¹ Bian Sara hap dawemsa golbirki mensa Z(e)na gu gubirkike. ² Zep hendep Sara ugwek zi walassa zep Abraham hap w(e)tablak kim zauk men dekam de Sara walas gwen hap gu-gublukake. Dekam Abraham mes tangan bogol gweka. ³ Abraham Isakkam zep walas zem insa bosetaka. ⁴ Isak mo gw(e)na kim mingguna ahaen taman blak, Abraham dekam zep tomopna blaunsubluka menkirekam Alap gublukake. ⁵ Isaksa inkim wezem jaha gwek, Abraham mo gw(e)n tahunna dekam mes 100 tahun gweka. ⁶ Dekam zep Sara guk, "Alap ansa kirekam abehap syal gwebir birki, ama tangan nga-ngol gwe'an! Hen k(i)tak de zini men z(e)nde owasna ansa (e)salada'ak, z(e)nsa h(e)n (e)-isrik-srigwer h(e)n (e)nga-ngol gwer! ⁷ Sap zini hom mae asa anakan enlala neibik z(e)nsa Abraham hap walsba w(e)tablal. Hw(e)na akam (e)e m(e)s(e) bogolak walasna w(e)tablal.'' ⁸ Isak dekam zep h(e)ndep mam gwezahe anka. Kim tahunna alt(i)ls(i)bl(i) zahek, dekam zep h(e)ndep momna baes gwezimki. Bizem Abraham bak dekam zep tembane yawala tehaka. ⁹ Sara dekam zep Hagar mo tanena Ismaelsa hlatak Isaksa de lamang tannak. ¹⁰ Dekam zep Sara Abrahamsa gubluk, "Emki Mesir wenya insa walas zeban zialsa sonen! Babu gwen wemo walasna in bapzen apdekam ano walasna anhan awe apdekam eno walaskam (e)n!'' ¹¹ Salbinkim Abraham mo elalana mantangan dowehanaka, sap Ismael zen hen z(e)no walas sake. ¹² Hw(e)na Alap kiz(e)p Abrahamsa gubluka, "Enlalana bahen Ismaelne Hagar nikip dowehanan. Saramo olsan emki ang gwen, sap mensa emsa gu-gubluk eno auyan aza tane wal hap dena, zen isak onakon saki lwal. ¹³ Sap eiwa kirekam hw(e)na (E) asa h(e)n babu gwen wenya inmo walsana insa zi ausu yawal mo auyan aza hap litasoner, sap zen h(e)n eno tane.'' ¹⁴ Kaankam, kak tangan nak zep Abraham luweka, dekam zep tembanena kaptaka h(e)n deyolsop nakonde syal gwebin botol yawala weya yure gwen hap dena golka. Desa zep k(i)tak Hagar mo nga(i)r(i)nak kangta seka, kizep tanezem inhan de zer songgwen hap gubirki. Hagar dekam zep Ismael han zi ol sr(e)m sangsan zersong gwek Bersyeba golek desan. ¹⁵ Otden weyana kim deyol sop nakore syal gwebin botol yawala inkon tap gwek, Hagar dekam z(e)p tane zem insa te-betek ausunak hl(i)tak. ¹⁶ Z(e)na dekam zep kon 100 meter enkam langa nwes(i)k hak inzau hl(i)tak dekon, zen man elala ennak anakan guk, "(E)e hom(e) dwam gwe'an aremo walasna ansa de t(i)nn(i)k hlatan hapye.''Zao zep nikirinikon gona mam enkam gw(e)'ak. ¹⁷ Dekam zep Alap Mo damtaha nakore zini gubirki, "Bahem gona gw(e)n, Hagar! Bahem a(i)r(i)n, sap Alap m(e)s eno tanemo gona sala. ¹⁸ Em luwen! Tane om insa em zaun tankam mas gweblan h(e)n songgwen hap em waulbluhan. Sap (E)e