¹ Anima yebi byuma, omo butenu bwa mwene Ahushwelusi bwa tepulukile, wathinganyekele ali Vashiti na bika byanalingi. Cho lalo wathinganyekele akati ka lije lijwi lya pangele ali ikeye. ² Cho mwanike wamundondo wa mwene uje wapangele kuli ikeye wendekele ngwendi, "Echeleni akale kushakethzeka banike baba mbanda ba babawa baje kanda balimone na banalume mu lithzina lya mwene. ³ Echeleni mwene enike bakulunu mu bimbongi bya mu nganda yendi na kukungulula amolika boshe banike baba mbanda bababwa baje kanda balimone na banalume mu limbo lya bumwene ku Shusha. Echeleni babanyunge kuli Hengai, mukulunu wa mwene, ou aka kenge abanakathzi, cho echeleni abane mathzi akuli bwabetha. ⁴ Cho echeleni mwanike wa munakathzi uje abwaeletha mwene ku mbunge kupwa mwene wa munakathzi kuhinga mu chela cha Vashiti." Echi kunangula chabwaelethele mwene ku mbunge cho walingilemo. ⁵ Kwakele ka Yundeya umo mu limbo lya bumwene lya Shasha uje lithzina lyendi lyapwile Molindekai mwana wa munalume wa Njaili mwana wa munalume wa Shimei mwana wa munalume wa Kishi, uje wakuli ba Mbenjamini. ⁶ Cho bamwambatele kumutunditha ku Yelusalema na baje baba kwatele nabo na kubambata amo na Yehoiyakini, mwene wa Yunda, uje Nembukaneza mwene wa Mbambilona yambatele. ⁷ Cho wamunyungile Handasa, uje wapwile mwana wa munakathzi wa inanu ya Esita, mwafwa kakele naba ishe nameme baina. Cho ou mwanike wa munakathzi wakele na mubila waubwa na kuuthzanga muchifwa chendi. Molindekai wamwambatele nakupwa ngwe munendi wa munakathzi. ⁸ Omo kukambeya lijwi lya mwene ba byambulwile, banike babanakathzi babangi babanenele mu limbo lya Shisha. Cho baba nyungile kuli Hangai. Cho Esita lalo bamutwalele mu chela cha mwene naku kamunyunga kuli Hangai, mukulunu wa banakathzi. ⁹ Cho mwanike wa munakathzi wa bwahethele ku mbunge, cho wamwanene bukwatho nendi. Ajebene wamwanene mathzi akunika mwamubwa na mutambela wa bya kulya Cho wamwanene bingamba batanu na babali ba banike babanakathzi kutunda ku chela cha mwene na kumushwenyethela ngamba wa mwanike wa munakathzi ku chela cha chibwa cha mu njubo ya banakathzi. ¹⁰ Cho Esita kalekethele nameme umo wai obo bapwile banu bendi nameme babushoko bendi, mwafwa Mondekai wamubyanethele kubyendeka. ¹¹ Matangwa oshe Mondekai wakele nakwendangana kwiluka kunima na kuya kulutwe anja lya chikolo cha njubo ya banakathzi, mukuthzibukitha kuyoya cha Esita, hali biba kamulinga. ¹² Omo thimbu yethzile ali mwanike wa munakathzi woshe kuya kuli mwene Ahashwelusi—anima yakukabangeya mathiko aba banakathzi habingonde byakupwa likumi na bibali, ei ikeyo thimbu yabo ya kubabwaethelamo, bingonde bitanu naimo na mathzi abulilila, cho bitanu naimo mathzi alwonga akunuka na ¹³ byakulikwita—omo mwanike wa munakthzi waile kuli mwene, bili byoshe byathzangele ba mwanenebyo kutunda mu njubo ya banakathzi, na kubyambata ku chela chendi. ¹⁴ Cho mangwethzi aya mukati , cho mutondo eluka ku njubo ya muchibali ya banakathzi ije ibakele na kunyunga kuli Shashingazi, mukabipangi wa mwene, uje wakele na kunyunga bithzila bya mwene. Cho kathele lalo kwiluka kuli mwene kubanga na mutokela ku mbunge yeni mwene nakumuthana alithzina. ¹⁵ Ololo omo thimbu ya Esita ( mwana wa munakathzi wa Ambihaili, inanu ya Mondekai, uje wamwabatele kupwa ngwe munendi wa munakathzi ) nakuya mukati muli mwene, cho kehwithithile na chimo chai oloni bije Hangai mukabipangi wa mwene, uje wakele nakukengetha abanakathzi, byathinganyekele. Cho Esita watambwile bukwatho kuli boshe bamu mwene. ¹⁶ Cho Esita bamutwalele kuli mwene Ahashwelusi mu chela cha bumwene mu ngonde ya mulikumi, ikeyo ngonde ya Tembethi, mu mwaka wa muchitanu na ibali mu kuyula chendi. ¹⁷ Cho mwene wamuthzangele Esita manene ku tubakana bakwabo banakathzi cho watambwile bukwatho na kumunyunga bwino ku mesho endi, kutubakana bakwabo boshe bambanda. Cho wamu bwahethelele chilongo chabu mwene ku mutwe wendi na kumupwitha kupwa mwene wamunakathzi mungila yakukalao Vashiti. ¹⁸ Mwene wanene chilika chakama manene kuli boshe bakabipangi bendi na bingamba bendi, "Chilika cha Esita," cho wanene litangwa lyakuhwimina ku bimbongi. Cho lalo wanene bwana bwakwetheketha mwaila kwana. ¹⁹ Cho omo banike babambanda baba kungulwile amolika ka muchibali, Mondekai watumbamene achikolo cha mwene. ²⁰ Esita kalekethele naumo wai bya babushoko bendi nameme banu embwe, ngwe muje mwamulekethele Mondekai. Cho watwaleleo nakukabangeya kunangula kwa Mondekai, ngwe muje mwalingile muje bamujundwile kuli ikeye. ²¹ Mumatangwa aje, athimbu Mondekai watumbamene ku chikolo cha mwene, bakabipangi babali, Mbingithana na Teleshi, baje banyungile ngila ya chikolo, bethzile nakulubala na kuthinganyeka kubulumuna mwene Ahashwelusi. ²² Cho omo ng'anda baithzibikithile kuli Mondekai, cho walekele mwene wa munakathzi Esita, na Esita wendekele kuli mwene mu lithzina lya Mondekai. ²³ Cho muthzimbu bamwihuthithile na kuwana buthunga, na boshe banalume baba shukikile ku chiti. Cho eyi ng'anga baithonene, mu mukanda wa binguli ku mesho a mwene mu kuyula chendi.