¹ Cho tungelo babali bethzile ku Sondoma muma ngwethzi, athimbu Lote watumbamene kuchikolo cha Sondoma. Loti waba mwene, wakatukile nakubawana, cho wakulamethele chianga chendi athi. ² Cho wendekele ngwendi, "Njalombo kuli yeni bashukwanana, njimilomba kutenguluka muka kobela mu njubo ya ngamba yeni, na kukalamo butsiki bumo na kutana kumendi eni. Cho mukakatuka imene mutondo nakuya bungethzi bweni." Cho bakumbulwile ngwabo, " Kwai tumanetha butsiki bwetu mumbaka." ³ Oloni wabalombele manene, nakuya nendi, cho baile nendi, cho bakakobelele mu njubo yendi. Cho waba wahethelele byakulya naku bochela likende lya kwonowa kwaka muthima, cho balile. ⁴ Oloni thimbu kanda balale, banu ba munganda, banalume bamu Sondoma, bathzengelekele njubo, boshe banike na bakulunu, boshe banu bakutunda mu bimbathzubwila byoshe bya nganda. ⁵ Bamuthanene Lote, na kwendeka ngwabo, "Bali kulijo banu banakobelele mu njubo yobe matsiki? Batuwithe ubanene kuli yetu, cho mangana tubathzubuke." ⁶ Cho Lote watuukile mu chikolo nakuya kuli bakebo cho washokele chikolo anima ya kutuuka chendi. ⁷ Cho wendekele ngwendi, "Njamilombo, bandolome bange, kethi mupangethe chuma chachibi embwe. ⁸ Kengeni, njili na banu babanakathzi babali baje kanda balimone na munalume. Njecheleni, njimilombe, njibatuwithe njibanene kuli yeni, cho mubalinge choshocho chachibwa mu mesho eni. Oloni kethi mubalinge chimo aba banalume mwafwa baija mwithi lya chimbimbi cha njubo yange." ⁹ Cho bendekele ngwabo, "Tundako!" Ou wethzile kuno na kuyoyelako ngwe litandinda, olojo napuoni mukakutuyula! Ololoni tukulinga chachibi chije tunethi kulingile kuli bakebo." Cho bamutnindakanene, kumushwenyetha kuli Lote, na kwija kuyehi nakupatula chikolo. ¹⁰ Oloni baje banalume batuhuthile maboko abo anja nakukokela Lote mukati ka njubo amolika nabo na kushoka ku chikolo. ¹¹ Cho bangethzi ba Lote bathzibalethele mesho abaje banalume bakele anja ku chikolo cha njubo, boshe banike na bakulunu, cho mangana bapwe bakujuka omo bashakethele kuwana chikolo. ¹² Cho banalume bendekele kuli Lote ngwabo, Uliko nabamo munondi? Baishomweno, bana bobe babanalume na bana bobe babanakathzi, cho na baje boshe bakala muno munganda, batuhwithemo boshe muno. ¹³ Omo yetu tushaka kunyongetha chino chela, mafwa miteto wakubanyanyametha wakuli Yehoba inapu yakama manene cho mukemo natutumu yetu linga lichinyongethe." ¹⁴ Lote watuukile anja nakwendeka kuli baishemweno, babanalume baje bakulaethele ku kukashombola bana bendi babanakathzi, na kwendeka ngwendi, "Bwathi bwathi, tundeni ano achela, omo Yehoba ashaka kunyongetha ino nganda." Oloni kuli baishemweno bachi mwene ngwe kweha. ¹⁵ Omo mutondotondo lithathi lyatuukile, tungelo balekele Lote, nakwendeka ngwabo, "Shangumukako kuya, ambata munakathzi wobe na bana bobe babali babanakathzi baje bali ano, mangana yobe kethi bakukombele kumo na kashitiko kamuno munganda. ¹⁶ Oloni Lote akotokelele kutuuka cho banalume bamukwatele ali boko lyendi, na liboko lya munakathzi wendi, na namaboko abana bendi babanakathzi babali, mwafwa Yehoba wakele na ng'eke ali ikeye. Waba tuhwithilemo na kukabaka anja ya nganda. ¹⁷ Omo babatuhwile anja, munalume umo wendekele ngwendi, "Tewetheni myonyo yeni! Kethi mukenge kunima embwe, nameme kukala kuli kwoshe