¹ Cho mu ngonde ya mulikumi nababali, eyi ikeyo ngonde ya Andala, alitangwa ya mulikumi natatu, omo lithiko na lijwi lya mwene bashakele ku ambatamo, alitangwa omo bitothzi baba Yundeya bakulaethele kukala na binthzili ali bakebo, babitengulwile. Cho ba Yundeya bakele na binthzili ali baje babathzindile. ² Cho ba Yundeya balikungulwile mu binganda byabo kwita mwoshe mu bimbongi bya mwene Ahashwelusi, nakukambeka maboko ali baje bethekele kunena bukalu ali bakebo. Naumo wai wathele kubabindika, mulonga wa kubathziba lyoba lyakele ali banu boshe. ³ Bakulunu babipangi bamu bimbongi, bangulubenu bamu bimbongi, bangulubenu, na bakakutwamenena ba mwene, bakwathele ba Yundeya mwafwa lyoba lya wililile ali bakebo. ⁴ Omo Molindekai wapwile wakuhyana mu njubo ya mwene, na luthsimo lwendi lwatandele mu bimbongi byoshe, mwafwa munalume Molindekai wapwile wakuhyana manene. ⁵ Cho ba Yundeya balukukile bitothzi babo na moko ya mukwale, kubathsiya na kubanyongetha, nakulinga omo chabwaethele ku bimbunge bya baje babathzindile. ⁶ Mu chipaka cha Shusha ba Yundeya babathsihile na kubanyongetha bita bitanu babanalume. ⁷ Bathsihile Palishandatha, Ndilifoni, Asipatha, ⁸ Polatha, Andaliya, Alindatha, ⁹ Palimashita, Alisai, Alindai, Vaizatha, ¹⁰ cho na likumi lya bana babanalume ba Hamani mwana wa munalume wa Hamumendatha, chitothzi cha ba Yundeya. Oloni kubapukwile embwe. ¹¹ Litangwa lije theteko yabaje babathsihile mu limbo lya Shush, bakambulwile kuli mwene. ¹² Cho mwene wendekele kuli mwene wa munakathzi Esita, ngwendi, "Banathsihi biita batanu bya banu mu limbo lya Shusha, kukumbathanako likumi lyabana ba banalume ba Hamani. Cho bikajo banalingi mu bimbongi byoshe bya mwene? Cho bika ushaka? Babyane kuli yobe. Bika ulomba? Babyane kuli yobe? ¹³ Esita wendekele ngwendi," Umona chinabwahetha mwene ku mbunge, echeleni ba Yundeya baje bali mu Shusha babatabethe na kwambata eli lijwi lya lelo imene lalo, na kwechela mibila likumi ya bana babanalume ba Hamani baishukike ha tuthandya. ¹⁴ Cho mwene wakambeyeye ngwendi echi chilingiwe. Lijwi balyanene mu Shusha cho bashukikile likumi lya bana babanalume ba Hamani. ¹⁵ Cho ba Yundeya baje bakele mu Shusha bethzile amolika alitangwa lya mulikumi na wana lya mu ngonde ya Andala, na kuthsiha bakwabo lalo biita bitatu bya banu mu Shusha, oloni kuba thalekele maboko abo alipuku embwe. ¹⁶ Boshe ba Yundeya baje bakele mu bimbongi bya mwene bethzile amolika nakwohyela myonyo yabo, cho batambwile bukwatho kutunda kuli bitothzi babo na kuthsiya makulakathzi makumi atanu nabali na tanu abanu baje babathzindile, oloni kubathalekele maboko abo ali baje bakuhyana babathsihile embwe. ¹⁷ Echi chasholokele alitangwa lya mulikumi na atatu mu ngonde ya Andala. Alitangwa lya mulikumi na wana bahwimine na kupanga lije litangwa kupwa lya kwonowa kulya na kubwaelela. ¹⁸ Oloni ba Yundeya baje bakele mu Shusha bakungulukile amolika alitangwa lya mulikumi na atatu na litangwa lya mulikumi na wana. Alitangwa lya mulikumi