¹ Vuno Mboaze uakandukile ku mbelo naku tumamako. Vuavuno, kaha kavusuko uze uakuli Mboaze ua handekele uahitilileko. Mboaze ua handekele kuli ikeye ngueni, ''Sepa liange, tuaya kuno na kutumama.'' Kaha yala uaile kuli ikeye na kutumama. ² Kaha Mboaze uatambuile likumi lia vakuluntu va limbo na kuhandeka ngueni, ''Tumamenu kuno.'' Ngoco va tumamene. ³ Mboaze ua handekele na kuvusoko ngueni, ''Naome, uze nahiluka kufuma kucifuti ca Moave, anaku landesa lihia lize liekele lia manetu Elimeleke. ⁴ Kaha njasinganieka kuku soluelaco nguange, ' Lilande kumeso ava vanatumama hano, nakmeso va kuluntu vange.' Ngue u kuhianga kuli kula likule. Vunoni ngue ukuhianga, kuli kula njilekeko, mangana Ange njintantekeye, Muomu kakuesi umo akuli kula kuvanga ove, Ange njili nove.'' Kaha vamala vakuovo vahandekele nguavo, ''Njika likula.'' ⁵ Kaha Mboaze ngueni, ''Hali tangua lize liu kalanda lihia kufuma kuliviko lia Naome, uatela kumbata Lute mpuevo kaMoave, yauze yala mutsi, mukusangula lizina liuze mutsi kuvu suana vueni.'' ⁶ kaha kavusoko uze ua nkuli ngueni, ''Kanji kuasa kuli kula ange yavene cakuhona kuenieka vusuna vuange. Lintentule ove mpoko yaku kula ove yavene, muomu Ange kanjikuasa kuli kula.'' ⁷ Vuno ku tsimbu ya laza eci cakele cilika ca mu Isaleli mu kula namu kulandakana viuma. nakukolesa viuna viose, muntu uazulile sapato yeni na kuhia mukuavo muvaaa tungila; kaha eci cakele cika ca vukaleho mu Isaleli. ⁸ Ngoco kavusuko uze ua nkuli ua hadekele kuli Mboaze ngueni, ''Lilande ove yavene,'' kaha uzulile sapato yeni. ⁹ Kaha Mboaze ua handekele kuli vakuluntu nakuli vantu vose ngueni, ''Enu muva kaleho lelo Ange njalanda viose via pandama kuli Elimeleke na viose via pandamene kuli Cilione na Malone kufuma mulihia lia Naome. ¹⁰ Kaha naua Lute muka Moave, mpuevo ya Mahalone, Ange njina muondela kukala mpueyange, mukusangula lizina lia mutsi muvu suana vueni, mangana lizina lieni lihone kunonga hakati kavana vanaye na mbelo ya cihela ceni. Lelo yove mukaleho!'' ¹¹ Vantu vose vakele kumbelo kaha vakuluntu nguavo, ''Etu yetu vakaleho. Yehova a puise mpuevo ou neza mundzivo yove ngue Lakele na Lea, vaze vavali vatungile ndzivo ya Isaleli; nove linga via cili mu Efelate kaha tsimana mu Mbetelema. ¹² Ndzivo yove ihimpuke ngue ndzivo ya Peleze, uze ya semene Tamale kuli Yunda, ku mbuto ize Yehova aka kuhia kuli muana ua mpuevo ou.'' ¹³ Ngoca Mboaze ua tambuile Lute, na kukala mpueyeni. uaile kuli ikeye, kaha Yehova ua mui mitisile, ua semene muana ua yala. ¹⁴ Kaha mpuevo ua handekele kuli Naome ngueni, ''Yehova ikeye uaku vezikisa, uze nahono kukuseza lelo cakuhona kavusoko, ou kakeke. Lizina lieni litsimane mu Isaleli. ¹⁵ Kaha ikeye akakala kuli ove mukaku hiluisa muono namu kakuku lisa muvu sinakazi vuove, nokomueno, uze aku lema, kuli ove nahina vatanu navali, namu seme.'' ¹⁶ Kaha Naome ua nonene muana, nakumuhaka muntulu yeni ivene nakumu lela. ¹⁷ Kaha mpuevo mukaku lihita neni uamuhiele lizina, ngueni, ''Muana ua yala nasemuka kuli Naome.'' Uamu lukile lizina ngueni Ovende. Ikeye akele ise ya Njese, ikeye akele ise ya Ndaviti. ¹⁸ Vuno aua akeo mazimo a Peleze: Peleze uasemene Hezelone, ¹⁹ Hezelone uasemene Rame, Rame uasemene aminandave, ²⁰ Aminandave uasemene Nasone, Nasone uasemene Salemone, ²¹ Salemone uasemene Mboaze, Mboaze uasemene Ovende, ²² Ovende uasemene Njese, kaha Njese uasemene Ndaviti.