¹ Enu va muanetu, kutsila camutima uange naku vundila cange kuli Njambi vili hali vakeko, nguange avovole. ² Muomu njavasoluele vakaleho nguange vali na cipepa ca Njambi, vunoni kati kuesekesa na mana ³ Muomu, kuhona kuivuisisa vuololoke vuze vuakufuma kuli Njambi, nakuzikisisa vuololoke vuavo vavene, kavalihanene kuvuololoke vua Njambi. ⁴ Muomu Kulistu napu uakusula na lusimbi lua vuololoke vuovose vaze vatsiliela. ⁵ Muomu Mosesa nasoneka naku handeka ngueni, ''Kuoloka caku zisimbi ngueni, mukaku cipanga akayoyelaho. ⁶ Vunoni vuololoke vuakutsiliela vua handeka nguavo, ''Kati ukahandeke mumutima uove nguove iyandzo akuya muilu? calumbunuka nguavo kumusulula Kulistu hamavu. ⁷ Kaha nguavo kati uhandeke nguove iyandzo akumusikumuna Kulistu mucina, kumusangula kuvatsi. ⁸ Vunoni nguavo vika? Nguavo, mezi ali hahiehi nove mukanua kove namutima uove, ngue nguavo, mezi akutsiliela, aua atuekuambulula. ⁹ Muomu ngue ukamutavela Yesu nakunua kove nguove ikeye Muata, kaha ngue ukatava mumutima uove nguove, Njambi uamusangula laza kuvatsi, vaka kuovoka. ¹⁰ Muomu ngue ukutava namutima ueni nakuuana kuoloka, kaha akukunduiya nakunua keni nakuuana vuovole. ¹¹ Muomu mezi avasoneka ahandeka nguavo, ''Uose akumutsiliela kava kavuisa tsoni. ¹² Muomu kavakamona kaYuleya nakaHetese mueka na mueka, muomu Muata uetu umolika ikeye Muata uavose, kaha ali navupite vuakuviukisila vose vaze vamusana. ¹³ Muomu nguavo, uose akamusana Yehova halizina lieni vakamuovola. ¹⁴ Kaha vunoni, Ou ivahono kutavela vakumusana vati? kaha ou ivahono kuivua vakumutavela vati? kaha nge kati mukakuenda menga vakevua vati? ¹⁵ Kaha ngue kava tumineko, menga vakuambulula vati? Ngue muze muva soneka nguavo, '' Omu muyaviuka mikono ava vakuambulula muzimbu uacili uaviuma viacili cahi. ¹⁶ Vunoni vose kavatavelele kumuzimbu nkana uacili cahi muomu Isaya ngueni, ''Ove Yehova, iyandzo natavela muzimbu uetu? ¹⁷ Sikako kutava na cizila hakuivua, kaha kuivua nacizila hamavu aKulistu. ¹⁸ Vunoni nguange kauevuisisile tahi ni? Cahi, uavuile kaha nguove zungo yaco cinayi kumavu ose mezi ao anayi kuzitsongo zia mufuti. ¹⁹ Vunoni nguange, vaIsaleli vaka ntantekeya ni? Mosesa alivangele kuhandeka ngueni, ''Ange njikamivuisa lifuua navaze vahona kuka;la vaka lifuiti, njiakamisueka navaka lifuti vakuhona mualumbunukila maana. ²⁰ Vunoni Isaya nauunda nambe ngueni, ''Vanjiuana kuli vaze vahonanene kunjilengeya, Njalisolola kulo vaze vahona kunjihulisa. ²¹ Vunoni hakundeka vaIsaleli hali kuhandeka ngueni, ''Mutana uose njinolola mavoko ange kuli vantu vaka kupanga vaka sembulule.