga-ani ai baita raka vareai gwauhamatana negana na doini emiamu lalonai, a umui haida ese oitaiamu idavarinai vada ome dabu. ² Badina sivarai namo na e hamaorolaida ma haida danu unu heto. To una sivarai na e kamonaiva a namo ta asie havara idia ediai, badina idia na abidadama e kamonaiva taudia ida na asie tamonava. ³ A, ahamomokania taumai ese ena laga-ani ai vada ame raka vareai, ena hereva hegeregerenai eto, "egu badu ai na gwauhamta, idia na egu laga-ani lalonai na basie raka vareai." Unu hetomana danu, ena gaukara na e guguru tanobada eha-daia neganai. ⁴ Badina dina iha-hituna dainai na ehereva: "Bona dina iha-hituna ai e laga-ani ena gaukara amo." ⁵ Ma ehereva eto, "idia na lau egu laga-ani ai basie raka vareai diba." ⁶ Una dainai, ina nega doini mianai, ini haida danu ma raka vareai, bona matamanai haida ese sivarai namona eha-maorolai henidia na sie raka vareai, badina be dia gwau ede-ede daidiai. ⁷ Dirava ese dina ta ma eabia hidi bena egwauraia "Hari dina." Dina momo muridiai ia na Davida ena amo ehereva eto, "Hari dinai, bema ia gadona o kamonaiamu neganai, kudoumui na basio ha-aukadia." ⁸ A bema Iosua ese laga-ani vada e henidiava neganai, Dirava ese dina tama basinema hereva ina nega murinai. ⁹ Una dainai , doini Sabati laga-ani na e siaia Dirava ena taunimanima edia. ¹⁰ Badina daika Dirava ena laga-ani ai evareaimu na sibona ena gaukara amo danu laga-animu, Dirava ese e karaia hegeregerena. ¹¹ Una dainai, baita heura-dai una laga-ani lalonai baita vareai, unu amo ta na basine moru ina gwau ede-ede lalonai. ¹² Badina Dirava ena hereva na e maurimu bona mai siahuna, bona mai ganona bona ganona rua darena e hereaiamu. Lauma bona dara na egwadadia urumu elaomu bona turia haradia bona garugaru danu ehapararadiamu, bona elaomu bona taunimanima lalona ena lalohadai bona ena ura danu eha-hemaoro henidiamu bona eha-hedinaraiamu. ¹³ E kara gaudia iboudiai, ta na dia hehuni Dirava vairanai. A gau iboudiai eme ha-ulala bona ia matanai ta na dia hehuni bona do baine hahemaoro henida. ¹⁴ Una dainai, ema bona hari ita na mai eda Hahelaga tauna badana Iesu Keriso Dirava natuna, guba padadia amo e hanai, ina eda kamonai ta hamomokaniamu gauna na baita dogoatao balaheni. ¹⁵ Badina be ita na asi eda Helaga tauna ta daika be eda manoka-manoka dainai basine boga hisi, to tamona daika be dala momo amo e dibagania ita hegeregereda, a taina danu asine kara dika. ¹⁶ Una dainai mai goadada ida una hariharibada terona-na aita raka henia, bena unu amo hebogahisi do baita abia bona hariharibada baita davari bena eda dabu negadiai do baine kahada.