muchana. Thebunukileni ku malundu mangana kethi mukanyonge. ¹⁸ Cho Lote wendekele kuli bakebo ngwendi, "Embwe njamilombo, bashikwanana bange! ¹⁹ Ngamba yeni nawana n'geke mu mesho eni, cho munamwetha chikeketima cha kuhyana mukwamena monyo wange, oloni kunjatha kuthebunukila ku malundu, mwafwa bukalu umo wukanjuwanena kuje, cho njikatsa. ²⁰ Kengeni, ije nganda ili kuje ili muyehi inapumo mukutewelamo, cho inapu yaindondo. Njalombo, njecheleni njithebunukilemo (kethi yaindondondi?), cho na mwonyo wange baka wamena. ²¹ Cho wendekele kuli ikeye ngwendi, Chachibwa njinathzibithitha kulinyenga chobe lalo, cho kunjethi nakukanyongetha nganda ije una tumbula embwe. ²² Thzangula! Thebunikalamo muje, omo kunjilingimo nameme chumo embwe kubanga unete kuje." Cho oni nganda baithanene ngwabo Zoale. ²³ Lithathi lyatuukile helu lya athi muje Lote wetele mu Zaole. ²⁴ Cho Yehoba wanokethele athi tuhya twa salifa helu lya Sondoma na Ngomola kutunda mwilu. ²⁵ Cho wanyongethele bije binganda, na byaana byoshe, na bakelemo muje mu binganda, na bimbuto bije byathokele athi. ²⁶ Oloni munakathzi wa Lote, uje akele munima yendi, wakengele kunima, cho watengulukile kupwa libundungulu lya mwongwa. ²⁷ Abilahama wendukile mutondo tondo na kuya kuchela kuje kwemanene laja kumesho a Yehoba. ²⁸ Cho wakengele hathi ya Sondoma na Ngomola na halifuti lyoshe lya muchana. Cho wakengele lalo wamwene, bwithi bwakele nakukakumuka kutunda mu lifuti ngwe bwithi bwa chibili. ²⁹ Cho omo Njambi wanyongethele binganda bya muchana, Njambi wanukithile Abilahama. Cho wamutundithilemo Lote mukati kabukalu buje omo anyongethele binganda bije wakele na kuyoyela Lote. ³⁰ Oloni Lote wakandukile kutunda ku Zoale na kukayoyela ku malundu amolika na bana bendi babali babanakathzi, mafwa wathzibile lyoba lya kuyoyela mu Zoale. Cho wayoyelele mu chingelengenya, ikeye na bana bendi babali babanakathzi. ³¹ Munendi wantwatwa wendekele kuli shongo yendi ngwendi, "Tate yetu nathinakathza, cho kukwethi kumo kwai kuli munalume wakulala netu kwetheketha mungila ya muno mukaye. ³² Ija, echele tunwithe tate binyu, cho mangana tulale nendi, cho mangana tutandunune ngila ya tate yetu." ³³ Cho balingithile ishabo kunwa binyu abuthsiki buje, Cho munendi wantatwa wakobelelemo cho wakalalele na ishe; cho ishe kathzibukile omo walalele nendi nameme kwinduka kwaiindukililemo munendi embwe. ³⁴ Alithathi likwabo lyatakaneneko munendi wa ntwata wendekele kuli shongo yendi ngwendi, "Thzibilila, hano yange bunthsiki bwa ithzau njalalele na tate. Echela tunwithe binyu ano mathsiki lalo, cho mangana yobe uyemo cho mangana ukalale nendi, mangana tukatandunune ngila ya tate yetu." ³⁵ Cho balingithile ishabo kunwa binyu buje buthsiki lalo, cho shongo yendi ailemo wakalalele nendi. Cho ishe kathzubukile omo walalele nendi nameme kwinduka kwaindukililemo munendi embwe. ³⁶ Cho boshe bana bendi babali babanakathzi bakele na memo akwimita na ishabo. ³⁷ Cho munendi wantwata akitile mwana wa munalume, nakumuluka lithzina lya Moambu. Cho ikeye naija nakupwa kakulwila wabaka Moambu nathimbu ino yalelo. ³⁸ Ngwe kuli munendi wa munakathzi wa mwanike, nendi lalo wakitile mwana wa munalume, nakumuluka lithzina lya Mben- Amumi. Cho naija nakupwa kakulwila wa banu bamuli Ammoni nathimbu ino yalelo.