¹ Abidadama na asi laromu gaudia ihamomokanida, bona asi taitamu gaudia ihamomokanidia. ² Una dainai Dirava ese sene taudia eabidiadaeva. ³ Ena abidadama amo ta dibamu tanobada na Dirava e hereva amo ehekara, una dainai ta itamu gaudia be asita itamu gaudia amo ekaradia. ⁴ Abidadama dainai Abela ena boubou gauna namo hereana ese Kaino ena herahia ehereaia, una dainai Dirava ese kara maoromaoro tauna egwauraia bona hereva namodia latanai, e gwauraidia badina ena herahia dainai, ena be emase to doini e herevamu. ⁵ Abidadama dainai, Enoka na tanobada amo Dirava ese eabia dae, badina baine mase garina, Ia na e tahuava, badina Dirava ese eabia dae, Ia do seheabi oho neganai, Ia na egwauraiava Dirava e hamoaleava tauna. ⁶ A asi ena abidadama tauna na auka herea Dirava ihamoalenai. Badina Dirava iraka henina kahi euramu tauna ese eabiadaemu Dirava na emaurimu bona Ia e tahuamu dainai ahuna namodia baine henia. ⁷ Abidadama dainai Noa na Dirava ese do seita gaudia e sisibalai henia bona mai hematauraina ida Lagatoi ta e raia bona ena ruma taudia ehamauridia. ⁸ Abidadama dainai Aberahamo e boiria neganai na e kamonai vada ela bona ia baine ahua tanona ai. Ena hanua e rakatania asi dibana ede elaova. ⁹ Ena abidadama dainai gwauhamata tanona ai e noho hedoava, Isa'ako bona Iakobo danu ia ida kalaga ai e nohova, idia raruosi danu gwauhamata dihina. ¹⁰ Badina ia na e roha laova, Ia e taruha henia hanuana do baine gini tutuka-tutuka, iseuna bona ikarana na Dirava. ¹¹ Abidadama dainai Sera ena be vada e buruka herea to natuna ta e havaraia, Dirava ese egwauhamata henia hegeregerena. ¹² Una dainai ina tau tamona ena amo - bona kahira-kahira bema mase tauna danu - bese hutuma herea e vara, edia numera na guba hisiu dia na heto eiava kone mirimiri dia asi iduhaidia. ¹³ Abidadama dainai ini iboudiai na vada emase, gwauhamata iboudiai danu sedavari, to gabunai e itadiamu bona eabidia daemu gabu daudau dia amo bona e gwau hedinaraimu, idia na noho hedoa-hedoa bona e luludia tauda. ¹⁴ Unu e hereva tomamu taudia na edia hereva anidia amo e hedinaraimu. Idia na edia tano korikorina ta e tahuamu. ¹⁵ Bema momokani idia ese e rakatania tanona bema laloa nega namona ta eabia neganai bema lou henia. ¹⁶ To hari hegeregerena idia na hanua hereadia bae biagu taudia , una na Dirava e nohova gabuna. Una dainai Dirava na sehemaraiva, idia ese egwauraiamu edia Dirava, badina Ia ese hanua ta vada eabia hegaegae idia edia. ¹⁷ Abidadama dainai Aberahamo e tohoa neganai, ia ese Isa'ako boubou gauna ai e halaoa. Ena be gwauhamata baine abia tauna to ia ese natuna vara edeana na boubou gauna ai e halaoa. ¹⁸ Vada e herevalaia eto, "Isa'ako ena amo oi vevemu ladadia do bae gwauraidia." ¹⁹ Aberahamo ese na vada e haeroa Dirava ese Isa'ako na mase amo baine ha torea isi eto, una dainai ia ese eabia lou unu amo. ²⁰ Abidadama dainai danu Isa'ako ese Iakobo bona Esau e hanamodia. ²¹ Abidadama dainai, Iakobo baine mase eto neganai, ena itotohi kwarana ai e goru kau bena ia ese Iosepa natuna ta ta e hanamodia bona latadia ai e guriguri. ²² Abidadama dainai, Iosepa ena mase vada e kahira-kahira neganai, ia ese Isaraela besena Aikupito amo bae raka lasi vada e herevalaia bona e haganidia ia turiana danu idia ese bae abi kau. ²³ Abidadama dainai Mose, e vara laganina hua toi neganai, sinana bona tamana ese e itaia mai hairaina dainai, pavapava ena hahegani garina se gari bena e hunia. ²⁴ Abidadama dainai Mose e badaho-badaho nenai, asi ena ura, Parao natuna hahinena ena bese ai bae gwauraia. ²⁵ To ia ena ura na Dirava ena bese ida bae hisihisi hebou, bona kara dika moaledia be se ura heni badina unu na basie mia daudau gaudia, ²⁶ ia ena haero ai Keriso dainai baine lodu hari, taga bada hereana bunai una ese Aikupito tagana iboudiai e hereadiamu. Una dainai ia matana na ina dava ai mo e hagerea. ²⁷ Abidadama dainai, Mose ese Aikupito e rakatania dia hanua pavapavana ese e badu henia dainai to e haheauka badina e kara ia ese asita itaiamu Diravana vada e itaia. ²⁸ Abidadama dainai, ia ese lagau hanai karana e badinaia bona rara danu e nevari, unu ese ala-ala aneru na ese memero roboa dia basine daudia toho. ²⁹ Abidadama dainai, idia ese Davara kakana e rakaia hanai tano kaukauna amo e raka hanai na heto. Aikupito taudia eto unu bae raka toma, to neganai, davara ese e hadonodia. ³⁰ Abidadama dainai, Ieriko maguna e keto, dina hitu e rakaia hegege murinai. ³¹ Abidadama dainai, mata bodaga hahinena, ladana Rahaba na egwau ede-ede taudia ida se mase badina ia ese hasinadoa taudia maino ai eabidia dae dainai. ³² Ma dahaka baina gwauraia? Badina nega na lasi bema lau ese ini idia baina herevalaidia, Gideon, Barak, Samson, Jephthah, Davida, Samuel danu peroveta taudia, ³³ Abidadama amo tanobada basileia dia e hadarere diava, kara maoromaoro e karava, bona gwauhamata eabiva. Idia ese Leona ududia ehakapudiava, ³⁴ lahi siahu dia e habodova, dare matadia amo e roho mauriva, edia gorere e hanamodiava, tuari ai goada heherea bona inai dia edia tuari oreadia e hadarerediava, ³⁵ Hahine ese edia mase e louva badina be e toreisi louva dainai. To haida be e hahisihisi diava, bae ruhadia danu seurava, badina toreisi namo hereana bae dibaia urana, ³⁶ bona haida be e kirikiri lai diava bona e kwadidiava, auri ai e guidiava danu bona e hadiburadiava. ³⁷ Nadi ai e hodo dia maseva, e hapararadiava iri amo, e tohodiava bona dare amo e aladiava e loava, mamoe kopidia bona nani kopidia e riova, ogogami, e hahisihisi diava bona se karadia namonamova. ³⁸ Idia na dia hegeregere tanobada ai bae noho; e loava tano gagaedia ai bona ororo ai, koura ai bona guri ai e nohova. ³⁹ Ini taunimanima na Dirava ese e hanamodia edia abidadama dainai to gwauhamata na seabia. ⁴⁰ Dirava ese gau namo hereana ta e haeroa ita eda, una na idia bona ita na nega tamona baita maoromaoro