na atanu bahwimine nakulipanga kupwa litangwa lya kulya na kubwaelela. ¹⁹ Cho mukemoni ba Yundeya ba mu membo, baje bapangele membo abo kuyehi na bimbongi, bamwene litangwa lya mulikumi na wana lya mungonde ya Andala kupwa ngwe litangwa lya kubwaelela na kulya, nakupwa ngwe litangwa libakatumu bwana bwa bya kulya kuli umo namukwabo. ²⁰ Molindekai wathonene ebi byuma nakutuma mikanda kuli ba Yundeya boshe baje bakele mu bimbongi byoshe bya mwene Ahashwelusi, boshe baku yehi na kulyala, ²¹ nakubaleketha bakanyunge litangwa lya mulikumi na awana na litangwa lya mulikumi na tanu mu ngonde ya Andala myaka yoshe. ²² Awa apwile matangwa omo ba Yundeya batambwile bukwatho kutunda kuli bitothzi babo, na ngonde omo mukwale wabo watengulukile kukujolela, na kulilila mu litangwa lya kubwaelelamo. Cho bakapange kupwa matangwa akulya na kubwaelela, na kutuma bwana bwa byakulya kuli umo na mukwabo, na bwana kuli biutu. ²³ Cho ba Yundeya batwaleleo bibashangumukile kulinga, bije Molindekai wabathonekelele. ²⁴ Hathimbu ya Hamani mwana wa munalume wa Hamumendetha waku Angangite, chitothzi cha ba Yundeya boshe, waba thinganyekelele mwaku banyongethelamo, watele lyongo (otu twapwile tumatheno), twakubakaluwitha na kubabihithilamo. ²⁵ Oloni omo ng'anda yethzile ku mesho a mwene, cho wanene chikombeyo mu mikanda ngwendi mana abubi apangele Hamani ali ba Yundeya anapande kwiluka ha mutwe wendi babenya cho linga ikeye na munendi wa munalume banapande kubashukika a tuthandya. ²⁶ Choni bathanene awa matangwa ngwabo Pulimu, anima ya lithzina lya Puli. Mwafwa wa byuma byoshe bije bibathonene muli ou mukanda, na byuma byoshe bije biba mwene na bije bya tholokele kuli bakebo, ²⁷ ba Yundeya batabelele bithzila na bipangi bikwabo. Ebi bithzila bikapwa byabo babenya, bakakulwila babo na woshe akalikumbathana kuli bakebo Chikapwa ngwabo bakabwaelela ali awa matangwa abali mu myaka yoshe. Cho bakabwaelela mungila yeka athimbu imo mu mwaka woshe. ²⁸ Awa matangwa akapwa akukanukilamo na kubwaelelamo mu bikota byoshe, mubuthemi byoshe, mu bimbongi byoshe, na mu bimbaka byoshe. Aba ba Yundeya na ba kakulwila babo banapande kwanuka awa matangwa a Pulimu, mangana bakelike kuwebala. ²⁹ Mwene wa munakathzi Esita mwana wa munakathzi wa Abihaili na Molindekai ka Yundeya wathonene nalithetha lya kushula nakutabetha ou mukanda wa muchibali ali Pulimu. ³⁰ Mikanda baitumine kuba Yundeya boshe mu bimbongi bya kupwa chita chimo na makumi abali na bimbongi bitanu na bibali bya mu nganda ya Ahashwelusi, na kubakulaetha ba Yundeya kukala mwa buchili na buthunga. ³¹ Eyi mikanda yatabethele matangwa a Pulimu abenikile athimbu yabo, ngwe Molindekai, ka Yundeya na mwene wa munakathzi Esita bamukambeyeye ba Yundeya. Cho ba Yundeya batabele echi chikambeyo kuli bakebo babenya na kuli bakakulwila babo, ngwe muje lalo batabethele bithimbu bya kwonowa kulya na kulila bimbimbi. ³² Cho chikambeyo cha Esita chatabethele mathiko kwetheka ali Pulimu cho bachithonene mu mukanda.