m(e)s(e) anakan gu-guk Ismael z(e)n zi ausu yawal mo auyan kamsa gw(e)ra.'' ¹⁹ Dekam z(e)p Alap Hagar hap weya nwena zertr(e)ibirki, in z(e)we walas zem insa dr(e)nek dekon langan nak hom. Dekan z(e)p desan song gwek deyol sop nakore syal gwebin botolak iwe z(e)p yurek kizep tane zem in hap otden hap golbak. ²⁰ Alap dekam zep walas tola insa mas gweblaka. Dekam z(e)p mam gweka h(e)n dep zise gweka, zi olsr(e)m langna Parank z(e)p gw(e)-gweka. Zen gwetapkam de otweran tamera gwen hap tangan tewes(i)k(i). ²¹ An zem Hagar bak Mesir wenya zep tane sem inhap oto gulbluk. ²² Dekam zep teips(i)n zini Abimelek bak z(e)re mo janana bare zimo teips(i)nn(i) Pikol bak han Abraham hon aptazaka zao zep enblaka, "(E)e m(e)s(e) emsa tawa (e)blak Alap man k(i)tak de eno syalak emsa mas gwe-gweblanda. ²³ Zen in zep n(e)n angkam ol gu-gunsu Alap Mo nwenak ahaen gun, anakan em eremo auyan aza tane walyaban enlala dam-dam enkam aban h(e)n ano auyan aza tane walyaban lowehe gwer. Men kirekam(e) (e)e Bian eban dawemkan zer gw(e)-gwenanke. Zep Bian, em anakan gu-gun, (e)e h(e)n kirekam asa eban (e)gwer h(e)n k(i)tak de langna awe de zinibanye anzao Bian em gw(e)'araye.'' ²⁴ Abraham kizep dinggul zimki, "A(i)r(i)s, asa kirekam gu-gul!'' ²⁵ Orep Abimelek hon de (e)babu gwen zini man Abraham honde (e)babu gwen zimo a(i)l(i)ho lultanna aldak. Dekam zep Abraham z(e)remo kire hap de enlala dowehanan ola Abimeleksa gubluka. ²⁶ Abimelek dekam zep dinggubluka, "(E)e hom(e) tame guk z(e)n nara kirekam syal gwebirki. Bian em home mae asa tawataka, (e)e namen(e) salan.'' ²⁷ Abraham dekam zep Abimelek hap, dombana h(e)n sapina kapgul bluka. Kizep hw(e)na ol gu-gunnu insa ahaen ulki. ²⁸ Kizep hw(e)na Abraham z(e)remo otweran kanggul gwen nakon domba we dolhwana tuju enkam kapgul halka sr(e)nde kanggun hup. ²⁹ Abimelek kizep takens(i)bl(i)ka, "Tujukam de domba we dolhwana in bahap?'' ³⁰ Abraham kizep dinggul bluka, "Emki tujukam de domba we dolhwana'an abon onak kapgul irin, ekakim bian anakan damnak asa gulu, eiwa a(i)l(i) homa in eme hultaka, bina eno dena h(e)n emesa dekon hona tey(i)s gwera.'' ³¹ Zen inzep langna insa bosenuk Bersyebakam, sap zen z(e)we ol gu-gunu insa ahaen ulki. ³² Kimki ol gu-gunnu insa Bersyebak iwe syal (e)isibirki, Abimelek dekam zep z(e)remo jananare zimo mamna Pikol ban han etan z(e)re nikmo (e)yala Filistin sindep olahalka. ³³ Abraham dekam zep tenya tamariskana (i)kg(i)lk(i), desa de enlala gwe-gwebin hip, Z(e)na zao zep hendep de gwe-gwen zini Alap han bokle komsoblan naban dawemna golblaka. ³⁴ Z(e)no hyanak, Abraham holo tangankam aha lang nakore zikim Filistin mo langnak gw(e)ka.