¹ Una dainai, badina be hutuma ese eda hereva bona kara eitamu dainai, ita ese ehametauda haragamu karadikadia na baita atodia tabe. Mai aheaukada ida baita heau vairada ai e atoa heau heluluna lalonai. ² Eda lalohada na Iesu, ita eda abidadama e matamaia bona e hagoevagoevaia tauna, enai baita atoa. Iesu na gabeai baine vara moalena dainai, satauro hisihisina hemaraina e haheauka henia, bena gabeai Dirava ena terona idibana kahana ai e helai. ³ Una dainai Iesu na ba lalohadailaia, Ia na kara dika taudia edia dagedage Ia enai e haheauka henidia, bena umui na basio manoka kudoumui ai bena ba hebalarea. ⁴ Umui ese karadika idadaraina hededegwana ai raramui na do asine diho. ⁵ Bona umui ese natu hegeregeredia e hagoadamui ahegoadana na vada o laloaboio, eto. "Natugu e, Lohiabada ena matahakani emui ai na basio laloa maragi bona basio manoka bema emui kerere dainai e hahisihisimuimu. ⁶ Badina be Lohiabada ese e lalokau henidiamu taudia iboudiai matahakani e henidiamu, bona e abidiadae natuna ai ela taudia iboudiai na Ia ese edia kerere ahudia hisihisina e henidiamu. ⁷ Matahakani hisihisina na ba haheaukalaia. Dirava ese e kara henimuimu na tama ese natu e kara henidiamu bamona. Be edena natu na tamana ese matahakani asine heniamu? ⁸ To bema matahakani basio abi taunimanima iboudiai eabi hegeregerena, umui na dia natu korikori bona umui na dia Ia natuna. ⁹ Ina latanai danu, ita na tamada, tauanidia ai e havarada taudia, ese matahakani e henida bona ta matauraidia. Ita be vada lauma tamadia enai siboda basita heni lao badabada bena baita mauri? ¹⁰ Badina be momokani vaitani ita tamada, tauanidia ai e havarada taudia ese nega sisina ai mo matahakani e henida, idia ese e laloava namo hegeregerenai. To Dirava ese matahakani e henidamu na ita eda namo dainai, unu amo ita Ia ena helaga baita abia herahia. ¹¹ Momokani vaitani matahakani iboudiai e henimu negadia ai, na e kara dia lalo-moale gauna a mai hisihisina hari. A - to gabeai matahakani ese kara maoromaoro huahuana mai mainona e havaraiamu, matahakani amo e haheaonegadia taudia eidia. ¹² Una dainai imamui e heveriveri imadia na ba hagoadadia bona tuimui e manoka tuidia danu. ¹³ Aemui palapaladia edia raka daladia be ba hamaoromaordia bena e magigi ae-palapalana na basine heride to baine goada guguru. ¹⁴ Taunimanima iboudiai ida maino ai ba noho maurina ba guna henia bona ba helaga, badina bema helaga maurina lasi neganai ta ese Lohiabada basine itaia. ¹⁵ Ba heita ta ese Dirava ena hariharibada ai basine dabu, bona heiriheiri ramuna iditana na basine tubudae ihahekwakwanaimui totona, bena ina ese taunimanima momo na do bae hadikamui. ¹⁶ Ba heita, taunimanima ta basine matabodaga eiava dia Dirava se hagoiamu taunimanimana Esau hetomana, aniani dainai sibona ese ena vara roboana e hoihoilaia oho. ¹⁷ Badina be mai dibamui, Esau na gabeai eheuradai ena maoro hahenamona baine abia neganai na e dadaraia, badina ia na helalokerehai se ura, ena be una hahenamo na mai tai dikadikana ida e uralaiava. ¹⁸ Badina be umui omai henia gauna na dia imamui ai ba dautoho diba gauna, dia lahina e hururumu, dia dibura-kobo, dibura bona dikadika, ¹⁹ bona dia kibi regena ta, eiava dia ere ta, e herevamu herevadiai e kamonaimu taudia ese e noiamu hereva ta ma basine gwauraia erena, ²⁰ badina be idia na e hagnidia herevana eto; "Ena be bema manu ta ese ina ororo baine dauatoho, una manu na nadi ai bae hodoa," herevana na asie abia goada. ²¹ Ina gabu oromana na mai garina bada dainai Mose eto, "Lau na gari dikadikamu bona na heudeheudemu." ²² A to lasi, umui na oma Siona ororona bona oma e maurimu Diravana ena hanua, Ierusalema guba hanuana, bona aneru gerebu gerebu e moale heboumu gabuna oma, ²³ bona vara-roboa, ladadia guba ai vada ehetore taudia, edia hegogo gabuna oma, bona taunimanima iboudiai edia Hahemaoro Diravana dekana oma, bona, bona ekara maoromaoro bona vada e hagoevagoevadia taudia laumadia dekedia oma, ²⁴ bona Iesu taravatu matamatana ihahemaorolaina tauna dekena oma, bona vada ehenevarilaia rarana - gadona Abela rarana gadona ehereaia rarana omai henia. ²⁵ Ba heita, umui ese e herevamu tauna basio dadaraia. Bema ina tanobada ai ahegani ehenida tauna erena e dadaraia bena asie roho-mauri, ita be ma ede baita roho-mauri toma bema guba amo ahegani baine henida tauna baita rakaia-muri? ²⁶ Bega ta ai na Ia gadona regena ese tanobada e ude-udea to harihari Ia ese vada e gwauhamata henida, etomamu, "Do nega tamona, lau ese dia tanobada mo baina ude-udea to guba danu." ²⁷ To ini hereva, "Do ma nega tamona," anina na e ude-ude gaudia bae abidia oho, eiava anina na, e karadia ima-karakara gaudia bena asi e ude-ude dia gaudia na bae mia. ²⁸ Una dainai badina ita na basie e ude-ude diba basileiana tabiadaemu dainai, aita lalo-namo bena lalo-namonai baita domadiho. Dirava e hamoaleamu dalana ai, mai hematauraida bona mai garida ida. ²⁹ Badina be eda Dirava na heara-ore lahina.