¹ Vikandzo tu katumbula via uanene kukuetu Avilahama via uanene kumuvila, auanene? ² Muomu Avilahama nga ua sambuele ku vilinga vieni nga ali naku livua vunoni kati kuli Njambi. ³ Muomu cisoneka catumbula vati? "Kaha Avilahama ua tsilielele Njambi, kaha cikeo vamu tandeleleco ku vuviuke. ⁴ Vuno mukua kupanga, fuelo yeni ka va mutandelayo ngue ya kavumbi, vunoni ngue ya likongo. ⁵ Vunoni uze keku panga a tsiliela kuli uze a tuluisa mukua vupi kumu puisa mukua vuvuike, ku- tsiliela ceni vamu tandelaco ngue vuvuike. ⁶ Ngecize Ndaviti neni naua ua tumbuile kuvezika ca muntu uze Njambi amu tandela vuvuike na vukevuo kati vua vilinga vieni ngueni. ⁷ Ua handekele, "vanavezika cikuma ava vava nekela ku vivuluimuna viavo, na vupi viavo va na fuika. ⁸ Navezika yala uze muangana kamutandela vupi." ⁹ Vunondzo kuvezika eci vana vatumbuilaco vakua kulovoka lika nina kuvilima naua? "Muomu tuhandeka, Avihalama kutsiliela ceni vamutandeleco ngue vuvuike," ¹⁰ Vuno vamu tandeleco vatindzo? Tena lovoka laza ni teuli kuvulima? Kati haku lovoka vunoni muze te uli kuvulima. ¹¹ Avilahama ua tambuile cimueso cakulovoka cikeco cimueso ca vuviuke vua kutsiela cize cakele naco ntsimbu te uli kuvulima. Ikeye akapue Ise ya vose vakua kutsiliela vutuhu valiku vulima, ngecize navo vuvuike vaka va tandela vuo. ¹² Na ikeye Ise ya kulovoka kuli vaze kati vali lika na kulovoka vunoni venda naua mu zingano zia kutsiliela cize ca tatetu Avilahama cikeco uakele naco te uliku vulima. ¹³ Muomu ka vasikile Avilahama cipue mbuto yeni ngecize akapua suana ya vifuti hamezi a lisiko vunoni ha vuvuike vua kutsiliela. ¹⁴ Muomu vakua mezi alisiko nga vakevo vasuana , kutsiliela nga cinapu canaco, kaha litavasiano lize nga lina zimangana. ¹⁵ Muomu mezi alisiko a neha vutenu, vunoni kuze kakuesi mezi alisiko, kuze naua kakuesi ku vulumuna. ¹⁶ Muomu eci cikeco cinapu caku tsiliela, ngecize cikapua kumbuto Avilahama yose kati oyo lika ikeye ya mezi alisiko, vunoni kuli ize naua ikeyo yakutsiliela cize ca Avilahama. Ikeye tatetu tuva vose. ¹⁷ Ngue vanaci soneka, "Njinaku puisa ise ya miyati yayingi, "Avilahama akele kumeso a uze iua tsilielee, ikeye Njambi, uze ueku yoyesa vatsi nevi viahiko ueku vitumbula ngue vievi. ¹⁸ Uze vene muku lavelela amo via kulavelela via hiko, ua tsiliele ngecize a kuakuka kala Ise yamiyati ya yingi, ngue kuvize viva handekele, "Ngecize kukapua mbulo yove." ¹⁹ Kaha ka vottsikile muku tsililela, ua yonguele muvila veni ukeuo ngue vakutsa (ikeye vakele na cihita ca miaka), na vuntsimpi vua sala. ²⁰ Vunoni mukutala tala kuvize via musikile Njambi, Avilahama ka peliangelele na zimpata, vunoni ua kaniamene cikuma muku tsiliela ngecize ua zumbangeyele Njambi. ²¹ Kaha ua tantekeyele cili vene ngecize cize camu sikile, ua hasele naua ku ci linga. ²² Ngoco vene vamu tandeleleco ca vuvuike vamu tandeleleco. ²³ Vuno eci citsa kavanu sonekelele ikeye lika ngecize vamu tandeleleco. ²⁴ Vunoni va cisonekelele etu naua vakatu tandelaco etu vakua kutsiliela uze ua sanguile Yesu muangana uetu kuvatsi. ²⁵ Uze ivecelele muomu vupi vietu kaha vamu sanguile mukutu sambuluisa.