¹ Mumatangwa a Ahashwelusi (ou ikeye Ahashwelusi uje wayulile ku India kweta ku Kushi,, kutubakana a bimbongi, byakupwa chiita chimo na makumi abali na bimbongi bitanu na bibali), ² mumatangwa aje mwene Ahoshwelusi watumbamene a chitumambamo chendi cha bumwene bwa mu Shusha. ³ Mumwaka wamuchitatu wa kuyula chendi, wanene chilika kuli banu bendi boshe na bingamba bendi. Mashwalale baku Pelisha na baku Mendiya,bakulema, ndungubulenu ba mu bimbongi bakele ku mesho endi. ⁴ Cho washandwile bufuko bwa kulyana bwa mu nganda yendi na kathingimiko ka bumpau ka kuhyana kwendi a matangwa amangi akupwa chiiita chimo na makumi atanu na atatu a matangwa. ⁵ Omo awa matangwa ahwile, cho mwene wanene chilika chije chahwile amatangwa atanu na bali chapwile cha banu boshe mu limbo lya Shusha, kutunda ku bakama manene kuketa ku babandondo chakele mu chela cha mu ngalanja ya mwene. ⁶ Cho chela cha ngalanja bachithzengelekele na nanga ya bwanda bwa kutoka na butongwe bwa kuthzibuluka, na byaku byakuthzima na byakubenguluka byalipatekele amolika na siliba kutunda kubinguthzi bya mamanya. Cho kwakele bya kushulubalao bya ngolinde na siliba bibajalele athi amabwe akubenguluka, yakubunduluka, na mabwe amusombelo. ⁷ Babane bya kunwa mu binjanja bya ngolinde, bya kulithebukathebuka cho kwakele binyu byabingi bije byethzile mwafwa bwabuhwanga bwa mwene. ⁸ Cho kunwa chatwalele na kunyunga lithiko lya kwendeka ngwalyo, "Kethi kukale umo athindiya mukwabo kunwa embwe," ngwe mungila eyi mwene naana chikambeyo ku baka bipangi bamu chela chendi boshe kulinga kwetheketha mwaila chithzango cha munu. ⁹ Cho lalo mwene wa munakathzi walithzina lya Vashiti wanene chilika cha munakathzi wamu chela cha ba mwene bwa mwene Ahashwelusi. ¹⁰ Alitangwa lya chitanu na abali, omo mu mbunge ya mwene wathzibile kubwaha mwafwa wa binyu, cho walekele Muhumani, Mbizitha, Hambona, Mbingitha, Ambangitha, Zathale, na Kalikasi (batanu na bali bapangele ku mesho endi), ¹¹ kunena mwene wa munakathzi wa lithzina lya Vashuli ku mesho endi amolika na buthzalo bwendi bwa bu mwene. Cho washakele kumwetha banu na bakabipangi kubwaha, chifwa cha kumubila wendi. ¹² Oloni mwene wa munakathzi Vashiti wabyanene kwija alijwi lya mwene uje wanenele kuli ikeye kuli bakabipangi. Cho mwene walubalele manene; bithinganyeka bya mwenyekele mukati muli ikeye. ¹³ Cho mwene walithzibathanene na banu baje bathzubukile ngwendi bali na maana, baje bathzubukile thimbu (omo echi chapwile kuthungametha kwa mwene kuli boshe baje bapwile bangamba mu lithiko nakuthompetha). ¹⁴ Oloni bakele kuyehi nendi bapwile kuli Shena, Shethale, Andimatha, Talishishi, Melesi, Malisena, na Memukani, aba batanu na babali bana babi myene baku Pelisiya na Mendiya. Bakele na binthzili kuli mwene cho bakwatele byela bya kama manene muje bene mu nganda. ¹⁵ "Mwaila lithiko, tulinga bati ali mwene wa munakathzi wa lithzina lya Vashiti mwafwa kakabangeyeye lithiko lya mwene Ahashwelusi, lije libamunenelele kuli baka bipangi bendi bakama?" ¹⁶ Memukani wendekele ngwendi kumesho amwene na baka bipangi bendi, "Kethi kuli mwene lika kwana biitha embwe, oloni na kuli baka bipangi bendi lalo na kuli banu boshe baje bakele mu bimbongi byoshe bya mwene Ahashwelusi. ¹⁷ A chande chou mwene wa munakathzi chikathzibakana kuli banakathzi boshe. Chikabanenela kuchipangetha kuli banalume babo mukonowa kubathzibilila. Cho bakendeka ngwabo, 'Mwene Ahashwelusi wakambeyeye mwene wa munakathzi Vashiti kumunena ku mesho endi, oloni wa byanene.' ¹⁸ Thimbu kanda litangwa eli bene litoke ba banakathzi baba kulunu baku Pelisiya na Mendiya baje banathzibi chande cha mwene wa munakathzi bakendeka mumolika kuli boshe baka bipangi ba mwene. Cho kukakala kwonowa kuthzibilila na likamba. ¹⁹ Umona ngwe chibwaetha mwene, cho echeleni lijwi lya bu mwene balitume kutunda kuli ikeye, cho echeleni balithone mu mathiko abaka Pelisiya na baka Mendiya, lije likonowa kutenguluka, ngwabo Vashili kethi lalo kwija ku mesho endi mwene. Cho echeleni mwene ane chela chendi cha bumwene wa munakathzi kuli mukwabo uje natubakana ali ikeye. ²⁰ Ngwe lijwi lya mwene balyambulula mwaila nganda yendi yoshe, cho banakathzi boshe baka thingimika banalume babo, kutunda kuwa kama manene kweta kuli wa mundondo." ²¹ Cho mwene na bana bendi bapwile baku bwaelele naku kunangula, cho na mwene walingile ngwe muje mwangwile Memukani. ²² Cho watumine mikanda ku bimbongi byoshe bya bu mwene, ku mbongi yoshe ya mu nganda na bithona byayo, cho na munu woshe mu lilimi lyendi. Cho wakambeyeye ngwendi munu woshe napande kupwa mukulunu a njubo yendi. Eli lijwi walyanene mu lilimi lya munu woshe lya mubu mwene.