¹ Alitangwa lije mwene Ahashwelusi wanene bitenga bya Hamani kuli mwene wa munakathzi Esita, chitothzi cha ba Yundeya, cho Molindekai washangumukile kupanga ku mesho a mwene, mwfawa Esita walekele mwene omo Molindekai alithzubukile nendi. ² Cho mwene washulwile kathzeya kaku munye, kaje katambwile kuli Hamani nakukana kuli Molindekai. Cho Esita wanene Molindekai lithetha lya kukenga abyuma bya Hamani. ³ Cho Esita wendekele lalo kuli mwene. Cho wawithile mesho endi athi na kulila oku ali nakulambelele mangana bamanethe bithinganyeka bya bubi bwa Hamani muka Angigite, ku chela chije chiba thinganyekelele kubalingilamo ba Yundeya. ⁴ Cho mwene wanene mande yendi ya ngolinde kuli Esita cho wakatukile na kwimana ku mesho a mwene. ⁵ Cho wendekele ngwendi, "Umona chibwaetha mwene kumbunge, nameme njiwana bukwatho ku mesho endi, umona byuma bimimona bipwa byabibwa ku mesho a mwene, cho njamubwaetha mu mesho endi; echeleni lijwi balithoneke kukulitengulula mu mukanda wathonene Hamani mwana wa munalume wa Hamumendatha muka Angangite, mikanda ije bathonene mangana babihithe ba Yundeya boshe bakele mu bimbongi bya mwene. ⁶ Cho njatha kumona batijo bukalu buje bukawila ali banu bange? Cho njatha batijo kukenga kunyongetha cha babushoko bange?" ⁷ Cho mwene Ahashwelusi wendekele kuli mwene wa munakathzi Esita na Molindekai ka Yundeya ngwendi, "Kenga, njinana Esita njubo ya Hamani, cho bana mushukika ha kathandya, mwafwa wakele na kuya na kulukuka ba Yundeya. ⁸ Thoneni lijwi likwabo lya ba Yundeya mu lithzina lya mwene na kulishoka na kathzeya ka bumwene. Mwafwa lijwi libanathono laja mu lithzina lya mwene na kulishoka na kathzeya ka bumwene kubatha kuliitengulula. ⁹ Cho bakakuthona ba mwene babathanene athimbu ije, mungonde ya muchitatu, ikeyo ngonde ya Sibani, alitangwa lya makumi abali na tatu amu ngonde. Lijwi balithonene kwetheketha byoshe bije Molindekai wa kambeyeye ali ba Yundeya. Cho balithonekelele kuli bangulubenu babimbongi, bangulubenu na bakulunu babipangi bamu bimbongi baje batundile ku India kweta ku Kushi, bimbongi bya kupwa chiita chimo na makumi abali na bimbongi bitanu na bibali, ku mbongi byoshe bathonekele mumathona abo babenya, naku banu boshe mu lilimi lyabo babenya, nakuli ba Yundeya mu mathona amalimi abo babenya. ¹⁰ Molindekai wathonene mu lithzina lya mwene Ahashwelusi na kuushoka na kathzeya ka bumwene.Cho watumine mikanda na kuyambata kuli baka kwendela ha bimulu, bimulu banthzita baje babapangethele mu bipangi bya mwene, baje bathemukile mu butanga bwa bumwene. ¹¹ Mwene wanene kuli ba Yundeya baje bakele nalithetha lya mu nganda nakuba kungulula amolika nakupanga ngunthzi ya kulikikiya ku myonyo yabo; kubamanuthula, kubathsiya, na kubihitha binthzili bya mashwalale kutunda ku banu nameme bimbongi bije bikalukuka , banike na banakathzi baba kumbathanene, nameme kubapukula bufuko bwabo. ¹² Echi chalingiwile mu bimbongi byoshe bya mwene Ahashwelusi alitangwa lya mulikumi natatu mu ngonde ya mulikumi nabali, eyi ikeyo ngonde ya Andali. ¹³ Mbathzubwila imo ya lijwi bayanene kupwa ngwe lithiko mu bimbongi byoshe na mbunga bali shandolwele kuli banu boshe. Cho ba Yundeya bakele nakubatanda alitangwa lije nakutwala nthzita ali bitothzi babo. ¹⁴ Cho babashikithile baje bakele nakwenda abi mulu byabu mwene baje bakele nakupangetha mu nganda ya mwene. Cho baile chakwonowa kuthimbula. Cho lijwi lya mwene balishandowele kutunda ku chela mu Shusha. ¹⁵ Cho Molindekai watundile ku mesho amwene oku nathzala buthzalo bwabu mwene bwa kubunduluka na bwakutoka, na chilongo chakuhyana cha ngolinde na mukole wa kuthzibuluka wa bwanda bwa linyu, na nganda ya Shusha yatambakanene na kubwaelela. ¹⁶ Cho ba Yundeya bakele na cheke na kubwaelela, na kulya na ¹⁷ kulilemetha. Mu bimbongi byoshe na mubi nganda byoshe, kuli kwoshe ng'anda na lijwi lya mwene lyetele, kwakele kubwaelela na kulya akati ka ba Yundeya, chilika na litangwa lya kuhwima. Babangi kutunda akati kabanu bakulithethzathethza ba mu lifuti bapwile ba Yundeya, mwafwa lyoba lya ba Yundeya lya wililile ali bakebo.